Read De Bibel JHF 1. Korinta 11 Bible Online

1. Korinta 11 - De Bibel JHF bible

1. Korinta 11

¹Woat miene Nofolja (nämt mie toom Väabilt, Biespel), aus uk ekj Christus.

²Oba ekj low junt, daut jie en aulen Dinj aun mie denkjen un aun de Lia fausthoolen, soo aus ekj dee junt jejäft ha.

³Oba ekj well, daut jie weeten, daut de Christus daut Haupt von eenem jiedren Maun es, de Fru äa Haupt oba de Maun, oba daut Haupt Christi es Gott.

⁴Jiedra Maun, dee bät ooda profeetisch rät (prädicht), endäm hee waut oppem Haupt (Kopp bedakjt) haft, beschämt sien Haupt.

⁵Oba jiedre Fru, dee bät ooda profeetisch rät met onbedakjtem Haupt, beschämt äa Haupt; dan daut es een un daut selje, aus wan see jeschoaren wia.

⁶Aulsoo, wan eene Fru nich bedakjt es, soo lot (woat) ar uk daut Hoa aufschnieden; oba wan daut fa eene Fru ne Schaund es, daut ar de Hoa aufjeschnäden ooda see jeschoaren woat, soo saul see sikj bedakjen.

⁷Dan de Maun oba saul nich daut Haupt bedakjen, doa hee Gottes Bilt un Harlichkjeit es; oba de Fru es däm Maun siene Harlichkjeit.

⁸Dan de Maun es nich vonne Fru, sonda de Fru vom Maun;

⁹dan de Maun wort uk nich wäajen de Fru jeschaufen, sonda de Fru wäajen däm Maun.

¹⁰Doawäajen saul de Fru eene Macht oppem Haupt ha, om de Enjel haulwen.

¹¹Dannoch es de Fru onen däm Maun, noch de Maun onen de Fru em Harn.

¹²Dan soo aus de Fru vom Maun es, soo es uk de Maun derch de Fru; oba aules es von Gott.

¹³Uadeelt bie junt selfst: Jeziemt sikj daut, daut eene Fru onbedakjt to Gott bät?

¹⁴Ooda lieet junt nich uk selfst de Natua, daut, wan een Maun langet Hoa haft, daut eene Oniea fa am es?

¹⁵Oba wan eene Fru langet Hoa haft, daut eene Iea fa äa es? Dan daut Hoa es äa enne Städ een Schleia jejäft.

¹⁶Oba wan wäa meent, väasajrich (zenkjisch) to sennen, soo ha wie nich soone Jewanheit, uk nich de Jemeenten Gottes.

¹⁷Oba endäm ekj dit väaschriew, low ekj nich, daut jie nich toom Bätren, sonda toom Schlajchtren toop komen.

¹⁸Dan ieeschtens, wan jie aus Jemeent toop komen, hia ekj, daut Spoolinjen unja junt sent, un toom Deel jleew ekj daut.

¹⁹Dan doa motten uk Parteien mank junt sennen, om daut de Väabiltelje (Jerajchtfoadijde) mank junt openboa woaren.

²⁰Wan jie nu aun eenem Uat toop komen, soo es daut nich daut Harn Mol to äten.

²¹Dan een jiedra nemt biem Äten verhäa sien ieejnet Mol, un de eena es hungrich, de aundra es bedrunken.

²²Ha jie dan nich Hiesa, om to äten un to drinkjen? Ooda veacht jie de Jemeent Gottes un beschämen dee, dee nuscht ha? Waut saul ekj junt sajen? Saul ekj junt lowen? En disem low ekj junt nich.

²³Dan ekj ha vom Harn emfangen, waut ekj junt äwajäft ha, daut de Har Jesus en de Nacht, en dee hee utjeleewat wort, Broot neem,

²⁴un aus hee jedankt haud, daut bruak un säd: Dit es mien Lief, dee fa junt es; dit doot to mienem Jedajchnis.

²⁵Krakjt soo uk daut Kuffel (däm Drunk) nom Mol un säd: Dis Kuffel (Drunk) es de niee Bunt en mienem Bloot; dit doot, soo foaken jie drinkjen, to mienem Jedajchnis.

²⁶Dan soo foaken jie dit Broot äten un daut Kuffel drinkjen, vekjindj jie dän Doot vom Harn, bot hee kjemt.

²⁷Doahäa, wäa nich wieetvoll daut Broot at ooda dän Kuffel vom Harn drinkjt, woat schuldich sennen aum Lief un aum Bloot vom Harn.

²⁸Oba de Mensch saul sikj selfst proowen, un aulsoo at hee von däm Broot un drinkjt von daut Kuffel.

²⁹Dan wäa onwirdich at un drinkjt, at un drinkjt sikj selfst toom Jerecht, endäm hee dän Lief nich rajcht beuadeelt.

³⁰Doawäajen sent mank junt väl Schwake un Kranke, un een goodet Deel schlopen (sent enjeschlopen).

³¹Oba wan wie ons selfst rajcht beuadeelen, soo wudd wie nich jerecht woaren.

³²Oba wan wie vom Harn jerecht woaren, soo woa wie jestroft, doamet wie nich met de Welt veuadeelt woaren.

³³Doahäa, miene Breeda, wan jie toopkomen, om to äten, soo wacht opp eenaunda.

³⁴Wan wäm hungat, dee at tus, doamet jie nich toom Jerecht toopkomen. Oba daut äwaje well ekj aunorden, sooboolt ekj kom.