Read De Bibel JHF Reema 6 Bible Online

Reema 6 - De Bibel JHF bible

Reema 6

¹Waut sell wie dan sajen? Sell wie enne Sind bliewen, doamet de Jnod toonemt?

²Daut mucht nich passieren! Dee wie, dee de Sind jestorwen sent, woo sell wie noch en äa (Sind) läwen?

³Ooda weet jie nich, daut wie aula, dee wie opp Jesus Christus jedeept worden sent, opp (en) sienem Doot jedeept worden sent?

⁴Aulsoo sent wie met am begroft worden derch daut deepen en däm (oppem) Doot, om daut, soo aus Christus vonne Doodje oppjestonen (oppjewakjt) es derch de Harlichkjeit vom Voda, soo uk wie em nieen Läwen waundlen.

⁵Dan wan wie met am eentjemoakt (toopjewossen) sent en de Änlichkjeit von sienem Doot, oba dan woa wie daut uk em Oppstonen vom Doot sennen,

⁶endäm wie weeten, daut ons oola Mensch es metjekjriezicht worden, doamet de Lief de Sind woat tonicht jemoakt, soo daut wie de Sind nich mea deenen.

⁷Dan wäa jestorwen es, es vonne Sind friejesproaken.

⁸Oba wan wie met Christus jestorwen sent, soo jleew wie, daut wie uk met am läwen woaren,

⁹doa wie weeten, daut Christus, vonne Doodes oppjestonen es, nich mea stoaft; de Doot harscht nich mea äwa am.

¹⁰Dan waut sienen Doot betraft, hee es een fa aulemol de Sinden jestorwen; waut hee oba läft, läft hee Gott.

¹¹Soo uk jie, hoolt junt de Sind fa doot, oba läwen fa Gott en Christus Jesus.

¹²Aulsoo, saul de Sind nich harschen en junem stoaflichen Lief, om siene Lost to jehorchen;

¹³un stalt uk nich june Jläda de Sind aus Jereetschoft de Ojjerajchtichkjeit; oba stalt junt selfst Gott doa (han) aus Läwendje ute (vonne) Doodje, un june Jläda Gott to Jereetschoft de Jerajchtichkjeit.

¹⁴Dan de Sind woat nich äwa junt harschen, dan jie sent nich unja daut Jesaz, oba unja de Jnod.

¹⁵Waut dan? Sell wie sindjen, wiels wie nich unja daut Jesaz, oba unja Jnod sent? Daut saul nich passieren!

¹⁶Weet jie nich, daut, wäm jie junt hanjäwen aus Kjnajchts toom Jehuarsom, jie däm siene Kjnajchts sent, däm jie jehorchen? Entwäda de Sind toom Doot, ooda Jehuarsom to Jerajchtichkjeit?

¹⁷Oba Gott sei Dank, doafäa, daut jie Kjnajchts de Sind wieren, oba von Hoaten jehuarsom jeworden sent däm Väabilt (de Form) de Lia, aun wäm jie sent äwajeft worden!

¹⁸Oba friejemoakt von de Sind, un sent Deena de Jerajchtichkjeit jeworden.

¹⁹Ekj räd menschlich, wäajen de Schwakheit en jun Fleesch. Dan soo aus jie june Jläda em Deenst de Orreinichkjeit un de Jesazloosichkjeit jestalt ha, soo stalt nu june Jläda em Deenst de Jerajchtichkjeit to Heilichkjeit.

²⁰Dan aus jie Kjnajchts de Sind wieren, donn wia jie frie vonne Jerajchtichkjeit.

²¹Waut vonne Frucht haud jie donn von de Dinj, äwa dee jie junt nu schämen? Dan daut Enj von dee es de Doot.

²²Nu oba, von de Sind friejemoakt un Gott deenent jeworden, ha jie june Frucht to Heilichkjeit, oba aus daut Enj eewjet Läwen.

²³Dan de Loon de Sind es de Doot, oba de Jnodengow Gottes es eewjet Läwen en Christus Jesus, onsem Harn.