Read De Bibel JHF Reema 14 Bible Online

Reema 14 - De Bibel JHF bible

Reema 14

¹Oba dee Schwake em Gloowen nämt opp (aun), nich toom Wuatstriet äwa Jedanken.

²De eena trut sikj, aules to äten; dee aundra, de schwak es, at Jemies.

³Wäa at, veacht däm nich, dee nich at; un wäa nich at, recht däm nich, dee at; dan Gott haft am aunjenomen.

⁴Wäa best du, dee du, dän eenen framden (aundren sienen) Deena rechst? Hee steit ooda fält däm ieejnen Harn. Oba hee woat stonen bliewen, dan de Har kaun am faust hanstalen.

⁵De eena helt eenen Dach ver däm aundren, oba de aundra helt jiedrem Dach jlikj. Een jiedra oba saul en sienem ieejnen Jewessen (Senn) gaunz äwazeicht sennen.

⁶Wäa acht jeft opp däm Dach, jeft acht en däm Harn. Un wäa at, at däm Harn, dan hee dankt Gott; un wäa nich at, at däm Harn nich, un uk hee dankt Gott.

⁷Dan kjeena, von ons, läft sikj selfst, un kjeena stoaft sikj selfst.

⁸Dan es daut, daut wie läwen, däm Harn läw wie; es daut, daut wie stoawen, wie stoawen däm Harn. Eset nu, daut wie läwen, es daut, daut wie stoawen, soo sent wie em (met däm) Harn.

⁹Dan doatoo es Christus jestorwen un wada läwendich jeworden, om daut hee harscht soo aus äwa de Doodje aus uk äwa de Läwendje.

¹⁰Du oba, waut rechst du dienen Brooda? Ooda uk du, waut veachst du dienen Brooda? Jo, wie woaren aula verem Rechtastool [Christi] Gottes jestalt woaren.

¹¹Dan daut steit jeschräwen: «Soo woa ekj läw, sajcht de Har, mie saul (woat) sikj jiedre Kjnee bieejen, un jiedre Tung saul (woat) Gott bekjanen (preisen)». {Jes.45,23}

¹²Aulsoo, woat nu een jiedra von ons fa sikj selfst Gott Räakjenschoft jäwen.

¹³Aulsoo, lot ons nich mea eenaunda rechten, sonda recht välmea daut; däm Brooda nich eenen Aunstoos ooda een Oajanis to jäwen.

¹⁴Ekj weet un sie äwazeicht en däm Har Jesus, daut nuscht aun sikj selfst onrein es; blooss däm, dee waut fa onrein acht, däm es daut onrein.

¹⁵Oba wan dien Brooda wäajen eene Moltiet (Äten) bedrekjt woat, soo waundelst du nich mea no de Leew. Vedoaw nich met (derch) diene Moltiet däm, fa däm Christus jestorwen es.

¹⁶Soo saul nu jun Goodet nich jelastat woaren.

¹⁷Dan daut Rikj Gottes es nich Äten un Drinkjen, oba Jerajchtichkjeit un Fräd un Freid em Heiljen Jeist.

¹⁸Dan wäa en disem Christus deent, es Gott wooljefaulent un bie Menschen aunerkjant.

¹⁹Aulsoo, lot ons nu däm nosträwen, waut toom Fräd es, un däm, waut eena däm aundren toom Oppbu deent.

²⁰Vedoaw nich wäajen eene Moltiet daut Woakj Gottes. Aules es zwoa rein, oba daut es bees fa däm Mensch, dee met Aunstoos at.

²¹Daut es goot, kjeen Fleesch to äten, noch Wien to drinkjen, noch waut to doonen, aun waut dien Brooda sikj stat (ooda schwak woaren kaun).

²²Hast du Gloowen? Ha am fa die selfst ver Gott. Seelich, wäa sikj selfst nich recht en däm, waut hee goot heeten kaun (waut hee met sienem Jewessen, ver Gott, veauntwuaden kaun).

²³Oba wäa twiewelt, wan hee at, es veuadeelt, wiels hee daut nich ut Gloowen deit. Oba aules, waut nich ut Gloowen passieet (es), es Sind.