Read De Bibel JHF Reema 13 Bible Online

Reema 13 - De Bibel JHF bible

Reema 13

¹Jiedre Seel unjaordnet sikj de Rejierungsmacht; dan doa es kjeene Rejierunk (Obrichkjeit), buta (blooss) von Gott, oba dee doa sent, sent von Gott enjesat.

²Doahäa wäa sikj jäajen de Rejierunk stalt, wadasteit de Ordninj Gottes; oba dee doa wadastonen, woaren een Uadeel äwa sikj brinjen.

³Dan de Rejierende sent nich een Schrakj fa daut goode Woakj, sonda fa daut beese. Oba du west die vere Rejierunk nich ferchten? Soo eeft daut Goode, un du woascht von äa jeloft;

⁴dan see es Gottes Deenarin, die toom Gooden. Oba wan du beeset deist, fercht (enjst) die, dan nich emsonst drajcht see daut Schwieet; dan see es Gottes Deenarin, eene Rechtarin toom Stroofen fa dän, dee Beeset deit.

⁵Doarom es daut needich, unjadon to sennen, nich blooss wäajen de Stroof, sonda uk wäajen daut Jewessen.

⁶Dan doawäajen tol jie uk Taks; dan see sent Gottes Deena, dee doamet stendich beschafticht sent.

⁷Jeft aulen (jiedrem), waut an traft: De Taks, däm de Taks, de Zoll, däm de Zoll, de Forcht däm de Forcht, de Iea däm de Iea traft.

⁸Blieft kjeenem waut Schuldich, aus blooss eenaunda to leewen; dan wäa däm aundren leeft, haft daut Jesaz erfelt.

⁹Dan daut: «Du saust nich Ehebräakjen, du saust nich doot moaken (ombrinjen), du saust nich stälen, lot die nich velangen (jankren)», un wan daut een aundret Jeboot jeft (es), woat en disem Wuat toopjefot: «Du saust dien Näakjsten leewen aus die selfst». {3Mos.19,18}

¹⁰De Leew deit däm Näakjsten nuscht Beeset. Aulsoo es de Leew de Erfellunk von daut Jesaz.

¹¹Un dit doot, erkjant de Tiet, daut de Stund aul doa es, daut wie (jie) utem Schlop oppwakjen (oppstonen) sellen; dan nu es onse Radunk noda, aus donn, aus wie jleewent worden (toom Gloowen kjeemen).

¹²De Nacht es väajedrenjt (meist vebie), oba de Dach es dichtbie. Aulsoo, lot ons de Woakjen de Diestanis auflajen un de Woakjen (Jewäaren) vom Licht auntrakjen (aunlajen).

¹³Lot ons aunstendich waundlen, aus aum Dach; nich en Schmoararie un Drinkjen, nich en Onzucht un een onbandjet Läwen fieren (Weltlost), nich em Striet un Aufgonst,

¹⁴sonda trakjt dän Harn Jesus Christus aun, un droacht nich Sorjen fa daut Fleesch to Bejia.