Read De Bibel JHF Reema 3 Bible Online

Reema 3 - De Bibel JHF bible

Reema 3

¹Waut es nu de Väadeel fa däm Jud? Ooda waut nuzt de Beschniedunk?

²Väl, en aule Wäaj. Ieeschtens nämlich, daut see ha de Utsproak Gottes (waut Gott jerät haft) aunvetrut jekjräajen.

³Waut dan? Wan eenje ontru jeworden sent, woat veleicht äare Ontruheit de Tru Gottes tonicht moaken?

⁴Daut mucht nich passieren! Oba Gott es woarhauft, oba jieda Mensch een Läajna, aus jeschräwen steit: «Doamet du aus jerajcht jefungen woascht en diene Wieed, un jewennen woascht, wan du jerecht woascht». {Ps.51,6}

⁵Oba wan onse Ojjerajchtichkjeit, - Gottes Jerajchtichkjeit bewiest, waut sell wie sajen? Es Gott veleicht ojjerajcht, un daut Oaja opplajt (vehenkjt)? (Ekj räd no Menschenoat).

⁶Daut mucht nich passieren! Woo sest kunn Gott de Welt rechten?

⁷Wan oba de Woarheit Gottes derch miene Läajes sikj aus äwagroot erwäsen haft to siena Veharlichunk, wuarom woa ekj uk noch aus Sinda jerecht?

⁸Un wuarom nich, woo wie velastat (vespott) woaren un aus eenje behaupten, daut wie sajen: Lot ons daut Beese doonen, doamet daut Goode kjemt? Äa Vedaumnisuadeel jerajcht es.

⁹Waut dan? Ha wie eenen Väadeel? Derchut nich; dan wie ha verhäa de Aunschuldjunk erhowen (oppjebrocht), daut de Juden aus uk de Griechen aula unja de Sind sent,

¹⁰aus jeschräwen es: «Doa es nich een Jerajchta, uk nich eena;

¹¹doa es kjeena, de vestendich es; doa es kjeena, dee Gott sieekjt.

¹²Aula sent wajch jegonen, see sent aula toop nutzloos jeworden; doa es kjeena, de Goodet deit (eeft), doa es uk nich eena». {Ps.14,1-3}

¹³«Äare Kjäl es een opnet Grauf; met äare Tungen bedroagen see». {Ps.5,10} «Schlangen Jeft es unja äare Leppen». {Ps.140,4}

¹⁴«Äa Mul es voll Flieekjen un Bettanis». {Ps.10,7}

¹⁵«Äare Feet sent schwind, toom Bloot vejeeten;

¹⁶Venichtunk (Vewustunk) un Älent es opp äare Wäaj,

¹⁷un dän Frädenswajch ha see nich erkjant». {Jes.59,7.8}

¹⁸«Doa es kjeene Forcht Gottes (Gottesforcht) ver äare Uagen». {Ps.36,2}

¹⁹Wie weeten oba, daut aules, waut daut Jesaz sajcht, daut rät to dee, dee unja daut Jesaz sent, doamet jiedret Mul jestopt woat un de gaunze Welt ver Gott schuldich es.

²⁰Dan opp Grunt von Jesazeswoakjen woat kjeen Fleesch ver am jerajcht jesproaken woaren; dan derch Jesaz kjemt de Sinden Erkjantnis.

²¹Oba nu es, onen Jesaz, Gottes Jerajchtichkjeit jeopenboat worden, bezeicht derch daut Jesaz un de Profeeten;

²²Gottes Jerajchtichkjeit oba derch Gloowen aun Jesus Christus fa aule Jleewende. Dan doa es kjeen Unjascheet,

²³dan aule ha jesindicht un errieekjen nich de Harlichkjeit Gottes,

²⁴un woaren emsonst jerajchtfoadicht derch siene Jnod, derch de Erleesunk en Jesus Christus;

²⁵däm Gott doajestalt haft aus Jnodenstool (Veseenungsopfa) {3Mos.16,12-15; Heb.4,16} derch dän Gloowen aun sien Bloot, toom Bewies siena Jerajchtichkjeit, wäajen däm Onjestroft loten dee verhäa passieeden (begonen) Sinden, unja de Jedult Gottes;

²⁶toom Bewies siene Jerajchtichkjeit en dise Tiet, daut hee Jerajcht es, un däm rajchtfoadicht, dee em Gloowen aun Jesus es.

²⁷Wua es dan daut puchen (riemen)? Daut es utjeschloten. Derch waut fa een Jesaz? De Woakjen? Nä, oba derch daut Jesaz vom Gloowen.

²⁸Wie meenen nämlich, daut een Mensch derch Gloowen jerajchtfoadicht woat, onen Jesazeswoakjen.

²⁹Ooda es Gott blooss de Juden äa Gott? Nich uk de Heiden? Jo, uk de Heiden,

³⁰wiels daut een eensja Gott es, dee de Beschniedunk ut Gloowen un de Onbeschniedunk derch dän Gloowen rajchtfoadjen woat.

³¹Aulsoo moak wie daut Jesaz tonuscht derch dän Gloowen? Daut mucht nich passieren! Sonda wie rechten daut Jesaz opp.