Read De Bibel JHF Aposteljeschicht 8 Bible Online

Aposteljeschicht 8 - De Bibel JHF bible

Aposteljeschicht 8

¹Oba Saul haud een Jefaulen aun (Stefanus) sienem Doot. Oba en jane Doag jeef daut eene groote Vefoljunk jäajen de Jemeent en Jerusalem, un aule worden vestreit äwa de Launtschoft von Judäa un Samaria, buta de Apostel.

²Oba Stefanus begrowden gottesferchtje Mana un stalden een grootet Weekloagen (Trua) aun.

³Oba Saul vesocht de Jemeent uttolaschen, jinkj en eenselne Hiesa nenn un schlapt Mana un Frues wajch un äwajeef an em Jefenkjnis.

⁴De Vestreide jinjen omhäa un vekjindijden (prädijden) daut Wuat aus frooe Bootschoft.

⁵Oba Filippus jinkj rauf no de Hauptstaut Samaria un prädijd an dän Christus.

⁶Oba daut Volkj hieed en een Senn opp daut waut Filippus säd, endäm see hieeden un sagen de Tieekjens dee hee deed.

⁷Dan väle, de orreine Jeista hauden, fuaren rut, schrieejen met ne lude Stemm un väl Jelämde un Vekjräpelde worden jeheelt.

⁸Oba en de Staut wia groote Freid.

⁹Oba een Maun met Nomen Simon, wia verhäa enne Staut, dee Zaubarie jedräwen haud, un daut Volkj von Samaria bezeibad, un säd, daut hee waut Grootet es;

¹⁰däm aula von Kjlien bat Groot aunhongen, un säden: Disa es de Krauft Gottes, dee maun de Groote nant.

¹¹Oba see hongen am doawäajen aun, wiels hee an lange Tiet derch de Zaubarie bezeibat jebrocht haud.

¹²Oba aus see däm Filippus jleewden, dee de frooe Bootschoft vom Rikj Gottes un dän Nomen Jesus Christus vekjindijd, leeten sikj Mana aus uk Frues deepen.

¹³Un uk Simon selfst jleewd, un aus hee jedeept wia, hilt hee sikj aun Filippus; un aus hee sach de Tieekjens un groote Wunda passieren, vewundad hee sikj.

¹⁴Oba aus de Apostel en Jerusalem hieeden, daut Samaria daut Wuat Gottes aunjenomen haben, schekjten see Petrus un Johanes no an;

¹⁵aus see hanjekomen wieren, un bäden fa an, daut see dän Heiljen Jeist kjrieen;

¹⁶dan hee wia noch nich opp kjeenem von an jefollen, oba see wieren blooss jedeept opp däm Har Jesus sien Nomen.

¹⁷Donn läden see an de Henj opp, un see kjräajen dän Heiljen Jeist.

¹⁸Oba aus Simon sach, daut derch daut Henjopplajen de Apostel de [Heilja] Jeist jejäft wort, brocht hee an Jelt,

¹⁹un säd: Jeft uk mie dise Macht, daut, wäm ekj de Henj opplaj, dee dän Heiljen Jeist emfangt.

²⁰Oba Petrus säd to am: Dien Jelt foat met die enne Vedoawnis, wiels du dochst, daut de Gow Gottes derch Jelt to kjrieen wia!

²¹Du hast kjeen Aundeel noch Rajcht (Oaw) aun disem Wuat; dan dien Hoat es nich opprechtich ver Gott.

²²Aulsoo bekjia die (doo Busse, denkj om) äwa diene Gottloosichkjeit un bedd däm Har, daut hee die diene Jedanken en dien Hoat vejäwen mucht;

²³dan ekj see, daut du - en betre Gaul un en Ojjerajchtichkjeit jespaunt best.

²⁴Oba Simon auntwuad un säd: Bät jie fa mie toom Har, daut nuscht von däm äwa mie kjemt, waut jie jesajcht ha.

²⁵No däm see bezeijd un jerät hauden daut Haren Wuat, jinjen see trigj no Jerusalem un prädijden de frooe Bootschoft (daut Evangelium) en väle samaritische Darpa.

²⁶Oba däm Har sien Enjel räd to Filippus un säd: Sto opp un go nom Sieden opp däm Wajch, de von Jerusalem no Gasa rauf jeit; disa es eensom (ladich).

²⁷Un hee stunt opp un jinkj. Un kjikj, [een Maun] een Ätiopia, een Eunuch (Kjennichshoff Beaumta) een Machthabenda von Kandake, de Kjennijin de Ätiopia, dee äwa äarem gaunzem Schauz wia, dee wia jekomen, om en Jerusalem auntobäden;

²⁸un hee wia oppem Trigjwajch un saut opp sien Woagen un läsd däm Profeet Jesaja.

²⁹Oba de Jeist säd to Filippus: Go han un hool die dicht bie dän Woagen.

³⁰Oba Filippus rand opptoo un hieed am däm Profeet Jesaja läsen un säd: Vesteist du uk, waut du läst?

³¹Oba hee säd: Woo kaun ekj dan, wan mie kjeena nich aunleiden (utlajen) deit? Un hee bedd Filippus, nopptostien, un sikj bie am dol to saten.

³²Oba de Schreftstäd dee hee läsd wia dise: «Hee wort aus een Schop toom schlachten jefieet, un aus een Laum ver sienem Schäara stomm es, soo muak hee sien Mul nich op.

³³En siene Raufsatunk (läach saten) wort sien Jerecht wajch jenomen; wäa woat sien Jeschlajcht beschriewen? Dan sien Läwen woat vonne Ieed wajchjenomen». {Jes.53,7-8}

³⁴Oba de Eunuch auntwuad däm Filippus un säd: Ekj bedd die, von wäm sajcht de Profeet dit? Von sikj ooda von eenem aundren?

³⁵Oba Filippus muak sien Mul op un funk aun met dise Schreftstäd un vekjindijd (prädijd) am de frooe Bootschoft von Jesus.

³⁶Oba aus see opp däm Wajch fuaren, kjeemen see aun een Wota, un de Eunuch säd: Kjikj, doa (hia) es Wota; waut hindat mie, daut ekj jedeept woa?

³⁷[En de oole Hauntschreften es dis Varsch nich (donn säd Filippus: Wan du von gaunzem Hoaten jleefst, dan es daut erlaubt. Hee auntwuad un säd: Ekj jleew daut Jesus Christus Gottes Sän es!)]

³⁸Un hee befool dän Woagen stell to hoolen, un see stieejen beid em Wota nenn, Filippus uk de Eunuch, un hee deept am.

³⁹Oba aus see utem Wota rut jestäajen wieren, entrekjt de Jeist vom Harn däm Filippus; un de Eunuch sach am nich mea, oba hee fua sienen Wajch met Freid.

⁴⁰Oba Filippus wort en Aschdod jefungen; un hee jinkj un vekjindijd de frooe Bootschoft en aule Städa, bot hee no Cäsarea kjeem.