Read De Bibel JHF 1. Korinta 2 Bible Online

1. Korinta 2 - De Bibel JHF bible

1. Korinta 2

¹Un aus ekj, no junt kjeem, Breeda, sie nich jekomen, em Äwamot von Wieed (Räden) ooda Weisheit, junt daut Jeheemnis (Zeichnis) Gottes to vekjindjen.

²Dan ekj haud nich beschloten, waut mank junt to weeten, aus blooss Jesus Christus un zwoa dän jekjriezichten.

³Un ekj wia bie junt en Schwakheit un en Angst un en väl Zetren;

⁴un miene Räd un miene Vekjindjunk wia nich en Weisheitswieed om junt to beräden, sonda em Bewiesen vom Jeist un de Krauft,

⁵doamet jun Gloowen nich opp Grunt de Weisheit von Menschen es, sonda opp Grunt de Krauft Gottes.

⁶Oba wie räden Weisheit mank de Vollkomne (Riepe), un zwoa Weisheit nich dise Welt, uk nich de Harscha dise Welt, dee venicht woaren,

⁷sonda wie räden Gottes Weisheit en eenem Jeheemnis, dee vestoakne, dee Gott verhäa bestemt haft, ver de Eewichkjeit, to onse Harlichkjeit;

⁸dee kjeena von de Harscha dise Welt erkjant haft; (dan wan see daut erkjant hauden, soo hauden see dän Harn de Harlichkjeit nich jekjriezicht),

⁹sonda aus jeschräwen steit: «Waut kjeen Uag jeseenen un kjeen Ua jehieet haft un en kjeen Menschenhoat jekomen es, waut Gott reed jemoakt (jeschaufen) haft fa dän, dee am leewen»; {Jes.64,3}

¹⁰oba ons haft Gott daut jeopenboat derch [sienen] Jeist, dan de Jeist erforscht aules, uk daut Deepste Gottes.

¹¹Dan wäa vonne Menschen weet, waut em Mensch es, aus blooss de Jeist de Menschen, dee en am es? Aulsoo weet uk kjeena, waut en Gott (Gottes) es, aus blooss de Jeist Gottes.

¹²Oba wie ha nich dän Jeist de Welt emfangen, sonda dän Jeist, dee ut Gott es, doamet wie erkjanen daut von Gott jeschonkne (om daut wie de Dinj kjanen, de ons von Gott jeschenkjt sent);

¹³dit räd wie uk, nich en Wieed, jelieet derch menschliche Weisheit, sonda en Wieed, jelieet derch däm Jeist, endäm wie Jeistlichet jeistlich beuadeelen (vejlikjen).

¹⁴Oba een natieedlicha (fleeschelja) Mensch nemt nich aun, waut vom Jeist Gottes es, dan daut es am eene Dommheit (Onsenn), un hee kaun daut nich erkjanen, wiels daut jeistlich beuadeelt woat;

¹⁵oba dee jeistlicha beuadeelt aules, oba hee selfst woat von kjeenem beuadeelt;

¹⁶dan «Wäa haft dän Senn vom Harn erkjant, dee am belieet?» {Jes.40,13.14} Wie oba ha dän Senn Christi.