Read De Bibel JHF Reema 5 Bible Online

Reema 5 - De Bibel JHF bible

Reema 5

¹Aulsoo Jerajchtfoadicht opp Grunt vom Gloowen, ha wie Fräd met Gott derch onsem Harn Jesus Christus,

²derch däm wie uk Toogank jekjräajen ha derch dän Gloowen aun siene Jnod, en dee wie stonen, un wie riemen ons wäajen de Hopninj opp de Harlichkjeit Gottes.

³Oba nich blooss daut, wie riemen ons uk met de Bedrenkjnisen (Triebsaul), daut de Bedrenkjnisen Jedult bewirkjen,

⁴oba de Jedult Erfoarunk, oba de Erfoarunk Hopninj;

⁵oba de Hopninj lat nich to Schaund woaren, wiels de Leew Gottes es en onse Hoaten utjegoten derch dän Heiljen Jeist, dee ons jejäft es.

⁶Dan Christus es, aus wie noch krauftloos wieren, to bestemde Tiet fa Gottloose jestorwen.

⁷Dan wäa woat fa eenen Jerajchten stoawen; oba fa eenen Gooden woacht veleicht wäa to stoawen.

⁸Oba Gott bewiest siene Leew ons doaderch, daut, aus wie noch Sinda wieren, Christus fa ons jestorwen es.

⁹Aulsoo väl mea, nu jerajchtfoadicht derch sien Bloot, woa wie derch am jerat woaren vom Oaja.

¹⁰Dan wan wie, doa wie Fiend wieren, sent wie veseent jeworden met Gott derch däm Doot von sienen Sän, väl mea woa wie, doa wie veseent sent, derch sien Läwen jerat woaren.

¹¹Oba nich blooss dit, sonda wie riemen ons uk met Gott derch onsem Harn Jesus Christus, derch däm wie nu de Veseenunk jekjräajen ha.

¹²Doarom, soo aus derch eenen Mensch de Sind enne Welt nenn jekomen es, un derch de Sind de Doot, un soo no aule Menschen de Doot derchjedrungen es, wiels see aule jesindicht ha;

¹³(den bot daut Jesaz wia Sind enne Welt; oba de Sind woat nich aunjeräakjent, wan kjeen Jesaz es.

¹⁴Oba de Doot harscht von Adam bot Moses, uk äwa dee nich jesindicht hauden enne Jlikjheit de Äwaträdunk Adams, {Hos.6,7} dee een Väabilt vom Tookjinftjen es.

¹⁵Oba nich aus de Äwaträdunk soo uk de Jnodengow, wan nämlich derch däm Eenen (Mensch siene) Äwaträdunk de Väle jestorwen sent, soo es välmea de Jnod Gottes un de Gow en Jnod, dee derch eenen Mensch, Jesus Christus, opp de Väle (väl Menschen) äwastreement jeworden es.

¹⁶Un es daut nich aus derch Eenen, dee jesindicht haft, uk de Gow (Jnod)? Dan daut Uadeel wia von eenem to Veuadeelunk, oba de Jnodengow von väle Äwaträdungen to Rajchtfoadjunk.

¹⁷Dan wan derch de Äwaträdunk von Eenem de Doot derch däm Eenen jeharscht haft, soo woaren välmea dee, dee Äwafluss de Jnod un de Gow de Jerajchtichkjeit kjrieen, em Läwen harschen derch däm Eenen, Jesus Christus);

¹⁸aulsoo nu, aus daut derch eene Äwaträdunk jäajen (äwa) aule Menschen to Veuadeelunk kjeem, soo uk derch eene Jerajchtichkjeit jäajen (fa) aule Menschen to Rajchtfoadjunk toom Läwen fieed.

¹⁹Dan soo aus derch däm eenen Mensch sien Ojjehuarsom dee Väle (Menschen) to Sinda jeworden sent, soo woaren uk derch däm Jehuarsom von Eenem de Väle aus Jerajchte hanjestalt woaren.

²⁰Oba daut Jesaz kjeem doatoo nenn, soo daut de Äwaträdunk tooneem, oba woo de Sind toojenomen haft, es de Jnod em Äwafluss nenjekomen,

²¹doamet, soo aus de Sind jeharscht haft em Doot, soo uk de Jnod harscht derch Jerajchtichkjeit toom eewjen Läwen derch Jesus Christus, onsem Harn.