Read De Bibel JHF Aposteljeschicht 27 Bible Online

Aposteljeschicht 27 - De Bibel JHF bible

Aposteljeschicht 27

¹Oba aus beschloten wia, daut wie no Italien auffoaren sullen, äwajeewen see Paulus aus uk eenje aundre Jefangne eenem Hauptmaun, met Nomen Julius, von de Augustus Schoa.

²Oba aus wie een adramietischet Schepp bestäajen hauden, un väa hauden, to säajlen no de Uaten delenjd daut Eewa von Asien, un wie fuaren auf; un bie ons Aristarchus wia, een Mazedonien ut Tessalonich.

³Un aum aundren Dach läd wie en Sidon aun. Un Julius behaundeld Paulus frintlich un erlaubd am, no Frind to gonen, om äare Väasorj to erlangen.

⁴Un von doa fua wie auf un säajelden unja Ziepern han, wiels de Wint ons entjäajen wia.

⁵Un aus wie daut Mäa daut Eewa delenjd Zilizien un Pamfielien derchjesäajelt hauden, kjeem wie no Mira en Liezien;

⁶un aus de Hauptmaun doa een alexandrischet Schepp jefungen haud, daut no Italien säajeld, leet hee ons doa enstieen.

⁷Oba aus wie väl Doag langsom jesäajelt un met Mieej jäajen Knidos jekomen wieren, wiels de Wint ons nich nenn leet, säajeld wie unja Kreet han, jäajen Salmone;

⁸un met Mieej aun ar vebie säajelden, kjeem wie aun eenen Uat, scheena Howen jenant, doa dichtbie de Staut Lasea wia.

⁹Aus oba väl Tiet vegonen wia un de Seefoat jefäadlich wia, wiels uk daut Fausten vebie wia, ermond Paulus,

¹⁰un säd to an: Mana, ekj see, dautet met Onheil un väl Velust, nich blooss de Lodinj (Frachtlod) un daut Schepp, sonda uk onsem Läwen passieren woat.

¹¹Oba de Hauptmaun jleewd däm Stiamaun un däm Schepp Ieejendeema mea, aus däm, waut Paulus säd.

¹²Doa oba de Howen toom Äwawintren nich to brucken wia, de mieeschte beschlooten, von doa wajchtofoaren, auf see veleicht kunnen no Feenix jelangen un doa äwawintrenn en eenem Howen von Kreet, dee jäajen Siedwasten un no Nuadwasten op es.

¹³Doa oba de Siedwint saunft aunfunk to blosen, meenden see äare Aufsecht faust enne Haunt jekjräajen to ha, hoowen de Anka un fuaren dicht aun Kreet vebie.

¹⁴No nich langa Tiet oba erhoof sikj von (Kreet) een Wirbelstorm, jenant Nuadoost-Wint.

¹⁵Doa oba daut Schepp metjeräten wort un kunn de Spetz nich jäajen däm Wint dreien, jeef wie opp un leeten ons (vom Wint) driewen.

¹⁶Oba aus wie bie eene kjliene Insel, jenant Klauda, vebie fuaren, kunn wie met Mieej daut Radungsboot secha hoolen (majchtich woaren).

¹⁷Daut trocken see nohecht un brukten Helpmeddel, om daut Schepp (Boot) auntobinjen; un hauden Angst, en de Sierte (een flaket Wota met een Saunteewa) veschloagen to woaren, see leeten de Säajel rauf, un see leeten sikj soo driewen.

¹⁸Aus wie oba vom Storm romjedräwen worden, must see aum näakjsten Dach, [ut Noot,] een Deel vonne Woa äwa Buat schmieten;

¹⁹un aum dredden Dach schmeeten see met ieejne Henj daut Schepp Jereetschoft äwa Buat.

²⁰Oba aus äwa miere Doag wäda Sonn noch Stierns sikj seenen leeten un een nich jerinja Storm aunhilt, wort ons em äwajen jiedre Hopninj jenomen (om jerat to woaren).

²¹Un aus see eene lenjre Tiet onen waut to Äten vegonen wia, doa stunt Paulus en äare Medd opp un säd: Oo Mana, daut wia needich jewast mie to horchen un nich von Kreet wajchtofoaren un hauden junt dit Onheil un dän Velust jespoat.

²²Un nu em Blekj opp de Dinj vemon ekj junt, gootsmoots to sennen, dan kjeen Läwen woat veloaren gonen, buta daut Schepp.

²³Dan en dise Nacht stunt een Enjel Gottes bie mie, däm siena ekj sie un däm deen,

²⁴un säd: Ha nich Angst, Paulus! Du motst ver dän Kjeisa stonen; un see, Gott haft die aula jeschenkjt, dee met die foaren.

²⁵Doarom siet gootsmoots, Mana, dan vetrut Gott, dautet soo sennen woat, soo aus et mie jesajcht worden es.

²⁶Oba wie motten opp eene Insel veschloagen woaren (launden).

²⁷Oba aus de vieetieende Nacht jekomen wia, un wie em Adriatischen Mäa omhäa jedräwen worden, medden enne Nacht meenden de Seemana, daut see aun een Launt noda kaumen.

²⁸Un aus see daut Senkjblie (Bliejewicht) rutjeschmäten hauden, fungen see 20 Fodem (120 Schoo); un een bät wieda jefoaren wieren un wada daut Senkjblie jeschmäten hauden, fungen see 15 Fodem (90 Schoo).

²⁹Un hauden Angst, daut wie irjentwua aune Eewasteena veschloagen woaren, schmeeten see vom Hinjaschepp 4 Anka ut un see wenschten dautet Dach woat.

³⁰Oba aus de Seemana sochten daut Schepp to veloten un daut Radungsboot rauf em Mäa jeloten hauden met (unja) de Uträd aus wan see vom Schepp väaren de Anka rut schmieten wullen,

³¹Paulus säd to dän Hauptmaun un de Soldoten: Wan dise nich oppem Schepp bliewen, kjenn jie nich jerat woaren.

³²Donn schneeden de Soldoten de Strenj von Radungsboot auf un leeten daut rauf faulen.

³³Oba aus et Dach woaren wull, vemond Paulus aule, daut see äten sullen, un säd: Vondoag es de vieetieende Dach, daut jie onen eene Moltiet (opp eene Radinj luaren) jebläwen sent, un nuscht to junt jenomen ha.

³⁴Doawäajen vemon ekj junt, ne Moltiet to nämen, dan dit jehieet to june Radunk; dan kjeena von junt woat een Hoa vom Kopp velieren.

³⁵Oba aus hee dit jesajcht un Broot jenomen haud, dankt hee Gott ver aulem, un aus hee daut jebroaken haud, funk hee aun to äten.

³⁶Oba aula, mootich jeworden, nämen uk see selfst Äten (Moltiet) to sikj.

³⁷Wie wieren oba em gaunzen 276 Seelen oppem Schepp.

³⁸Aus see sikj oba saut jejäten hauden, muaken see daut Schepp leichta, endäm see daut Jeträajd em Mäa schmeeten.

³⁹Oba aus et Dach wort, erkjanden see daut Launt nich, see bemoakjten (sagen) oba eene Bucht, dee een Saunteewa haud, aun däm see beschlooten, wan see kunnen, daut Schepp doa nenn ranen to loten (stieren).

⁴⁰Un aus see de Anka loos jemoakt hauden, leeten see dee em Mäa, un muaken tojlikj de Strenj de Scheppstia loos un trocken daut väaschte Säajel jäajen däm Wint un stieeden opp daut Saunteewa to.

⁴¹Oba see kjeemen opp eene, von beid Sieden, von de Mäa Streemungen äwajeschälde Städ, doa leeten see daut Schepp noppranen; un daut väaschte Poat vom Schepp haud sikj faustjesat un bleef onbewäajlich, oba daut Hinjaschepp dreiwd to vebräakjen vonne Jewault de Walen.

⁴²Oba mank de Soldoten kaum een Beschluss tostaund, daut see de Jefangne doot moaken sullen, doamet nich wäa rut schwamt un wajch rant.

⁴³Oba de Hauptmaun, wull Paulus raden, hindad an aun äarem Väahaben un befool, daut deejanje de schwamen kunnen, sikj toieescht rauf schmieten un aum Launt gonen sullen;

⁴⁴un dee äwaje, de eene opp Bräda de aundre opp irjent aundre Stekja (Sachen) vom Schepp. Un soo passieed daut, daut aula aum Launt jerat worden.