Read De Bibel JHF Reema 7 Bible Online

Reema 7 - De Bibel JHF bible

Reema 7

¹Ooda weet jie nich, Breeda - dan ekj räd to dee, dee daut Jesaz kjanen - dautet Jesaz äwa däm Mensch harscht, soo lang hee läft?

²Dan de befriede Fru es derch daut Jesaz aum Maun jebungen, soolang hee läft; oba wan de Maun jestorwen es, soo es see loosjebungen von daut Jesaz daut ar aun äaren Maun bunk.

³Aulsoo nu, wan de Maun läft, eene Ehebräakjarin jenant, wan see eenem aundren Maun siene woat; oba wan de Maun stoaft, dan es see frie vom Jesaz, soo daut see nich eene Ehebräakjarin es, wan see eenem aundren Maun siene woat.

⁴Aulsoo, miene Breeda, däm Jesaz doot jeworden derch dän Lief Christus, om eenem aundren (sien to woaren) aun to jehieren, däm, dee vonne Doodes oppjestonen es, doamet wie Gott Frucht brinjen.

⁵Dan aus wie em Fleesch wieren, wirkjten de Liedenschoften de Sinden, dee derch daut Jesaz sent, en onse Jläda, om däm Doot Frucht to brinjen.

⁶Nu oba sent wie vom Jesaz loosjebungen, däm jestorwen, en däm wie faustjehoolen worden, soo daut wie deenen em Nieen vom Jeist un nich em oolen tostaund de Buakstow.

⁷Waut sell wie dan sajen? Es daut Jesaz Sind? Daut mucht nich passieren! Oba de Sind haud ekj nich erkjant, aus blooss derch Jesaz. Dan vonne Lost haud ekj nich jewist, wan daut Jesaz nich jesajcht haud: «Lot die nich jankren (jelesten)».

⁸Oba de Sind, neem derch daut Jeboot eene Jeläajenheit, bewirkjt en mie jiedret Velangen (Lost); dan onen Jesaz es de Sind doot.

⁹Oba ekj läwd eenst onen Jesaz; oba aus daut Jesaz kjeem, läwd de Sind opp;

¹⁰ekj oba storf. Un daut Jeboot, daut toom Läwen jejäft es, krakjt dit brinjt mie toom Doot.

¹¹Dan de Sind, neem Jeläajenheit derch daut Jeboot, bedruach mie un brocht mie derch daut selwje om.

¹²Aulsoo es daut Jesaz heilich un daut Jeboot heilich un jerajcht un goot.

¹³Es aulsoo daut Goode mie toom Doot jeworden? Daut mucht nich passieren! Oba de Sind, om daut see aus Sind erschient (väakjemt), endäm see derch daut Goode mie däm Doot bewirkjt, doamet de Sind em Äwamot sindich woat, derch daut Jeboot.

¹⁴Dan wie weeten, dautet Jesaz jeistlich es, oba ekj sie fleeschlich, unja (aune) de Sind vekoft;

¹⁵dan waut ekj vollbrinj, weet ekj nich; dan nich, waut ekj well, daut doo ekj, sonda waut ekj hauss, daut doo ekj.

¹⁶Oba wan ekj daut, waut ekj nich well doo, stemm ekj met daut Jesaz too, dautet goot es.

¹⁷Oba nu vollbrinj nich mea ekj daut selje, oba dee en mie wonende Sind.

¹⁸Dan ekj weet, daut en mie, daut es en mien Fleesch, nuscht goodet wont; dan dän Wellen ha ekj, oba daut Vollbrinjen von daut Goode jelinjt mie nich.

¹⁹Dan daut Goode, daut ekj well, doo ekj nich, oba daut Beese, daut ekj nich well, daut doo ekj.

²⁰Oba wan ekj daut, waut ekj nich well doo, soo vollbrinj nich mea ekj daut selje, oba dee en mie wonende Sind.

²¹Aulsoo finj ekj daut Jesaz fa mie, dee ekj daut Goode doonen well, dautet Beese bie mie es.

²²Dan ekj ha Freid (jefaulen) aun däm Jesaz Gottes nom ennalichen Mensch;

²³oba ekj see een aundret Jesaz en miene Jläda, daut däm Jesaz miena Venunft doajäajen stritt un mie en Jefangenschoft brinjt unja daut Jesaz de Sind, daut en miene Jläda es.

²⁴Ekj onjlekjelja (älendja) Mensch! Wäa woat mie raden von (ut) dit Doodeslief?

²⁵Oba ekj dank Gott derch Jesus Christus, onsem Harn! Aulsoo nu deen ekj selfst met Venunft däm Jesaz Gottes, met däm Fleesch oba däm Jesaz de Sind.