Read De Bibel JHF 1. Korinta 13 Bible Online

1. Korinta 13 - De Bibel JHF bible

1. Korinta 13

¹Wan ekj met de Sproaken (Tungen) de Menschen un de Enjel räd, oba nich Leew ha, soo sie ekj een kjlinjendet Koppa (Messinkj) jeworden ooda eene kjlinjende Zimbel.

²Un wan ekj de Gow to profezeien ha un aule Jeheemnisen un aule Erkjantnis weet, un wan ekj aulen Gloowen ha, soo daut ekj Boaj vesaten kunn, oba nich Leew ha, soo sie ekj nuscht.

³Un wan ekj aul mien Hab un Goot toom Äten fa de Oame häajeef, un wan ekj mien Lief hanjäw, doamet ekj mie riemen kunn, [ooda om daut ekj vebrent woa], oba nich Leew ha, soo es daut mie nich toom nutzen.

⁴De Leew helt lang ut, de Leew es leeftolich; de Leew es nich aufjenstich; de Leew prolt (pucht) nich, see blost sikj nich opp,

⁵see es nich onaunstendich, see sieekjt nich daut äaje, see lat sikj nich reizen (vebetren), see räakjent daut Beese nich aun,

⁶see freit sikj nich äwa de Ojjerajchtichkjeit, oba see freit sikj met de Woarheit,

⁷see vedrajcht aules, see jleeft aules, see hopt aules, see duldt aules.

⁸De Leew vejeit niemols; sent daut oba profeetische Räden, dee woaren wajch jedonen (opphieren) woaren; sent daut Sproaken (Tungenräden), see woaren opphieren; es daut Erkjantnis, see woaren wajch jedonen woaren.

⁹Dan wie erkjanen stekjawies, un wie profezeien stekjawies;

¹⁰oba wan daut Vollkomne jekomen sennen woat, soo woat daut, waut stekjawies es, wajch jenomen woaren.

¹¹Aus ekj een Kjint wia, räd ekj aus een Kjint, docht aus een Kjint, uadeeld aus een Kjint; aus ekj een Maun wort, deed ekj wajch, waut kjindisch wia.

¹²Dan wie seenen nu derch eenen Spieejel, en een Rotsel (ondietlich), oba dan von Aunjesecht to Aunjesecht. Nu erkjan ekj stekjawies, oba dan woa ekj erkjanen, soo aus uk ekj erkjant worden sie.

¹³Oba nu blift Gloowen, Hopninj, Leew, dise 3; oba de jratstet von dise es de Leew.