Read De Bibel JHF Reema 8 Bible Online

Reema 8 - De Bibel JHF bible

Reema 8

¹Aulsoo es nu kjeene Vedaumnis fa dee en Christus Jesus sent.

²Dan daut Jeistesjesaz brinjt mie Läwen en Christus Jesus, haft mie frie jemoakt von daut Jesaz de Sind un vom Doot.

³Dan daut däm Jesaz Ommäajelje, wiels et derch daut Fleesch schwak wia, deed Gott, endäm hee, sienen ieejnen Sän en Jlikjheit vom Fleesch de Sind un fa dee Sind schekjt, de Sind em Fleesch veuadeeld,

⁴doamet de Rajchtfoadjunk von daut Jesaz erfelt wort en ons, dee nich nom Fleesch, sonda nom Jeist waundlen.

⁵Dan dee, dee nom Fleesch sent (läwen), sennen no daut, waut Fleeschlich es; dee oba, nom Jeist sent (läwen), opp daut, waut vom Jeist es.

⁶Dan de Jesennunk vom Fleesch es de Doot, de Jesennunk vom Jeist oba es Läwen un Fräd;

⁷wiels de Jesennunk vom Fleesch es Fientschoft jäajen Gott, dan dee (Jesennunk) es däm Jesaz Gottes nich unjadon, dan dee kaun daut uk nich.

⁸Oba dee em Fleesch sent, kjennen Gott nich jefaulen.

⁹Jie oba sent nich em Fleesch, sonda em Jeist, wan aundasch de Jeist Gottes en junt wont. Oba wan wäa Christi Jeist nich haft, dee es nich von am.

¹⁰Wan oba Christus en junt es, soo es de Lief zwoa doot wäajen de Sind, dee Jeist oba es Läwen en Jerajchtichkjeit.

¹¹Oba wan de Jeist, dee Jesus vonne (ute) Doodes oppjewakjt haft, en junt wont, soo woat hee, dee Christus vonne (ute) Doodes oppjewakjt haft, uk june stoafliche Liew (Kjarpasch) läwendich moaken derch sienen en junt wonenda Jeist.

¹²Aulsoo nu, Breeda, sent wie nich däm Fleesch Schildna, om nom Fleesch to läwen,

¹³dan wan jie nom Fleesch läwen, soo woa jie stoawen, oba wan jie derch däm Jeist de beese Woakjen vom Lief dootmoaken, woa jie läwen.

¹⁴Dan aule, dee sikj vom Jeist Gottes leiden loten, daut sent Säns Gottes.

¹⁵Dan jie ha nich eenen Jeist de Kjnajchtschoft jekjräajen, wada en Angst to läwen, oba eenen Jeist de Sänschoft ha jie jekjräajen, en däm wie roopen: Abba, Voda!

¹⁶De Jeist selfst zeicht met onsem Jeist, daut wie Kjinja Gottes sent.

¹⁷Oba wan Kjinja, dan uk Oawen; sonda Oawen Gottes un Metoawen Christi, wan wie aundasch metlieden, om daut wie uk met [am] veharlicht woaren.

¹⁸Ekj meen nämlich, daut de Lieden en dise Tiet nich wieet sent, vejlikjt to woaren met de tookjinftje Harlichkjeit, dee aun ons saul openboa woaren.

¹⁹Dan daut Bangen (jespaunde) Luaren de Erschaufunk (Kjreatua) luat opp daut Openboawoaren de Säns Gottes.

²⁰De Erschaufunk es de Vejenkjlichet unjadon jeworden, (nich friewellich, sonda derch däm, dee äa unjadon jemoakt haft), opp Hopninj,

²¹wiels uk selfst de Erschaufunk woat frie jemoakt woaren vonne Kjnajchtschoft de Vedoawnis to Frieheit de Harlichkjeit de Kjinja Gottes.

²²Dan wie weeten, daut de gaunze Erschaufunk met seft (stänt) un met en Weedoag licht bat nu.

²³Oba nich blooss dee, oba uk wie selfst, dee wie de ieeschte Gow vom Jeist ha, uk wie selfst seften en ons selfst, luaren oppe Sänschoft; de Erleesunk von onsem Lief.

²⁴Dan opp Hopninj sent wie jerat worden. Oba eene Hopninj, dee jeseenen woat, es kjeene Hopninj; dan waut eena sitt, wäa hopt noch doaropp?

²⁵Oba wan wie daut hopen, waut wie nich seenen, dan lua wie met Jedult.

²⁶Oba krakjt soo nemt uk de Jeist sikj onse Schwakheit aun; dan wie weeten nich, waut wie bäden sellen, aus et sikj jehieet, oba de Jeist selfst sticht beddent fa ons en, met Seften waut nich uttospräakjen jeit.

²⁷Oba dee de Hoaten erforscht, weet, waut däm Jeist sien Senn es, dan hee sticht fa de Heilje Gottes en.

²⁸Wie weeten oba, daut dän, dee Gott leef ha, aules toom Gooden metwirkjt, dee no Gottes Aufsecht beroopen sent.

²⁹Dan dee hee verhäa jewält haft, dee haft hee uk verhäa bestemt, däm Bilt von sienem Sän änlich to sennen, doamet hee de Ieeschtjebuarna es unja väle Breeda.

³⁰Oba dee hee verhäa bestemt haft, dise haft hee uk beroopen; un dee hee beroopen haft, dee haft hee uk jerajcht jesproaken, oba dee hee jerajcht jesproaken haft, dee haft hee uk veharlicht.

³¹Waut sell wie nu doatoo sajen? Wan Gott fa ons es, wäa jäajen ons?

³²Hee, dee doch sienen ieejnen Sän nich veschoont haft, sonda am fa ons aula hanjejäft haft; woo wudd hee ons met am nich uk aules schenkjen?

³³Wäa woat jäajen Gottes Uterwälde ne Aunkloag erhäwen? Gott es, dee Jerajcht sprakjt;

³⁴wäa es, dee vedaumt? Christus [Jesus] es daut, dee jestorwen, jo, noch mea, dee uk oppjestonen (oppjewakjt), dee uk to Rajchte (Haunt) Gottes es, dee [uk] fa ons ensteit.

³⁵Wäa woat ons tranen vonne Leew Christi? Bedrenkjnis ooda Angst ooda Vefoljunk ooda Hungaschnoot ooda Noaktheit ooda Jefoa ooda Schwieet?

³⁶Aus jeschräwen steit: «Dient haulwen woa wie dän gaunzen Dach dootjemoakt; wie sent aunjeseenen aus Schlachtschop». {Ps.44,23}

³⁷Oba en aul dise Dinj droag wie dän Siech doavon, derch dän, dee ons jeleeft haft.

³⁸Dan ekj sie äwazeicht, daut wäda Doot noch Läwen, wäda Enjel noch Macht, wäda Jäajenwuat noch Tookjinftjet, noch Jewaulten,

³⁹wäda Huach noch Deep, noch irjent een aundret Erschaufte (Kjreatua) ons tranen kjennen woat vonne Leew Gottes, dee en Christus Jesus es, onsem Harn.