Read De Bibel JHF Reema 16 Bible Online

Reema 16 - De Bibel JHF bible

Reema 16

¹Oba ekj beed junt fa Feebe, onse Sesta, dee eene Deenarin de Jemeent en Kenchreä es,

²daut jie ar em Har, jeziement de Heilje, oppnämen un ar biestonen, en de Aunjeläajenheit en dee see junt brukt; dan uk see es eene om väl aundre bekjemmade Fru (Biestona) jewast, uk fa mie selfst.

³Jreest Priszilla un Aquilla, miene Metoabeida en Christus Jesus,

⁴(dee fa mien Läwen äa Hauls hanjehoolen ha, dän nich ekj auleen dank, sonda uk aule Jemeenten de Heiden),

⁵un de Jemeent en äarem Hus. Jreest Epänetus, mienen Jeleewden, dee de Ieeschta en Asien fa Christus es.

⁶Jreest Maria, dee sikj väl fa junt aufjemieecht haft.

⁷Jreest Andronikus un Junias, miene Frintschoft un miene Metjefangne, dee unja de Apostel utjetieekjent sent, dee uk ver mie en Christus wieren.

⁸Jreest Ampliatus, mienen Jeleewden em Har.

⁹Jreest Urbanus, onsen Metoabeida en Christus, un Stachies, mienen Jeleewden.

¹⁰Jreest Apelles, däm Bewäaden en Christus. Jreest dee em Hus von Aristobulus.

¹¹Jreest Herodion, mienen Vewaunten. Jreest dee em Hus von Narzissus, dee em Harn sent.

¹²Jreest Trifäna un Trifosa, dee em Harn oabeiden. Jreest Persis, de Jeleewde, dee sikj väl aufjemieecht haft em Harn.

¹³Jreest Rufus, däm Uterwälden em Harn, un siene un miene Mutta;

¹⁴Jreest Asinkritus, Flegon, Hermas, Patrobas, Hermes un de Breeda bie an;

¹⁵Jreest Filologus, un Julia, Nereus un siene Sesta un Oliempas un aul de Heilje bie an.

¹⁶Jreest eenaunda met däm heiljen Kuss. Daut jreessen junt aule Jemeenten von Christus.

¹⁷Ekj ermon junt oba, Breeda, daut jie acht ha opp dee, de Tranungen (Spoolinj) un Oajanis aunrechten, jäajen de Lia, dee jie jelieet ha, un dreit junt von an auf (wajch).

¹⁸Dan soone (dee) deenen nich onsem Harn [Jesus] Christus, sonda äaren ieejnen Buck, un derch de scheene Räden (seete Wieed) un Schmeichelräd vefieren see de Hoaten de Eenfeltje.

¹⁹Dan jun Jehuarsom es no (to) aule jelangt (bekaunt). Aulsoo ekj frei mie äwa junt; oba ekj well, daut jie Weis (Kluak) sent toom Gooden, oba eenfeltich (onvedorwen) toom Beesen.

²⁰Oba de Frädens Gott woat em korten dän Soton unja june Feet veklunjen. De Jnod von onsen Harn Jesus Christus es met junt!

²¹Daut jreessen junt Timotäus, mien Metoabeida, un Luzius un Jason un Sosipater, miene Frintschoft.

²²Ekj, Tertius, dee ekj däm Breef jeschräwen ha, jrees junt em Harn.

²³Daut jreest junt Gajus, de Huswieet von mie un dee gaunze Jemeent. Daut jreessen junt Erastus, de Stautsvewaulta (Stautskaussenfiera), un de Brooda Kwartus.

²⁴[De Jnod von onsen Harn Jesus Christus es met junt aule! Amen.]

²⁵Oba däm, dee junt stoakjen kaun no miena Vekjindjunk de frooe Bootschoft (Evangelium) un de Vekjindjunk von Jesus Christus, no de Openboarunk vom Jeheemnis, {Efe.3,2-11; 5,32; Kol.1,25-27; 2,2.3} daut en de (vonne) eewje Tieden jeheem (stelljehoolen) wia,

²⁶nu oba jeopenboat un derch de profeetische Schreften, nom Befäl vom eewjen Gott, toom Jehuarsom em Gloowen aule Velkja bekaunt jemoakt (es),

²⁷däm eenen weisen Gott derch Jesus Christus, am es de Harlichkjeit en Eewichkjeit! Amen.