Read De Bibel JHF Reema 10 Bible Online

Reema 10 - De Bibel JHF bible

Reema 10

¹Breeda, de Wensch en mien Hoat un miene Bedd fa an to Gott es, daut see jerat woaren.

²Dan ekj bezeij an, daut see Iewa fa Gott ha, oba nich no Erkjantnis.

³Dan doa see Gottes Jerajchtichkjeit nich erkjanen un äare ieejne [Jerajchtichkjeit] häatostalen sochten, ha see sikj de Jerajchtichkjeit Gottes nich hanjejäft (unjadon).

⁴Dan Christus es daut Enj von daut Jesaz, jiedrem Jleewenden to Jerajchtichkjeit.

⁵Moses beschreef de Jerajchtichkjeit, dee utem Jesaz es: «Dee Mensch, dee dise Dinj jedonen haft, woat doaderch läwen». {3Mos.18,5}

⁶Oba de Jerajchtichkjeit ut Gloowen sajcht soo: Saj nich en dienem Hoaten: «Wäa woat em Himmel enopp stieen?» Daut es, om Christus rauftoholen;

⁷ooda: «Wäa woat erauf stieen en däm Aufgrunt?» Daut es, om Christus vonne Doodes opptoholen;

⁸doch waut sajen see? «Daut Wuat es dicht bie die, en dien Mul un en dien Hoat»; {5Mo.30,12-14} dit es daut Wuat vom Gloowen, daut wie vekjindjen,

⁹dan wan du met dien Mul Jesus aus Har bekjanst un em Hoaten jleefst, daut Gott am vonne Doodes oppjewakjt haft, woascht du jerat woaren.

¹⁰Dan met daut Hoat woat jejleeft to Jerajchtichkjeit, un met daut Mul oba woat bekjant toom Heil (Radunk).

¹¹Dan de Schreft sajcht: «Jiedra, dee aun am jleeft, woat nich to Schaund woaren». {Jes.28,16}

¹²Dan doa es kjeen Unjascheet tweschen Juden un Griechen, dan de selja Har von aulen es Rikj fa aule, dee am aunroopen;

¹³«dan jiedra, dee dän Nomen vom Har aunroopen woat, woat jerat woaren». {Joel 3,5}

¹⁴Woo sellen see däm aunroopen, aun däm see nich jejleeft ha? Oba woo woaren see aun dän jleewen, von däm see nich jehieet ha? Oba woo sellen see hieren onen eenen Vekjindja (Liera)?

¹⁵Oba woo sellen see vekjindjen, wan see nich jeschekjt sent? Aus jeschräwen steit: «Woo leeftolich sent de Feet de Vekjindja, dee daut Goode (Fräd) vekjindjen, [dee frooe Bootschoft brinjt, dee Fräd vekjindicht, dee Heil vekjindicht»]! {Jes.52,7}

¹⁶Oba nich aula sent de frooe Bootschoft (däm Evangelium) jehuarsom jeworden. Dan Jesaja sajcht: «Har, wäa haft onse Vekjindjunk jejleeft?» {Jes.53,1}

¹⁷Aulsoo kjemt de Gloowen ut de Vekjindjunk (Bootschoft), oba de Vekjindjunk derch daut Wuat Gottes (Christus).

¹⁸Oba ekj saj: Ha see veleicht nich jehieet? Jo freilich. «Äa Schaul es oppe gaunze Ieed, äwa de gaunze Ieed utjegonen, un äare Wieed (Räd) bat aum Enj de bewonde Ieed». {Ps.19,5}

¹⁹Oba ekj saj: Haft Israel nich vestonen? Aus ieeschta säd Moses: «Ekj well junt to Aufgonst reizen äwa een Nichvolkj (waut kjeen Volkj es), äwa een Onvestendjet Volkj, well ekj junt oajalich moaken». {5Mos.32,21}

²⁰Oba Jesaja woacht daut un sajcht: «Ekj sie jefungen worden von dän, dee mie nich sochten, ekj sie openboa jeworden dän, dee nich no mie fruagen». {Jes.65,1}

²¹Oba betrafs Israel sajcht hee: «Den gaunzen Dach ha ekj miene Henj utjestrakjt no eenem onjehuarsomen un wadaspanstjen (jäajen rädent) Volkj». {Jes.65,2}