Read De Bibel JHF Aposteljeschicht 4 Bible Online

Aposteljeschicht 4 - De Bibel JHF bible

Aposteljeschicht 4

¹Aus see toom Volkj räden, kjeemen no an de Priesta un de Tempel Väastona (Hauptmaun) un de Saduzäa,

²un wieren oppjerecht, wiels see daut Volkj lieeden un en Jesus daut Oppstonen vonne Doodes vekjindjen (prädjen).

³Un see läden de Henj aun an un saden an em Jefenkjnis bot Zemorjes; dan daut wia aul Owent.

⁴Oba väle, von dee daut Wuat hieeden, kjeemen toom Gloowen; un de Zol de Mana wort onjefäa [bie] 5000.

⁵Oba daut passieed aum näakjsten Dach, vesaumelden sikj äare Bowaschte un de Eltestasch un de Schreftjelieede en Jerusalem,

⁶uk Hanas, de Huagapriesta, un Kaifas un Johanes un Alexanda, un aul dee wieren utem (vom) Huagapriesta Jeschlajcht (Famielje).

⁷Un aus see an en äare Medd jestalt hauden, fruagen see: En wäms Krauft ooda en wäm sienen Nomen ha jie dit jedonen?

⁸Donn säd Petrus, erfelt met dän Heiljen Jeist: Bowaschte vom Volkj un Eltestasch [von Israel]!

⁹Wan wie vondoag vehieet (utjefroacht) woaren, wäajen eene goode Dot, aun eenem jelämden Mensch, [un jefroacht woaren], derch wäm es hee jeheelt worden,

¹⁰daut saul junt aulem bekaunt sennen un uk däm gaunzen Volkj Israel, daut derch däm Nomen Jesus Christus, däm Nazarena, dän jie jekjriezicht ha, däm Gott vonne Doodje oppjewakjt haft, derch disem steit disa (Jelämda) ver junt jesunt.

¹¹Dit es de Steen, veacht von junt, de Bulied, dee toom Akjsteen jeworden es.

¹²Un daut es en kjeenem aundrem de Radunk, dan doa es uk kjeen aundra Nomen unjrem Himmel dee Menschen jejäft, en däm wie jerat woaren sellen.

¹³Oba aus see sagen dän frieen Moot en Petrus un Johanes, un erfuaren, daut see onjelieede un onjebilde Lied sent, see wundaden sikj; oba see wisten von an, daut see met Jesus jewast wieren.

¹⁴Un doa see däm Mensch bie an stonen sagen, dee jeheelt wia, kunnen see nuscht doajäajen sajen.

¹⁵Oba nodäm see an, utem Huagen Rot, befoolen hauden wajchtogonen, vehaundelden see metenaunda, un säden:

¹⁶Waut sell wie dise Menschen doonen? Dan emmahan es derch an een bekaundet (besondret) Tieekjen passieet, daut es aule Bewona en Jerusalem openboa, un wie kjennen daut nich velieejen.

¹⁷Oba doamet daut nich wieda unja däm Volkj vebreet woat, lot ons an iernsthauft dreiwen, daut see nich mea en disem Nomen to kjeenem Mensch räden.

¹⁸Un see roopten an un befoolen [an], äwahaupt nich to räden un to lieren em Nomen Jesus.

¹⁹Oba Petrus un Johanes auntwuaden un säden to an: Uadeelt selfst, auf et rajcht es ver Gott, opp junt mea to horchen, aus opp Gott;

²⁰dan wie kjennen nich, nich räden von däm waut wie jeseenen un jehieet ha.

²¹Oba see dreiwden an noch mea, un leeten an frie, endäm see nich fungen, woo see an bestrofen kunnen, wäajen däm Volkj; dan aula veharlichten Gott äwa daut waut passieet wia.

²²Dan de Mensch wia äwa 40 Joa oolt, dee jeheelt wia un aun däm dit Tieekjen passieed.

²³Oba aus see friejeloten wieren, kjeemen see no de Äaje un berechten aules, waut to an de Huagapriesta un de Eltestasch jesajcht hauden.

²⁴Oba see, aus see daut hieeden, hoowen eenstemmich äare Stemm to Gott, un säden: Har, du best [de Gott], dee däm Himmel un de Ieed un daut Mäa un aules, waut doabennen es, jemoakt haft;

²⁵dee du [derch dän Heiljen Jeist,] derch onsem Voda David sien Mul, dienem Kjnajcht, jesajcht hast: «Wuarom tooben de Nazionen, un de Velkja plonen Iedel (waut nuscht es)?

²⁶De Kjennichs de Ieed stonen sikj toop, un de Harscha vesaumlen sikj jäajen däm Har un jäajen sienen Christus». {Ps.2,1.2}

²⁷Dan en Woarheit vesaumlen sikj en dise Staut jäajen dienen heiljen Kjnajcht Jesus, däm du jesaulft hast, soo aus uk Herodes aus uk Pontius Pilatus met de Nazionen un de Velkja Israels,

²⁸om to doonen, waut diene Haunt un dien Rotschluss verhäa bestemt haft, dautet passieren sull.

²⁹Un nu, Har, kjikj, opp äa Dreiwen, un jeff diene Kjnajchts, dien Wuat met aula Frieheit brow to räden,

³⁰endäm du diene Haunt utstrakjst toom heelen, un Tieekjen un Wunda passieren derch dienen heiljen Kjnajcht Jesus sien Nomen.

³¹Un aus see jebät hauden, bäbd de Städ, aun dee see vesaumelt wieren; un aula worden met dän Heiljen Jeist erfelt, un see räden daut Wuat Gottes frie un brow.

³²Oba de Menj, de Jleewende wieren een Hoat un eene Seel, un uk nich eena säd, daut irjent waut von sienem Goot sien ieejen es, oba aules wia äa jemeenet.

³³Un met groote Krauft jeewen de Apostel Zeichnis auf vom Har Jesus sien Oppstonen; un groote Jnod wia opp an aula.

³⁴Dan doa wia kjeena derftich (Noot liedent) unja an, dan aule Ieejendeema von Launt ooda Hiesa wieren, vekoften see un brochten dän Pries (daut Jelt) von daut Vekofte

³⁵un läden daut (ver) de Feet de Apostel; oba daut wort eenem jiedrem toojedeelt, doano aus een jiedra derftich wia.

³⁶Oba Josef, dee vonne Apostel Barnabas jenant wort (äwasat heet daut: een Treesta Sän) een Levit, en Ziepern jebuaren,

³⁷dee eenen Aka haud, vekoft däm, brocht daut Jelt un läd daut to Feet de Apostel.