Read De Bibel JHF Aposteljeschicht 6 Bible Online

Aposteljeschicht 6 - De Bibel JHF bible

Aposteljeschicht 6

¹Oba en dee Doag, aus de Zol de Jinja toonaum, grunzten de Hellenisten (griechische Juden) jäajen de Hebräa, wiels äare Wätfrues em däachlichen Deenst äwaseenen worden.

²Un de 12 roopten de Menj de Jinja un säden: Daut es nich goot, daut wie daut Wuat Gottes veloten un de Deschen bedeenen.

³Oba kjikjt junt om, Breeda, no 7 Mana ut (von) junt, met een goodet Zeichnis, voll [Heiljen] Jeist un Weisheit dee wie en dise Oppgow ensaten woaren;

⁴oba wie woaren em Jebäd un em Deenst un em Wuat fausthoolen.

⁵Un daut Wuat jefoll de gaunze Menj, un see wälden Stefanus, eenen Maun voll Gloowen un Heiljen Jeist, un Filippus un Prochorus un Nikanor un Timon un Parmenas un Nikolaus eenen Proselieten (bekjieeden ute Heiden) ut Antiochia,

⁶dee see vere Apostel stalden; un aus see jebät hauden, läden see an de Henj opp.

⁷Un Gott sien Wuat neem too, un de Zol de Jinja en Jerusalem vemieed sikj sea; un eene groote Menj Priesta worden däm Gloowen jehuarsom.

⁸Oba Stefanus, voll Jnod un Krauft, deed Wunda un groote Tieekjen mank daut Volkj.

⁹Oba doa stunden eenje opp ut de Sienagog jenant Libertina un de Kiereena un Alexandra un dee ut Zilizien un Asien un streeden met Stefanus.

¹⁰Un see kunnen nich de Weisheit un däm Jeist wadastonen, met dee hee räd.

¹¹Donn steften see Mana aun, dee doa säden: Wie ha am lastaliche Wieed räden hieren jäajen Moses un Gott.

¹²Un see hizten daut Volkj opp un de Eltestasch un de Schreftjelieede; un äwafollen am, un see pakten am un leiden am verem Huagen Rot.

¹³Un see stalden faulsche Zeijen opp, dee doa säden: Dis Mensch hieet nich opp, Wieed to räden jäajen disem heiljen Uat un däm Jesaz:

¹⁴Dan wie ha am sajen jehieet: Disa Jesus, de Nazarena, woat disen Uat venichten un woat de Sitten endren, dee ons Moses äwaleewat haft.

¹⁵Un aule, dee em Huagen Rot sauten, kjikjten am stia aun, un sagen sien Jesecht aus een Enjeljesecht.