Read De Bibel JHF 1. Korinta 16 Bible Online

1. Korinta 16 - De Bibel JHF bible

1. Korinta 16

¹Oba waut de Jeltsaumlunk (Kollakjten) fa de Heilje betraft; soo aus ekj de Jemeenten en Galatien aunjeordnet ha, soo doot uk jie.

²Aun jiedrem ieeschten Dach de Wäakj laj een jiedra von junt bie sikj auntsied (trigjlajen) un saumelt, waut emma hee emstaunt es, doamet nich, wan ekj kom, ieescht dan eene Jeltsaumlunk jemoakt woat.

³Oba wan ekj aunjekomen sie, soo well (woa) ekj dee, dee jie fa opprechtich (tru) hoolen, met Breew schekjen, daut see june Gow no Jerusalem hanbrinjen.

⁴Wan daut oba de Sach wieet es, daut uk ekj hanreis, sellen see met mie reisen.

⁵Oba ekj woa no junt komen, wan ekj Mazedonien derch jereist ha, dan ekj reis derch Mazedonien.

⁶Oba veleicht woa ekj bie junt bliewen ooda uk äwawintren, doamet jie mie bejleiten, wuahan ekj reisen woa;

⁷dan ekj well junt nu nich oppe Derchreis seenen, dan ekj hop, eene Tiet bie junt to bliewen, wan de Har daut erlaubt.

⁸Oba ekj woa bot Pinjsten en Efesus bliewen,

⁹dan eene Däa es mie opjedonen, eene groote un wirkjsome, un doa sent väl Wadastona (Jäajna).

¹⁰Oba wan Timotäus kjemt, soo paust opp, daut hee onen Angst sikj bie junt befinjen kaun; dan hee wirkjt aum Woakj daut Harn, aus uk ekj.

¹¹Aulsoo kjeena saul am veachten. Oba bejleit am välmea en Fräd, doamet hee no mie kjemt; dan ekj lua opp am met de Breeda.

¹²Oba waut däm Brooda Apollos betraft, soo ha ekj am välmol jebedd (toojerät), daut hee met de Breeda no junt komen sull (kjemt); doch hee wia derchut nich wellich, nu to komen, oba hee woat komen, wan hee de Jeläajenheit finjt.

¹³Woakt, stot faust em Gloowen, siet menlich, woat (siet) stoakj!

¹⁴Aules bie (von) junt passieet (saul jedonen woaren) en Leew.

¹⁵Ekj ermon junt oba, Breeda: Jie kjanen daut Hus von Stefanas, dautet de Ieeschta von Achaja es, un daut see sikj selfst de Heilje toom Deenst jestalt ha;

¹⁶daut uk jie junt soone unjaordnen un jiedrem, dee metwirkjt un sikj aufmieecht.

¹⁷Ekj freid mie oba äwa de Toojäajenheit von Stefanas un Fortunatus un Achaikus, wiels dise ha oppjefelt, waut junt fäld.

¹⁸Dan see ha mienen un junem Jeist erfrescht (oppjemuntat); aulsoo erkjant soone Oabeida aun.

¹⁹Daut jreessen junt de Jemeenten en Asien. Daut jreessen junt välmol em Harn Aquilla un Priszilla, met de Jemeent en äa Hus.

²⁰Aule Breeda loten junt jreessen. Jreest eenaunda met däm heiljen Kuss.

²¹De Gruss, met miene, Paulus, Haunt.

²²Wan wäa däm Harn [Jesus Christus] nich leef haft, dee es veflucht! Maranata! (dee Har kjemt)

²³De Jnod vom Harn Jesus [Christus] es met junt!

²⁴Miene Leew es met junt aulem en Christus Jesus! [Amen].