Read De Bibel JHF 1. Korinta 14 Bible Online

1. Korinta 14 - De Bibel JHF bible

1. Korinta 14

¹Sträft no de Leew; oba iewat om de jeistliche Gowen, oba välmea, daut jie profeetisch räden.

²Dan wäa en eene Sproak (en Tungen) rät, rät nich to Menschen, sonda to Gott; dan kjeena vesteit (hieet) daut, oba em (derch däm) Jeist rät hee Jeheemnisen.

³Oba wäa profeetisch rät, rät to de Menschen toom Oppbuen un Ermonunk un toom Troost.

⁴Wäa en eene Sproak rät, but sikj selfst opp; oba wäa profeetisch rät but de Jemeent opp.

⁵Oba ekj well, daut jie aula en Sproaken (met aundre Tungen) räden, oba välmea, daut jie profeetisch räden. Oba wäa profeetisch rät, es jrata, aus wäa en Sproaken rät, buta wan hee utlajcht, doamet de Jemeent oppjebut woat.

⁶Oba nu, Breeda, wan ekj no junt kom un en Sproaken räd, waut woa ekj junt nutzen, wan ekj nich to junt räd, entwäda en Openboarunk ooda en Erkjantnis ooda en Profezeiunk ooda enne Lia?

⁷Doch uk de doodje Dinj, dee eenen Toon von sikj jäwen, auf ne Fleet ooda Hoap, wan see de Teen kjeenen Unjascheet jäwen, woo woat maun erkjanen, waut jeblost ooda jespält woat?

⁸Dan wan uk de Trompeet eenen ondieteljen Toon jeft, wäa woat sikj toom Kaumf reed moaken?

⁹Soo uk jie, wan jie derch de Sproak nich eene dietelje Räd (von junt) jäwen, woo woat maun weeten, waut jerät woat? Dan jie woaren enne Loft (Wint) nenn räden.

¹⁰Daut jeft veleicht soo un soo väle Oaten von Stemmen (Sproaken) enne Welt, un kjeene Oat es onen bestemden Toon.

¹¹Aulsoo wan ekj de Bediedinj (Macht) de Stemm nich weet (kjan), soo woa ekj däm Rädna een Utlenda sennen, un de Rädna fa mie een Utlenda.

¹²Soo uk jie, doa jie om jeistliche Gowen iewrich sent, soo sieekjt, daut jie äwavoll sent toom oppbuen de Jemeent.

¹³Doawäajen, wäa en eene Sproak rät, bedd daut hee daut utlajen (äwasaten) kaun.

¹⁴Dan wan ekj en eene aundre Sproak bäd, soo bäd mien Jeist, oba mien Vestaunt es fruchtloos.

¹⁵Aulsoo waut es daut? Ekj well met däm Jeist bäden, oba ekj well uk met däm Vestaunt bäden; ekj well em Jeist sinjen, oba ekj well uk met däm Vestaunt sinjen.

¹⁶Dan wan du em Jeist lowen un danken woascht, woo saul dee, dee dän Plauz vom Onjelieeden (Eenfeltjen) ennemt, daut Amen sajen to dien Dankjebäd, doa hee nich weet, waut du sajchst?

¹⁷Dan du sajchst zwoa daut Dankjebäd goot, oba de aundra woat nich oppjebut.

¹⁸Ekj dank Gott, ekj räd mea en Sproaken aus jie aula.

¹⁹Oba enne Jemeent well ekj leewa fief Wieed räden met mienem Vestaunt, doamet ekj uk aundre unjarechten doo, aus 10 000 Wieed en eene aundre Sproak.

²⁰Breeda, woat nich Kjinja em Vestaunt (Denkjen, Senn), sonda en Boosheit (Schlajchtichkjeit) siet Kjinja, oba em Denkjen siet (woat) riep (Vollkomnen).

²¹Em Jesaz steit jeschräwen: «Ekj well en aundre Sproaken un derch aundre Leppen to dit Volkj räden, un uk soo woaren see nich opp mie hieren, sajcht de Har». {Jes.28,11.12}

²²Doahäa sent de aundre Sproaken to een Tieekjen, nich dän Jleewenden, sonda dän Onjleewenden; oba daut profeetische Räden nich fa de Onjleewende, sonda fa de Jleewende.

²³Wan aulsoo de gaunze Jemeent aun eenem Uat toop kjemt un aule en aundre Sproaken räden, un doa komen Onweetende ooda Onjleewende nenn, woaren see nich sajen, daut jie von Sennen sent?

²⁴Oba wan aula profeetisch räden, un irjent een Onjleewenda ooda Onweetenda nenn kjemt, soo woat hee von aule äwazeicht, von aule beuadeelt;

²⁵daut Vestoakne en sien Hoat waut openboa, un soo, opp sien Aunjesecht faulen, woat hee Gott aunbäden un vekjindjen woat, daut Gott werkjlich mank junt es.

²⁶Aulsoo waut es, Breeda? Wan jie toopkomen, soo haft een jiedra [von junt] eenen Psalm, haft eene Lia, haft eene Openboarunk, haft eene Sproak, haft eene Utlajunk; aules saul toom oppbuen deenen.

²⁷Wan wäa en eene Sproak rät, soo saul daut twee ooda hechstens dree un hinjarenaunda, un eena laj ut (äwasat).

²⁸Oba wan doa kjeen Utlaja es, soo saul hee en de Jemeent stell sennen, oba hee rät to sikj selfst un to Gott.

²⁹Oba Profeeten sellen twee ooda dree räden, un dee aundre sellen uadeelen.

³⁰Oba wan eenem aundrem, dee doa sett, eene Openboarunk toojedeelt woat, soo saul de ieeschta stell sennen.

³¹Dan jie kjennen eena nom aundren aula profeetisch räden, doamet aula lieren un aula ermont (jetreest) woaren.

³²Un de Jeista (de Jeistesgowen) de Profeeten sent de Profeeten unjadon.

³³Dan Gott es nich een Gott de Onordninj, sonda von Fräd. Aus en aule Jemeenten de Heilje.

³⁴[June] Frues sellen enne Jemeenten (Vesaumlungen) stell sennen; dan daut es an nich erlaubt to räden, sonda see sellen unjadon sennen, soo aus uk daut Jesaz sajcht.

³⁵Oba wan see waut lieren wellen, soo sellen see tus äare ieejne Mana froagen; dan daut es eene Schaund fa eene Fru, en de Jemeent to räden.

³⁶Ooda es daut Wuat von junt utjegonen? Ooda es daut to junt auleen jekomen?

³⁷Wan wäa meent, een Profeet to sennen ooda jeistlich Begowda, soo saul hee erkjanen, waut ekj junt schriew, dautet een Jeboot vom Harn es.

³⁸Oba wan wäa onweetent es (daut nich aunerkjant), soo saul hee onweetent sennen (woat hee nich aunerkjant).

³⁹Doahäa, miene Breeda, siet iewrich om profeetisch to Räden, un hindat nich, daut Räden en Sproaken.

⁴⁰Oba aules passieet aunstendich un en Ordninj.