Read De Bibel JHF Aposteljeschicht 28 Bible Online

Aposteljeschicht 28 - De Bibel JHF bible

Aposteljeschicht 28

¹Aus wie jerat wieren, doa erfua wie, daut de Insel Malta heet.

²Un de Einheima beweesen ons butajeweenelje Frintlichkjeit, dan see stekjten een Fia aun, un neemen ons aula no sikj wäajen däm Räajen un wäajen de Kold.

³Oba aus Paulus een Deel Struck toop jesaumelt haud un oppem Fia läd, kjeem derch de Hett eene Natta (Schlang) rut un beet sikj aun siene Haunt faust.

⁴Aus oba de Einheima daut Tia aun siene Haunt henjen sagen, säden see to enaunda: Jewess es dis Mensch een Merda, däm, dee utem Mäa jerat es, de Rach-Jettin (de Jettin waut Rach eewen deit) nich läwen lat.

⁵Hee nu, scheddad daut Tia auf em Fia nenn un litt nuscht Beeset.

⁶Oba see luaden, daut hee oppschwalen ooda plazlich doot omfaulen wudd. Aus see oba eene lenjre Tiet luaden un sagen daut am nuscht Butajeweeneljet passieet, endaden see äare Meeninj un säden, hee es een Gott.

⁷Oba en de Jäajent om janem Uat, haud de Ieeschta oppe Insel, met Nomen Publius, Launtgoot; dee naum ons frintlich opp un jeef ons fa dree Doag Oppdach.

⁸Oba daut passieed, daut Publius sien Voda, von Frostfeeba un Derchfaul befollen, doa lach. No däm jinkj Paulus nenn, un bäd un am de Henj oppjelajcht haud un heeld am.

⁹Aus dit oba passieet wia, kjeemen uk dee aundre opp de Insel, dee Krankheiten hauden, doatoo un worden jeheelt;

¹⁰dee ons uk met väl Iea ieeden, un aus wie auffoaren wullen, jeewen see ons aules, waut wie needich hauden, met.

¹¹Oba no 3 Moonat fua wie en eenem alexandrischet Schepp auf, daut opp de Insel äwawintat haud, jetieekjent met Dioskuren.

¹²Un aus wie no Sierakus kjeemen un doa bleew wie dree Doag.

¹³Von doa, säajeld wie em Boagen, un kjeemen no Region; un aus no eenem Dach een Siedwint oppkjeem, kjeem wie aum tweeden Dach no Puteoli,

¹⁴wua wie Breeda fungen un jebedd worden, säwen Doag bie an to bliewen; un soo kjeem wie no Room.

¹⁵Un von doa kaumen de Breeda, aus see von ons jehieet hauden, ons entjäajen, bot Apii-Forum un Tres Tabernä, un aus Paulus an sach, dankt hee Gott un fot Moot.

¹⁶Aus wie oba no Room kjeemen, wort Paulus erlaubt, met däm Soldot de am bewoakt fa sikj to bliewen.

¹⁷Oba no dree Doag passieed daut, daut hee de Ieeschte vonne Juden toop roopt, aus see oba toop jekomen wieren, säd hee to an: Mana, Breeda, ekj ha nuscht Fientlichet jäajen daut Volkj ooda de Vodasch Sitten jedonen, sie jefangen ut Jerusalem enne Henj de Reema äwajeft worden,

¹⁸dee mie vehieet (utjefroacht) hauden, wullen mie frieloten, wiels doa kjeene Uasoak wia daut dän Doot vedeent haud.

¹⁹Oba aus de Juden doa wadaräde, wia ekj jedwungen, mie oppem Kjeisa to beroopen, ekj ha nuscht jäajen mien Volkj, irjent waut, to kloagen.

²⁰Wäajen dise Uasoak ha ekj junt nu hiahäa jeroopt, junt to seenen un met junt to räden; dan wäajen de Hopninj Israels sie ekj met dise Kjäd jebungen.

²¹Oba see säden to am: Wie ha äwa die noch eenen Breef von Judäa jekjräajen, es uk kjeena vonne Breeda häajekomen un haft ons äwa die irjent waut Beeset berecht ooda jesajcht.

²²Oba wie velangen von die to hieren, waut du denkjst, dan von dise Sakjt es ons bekaunt, daut see äwaaul met Wieed bekjamft woat.

²³Aus see am oba eenen Dach bestemt hauden, kjeemen noch mea no am enne Wonunk, dän hee läd ut un bezeijd daut Rikj Gottes un vesocht an to äwazeijen von Jesus soo aus utem Jesaz Moses aus uk de Profeeten, von Zemorjes bat Owent.

²⁴Un de eene leeten sikj äwazeijen von däm, waut jesajcht wort, de aundre jleewden nich.

²⁵See oba wieren sikj metenaunda oneenich, un tranden sikj, nodäm aus Paulus een eensjet Wuat säd: Goot haft de Heilja Jeist derch Jesaja, däm Profeet, to june (onse) Vodasch jerät

²⁶un jesajcht: «Go no disem Volkj un saj: Hierent woa jie hieren un nich vestonen, seenent woa jie sennen un nich woanämen.

²⁷Dan onemfindlich es daut Hoat von disem Volkj jeworden, schwoa ha see met de Uaren jehieet un äare Uagen ha see jeschloten, doamet see nich sennen met de Uagen un met de Uaren hieren un met däm Hoaten vestonen un trigjkomen (sikj bekjieren) un ekj an heelen woa». {Jes.6.9,10}

²⁸Soo sell jie nu weeten, daut dit Heil Gottes wort de Heiden jeschekjt, see woaren daut uk hieren.

²⁹[Un aus hee dit jesajcht haud, jinjen de Juden wajch un hauden väl Wuatwakjsel unja sikj.]

³⁰Oba hee bleef 2 gaunze Joa en eene jerente Wonunk un hee neem aule dee no am kjeemen opp,

³¹vekjindijd daut Rikj Gottes un lieed daut äwa däm Harn Jesus Christus onjehindat met aule Friemootichkjeit.