Read De Bibel JHF 1. Korinta 6 Bible Online

1. Korinta 6 - De Bibel JHF bible

1. Korinta 6

¹Doaf wäa mank junt, dee eene Sach jäajen dän aundren haft, rechten ver de Onjerajchte un nich ver de Heilje?

²Ooda weet jie nich, daut de Heilje de Welt rechten woaren? Un wan derch junt de Welt jerecht woat, sent jie onfäich (nich emstaunt), äwa de jerinjste Dinj to rechten?

³Weet jie nich, daut wie Enjel rechten woaren? Gaunz stell to sennen vonne Dinj en disem Läwen.

⁴Wan jie nu äwa Dinj en dit Läwen to rechten ha, soo sat (doot) dise doatoo, dee jerinj jeacht sent en de Jemeent.

⁵Toom Beschämen saj ekj junt. Aulsoo es mank junt uk kjeen Weisa, dee tweschen siene Breeda unjascheeden kaun?

⁶Sonda daut recht Brooda met Brooda, un daut ver Onjleewende!

⁷Daut es äwahaupt aul een Fäla aun (fa) junt, daut jie Jerechts Vehaundlunk metenaunda ha. Wuarom lot jie junt nich leewa Orrajcht doonen? Wuarom lot jie junt nich leewa beroowen?

⁸Oba jie doonen orrajcht un beroowen, un daut aun Breeda!

⁹Ooda weet jie nich, daut Ojjerajchte daut Gottes Rikj nich oawen woaren? Ert junt nich! Daut Huara, noch Jetzendeena, noch Ehebräakja, noch Lost driewende, noch met däm ieejnen Jeschlajcht Huararie driewen (Mana met Mana),

¹⁰noch Deew, noch Habsuchtje (Jiezje), nich Supa, nich Lastra, nich Reiba (Plindra) woaren daut Rikj Gottes oawen.

¹¹Un soone sent eenje, von junt, jewast; oba jie sent aufjewoschen, oba jie sent jeheilicht, oba jie sent jerajchtfoadicht worden en däm Nomen vom Harn Jesus Christus un derch dän Jeist von onsem Gott.

¹²Aules es mie erlaubt, oba nich aules es nitzlich. Aules es mie erlaubt, oba ekj well mie von kjeenem beharschen loten.

¹³De Moltiet fa dän Buck, un de Buck fa de Moltiet; oba Gott woat soo aus dise aus uk jane tonicht moaken. Oba de Lief es nich fa de Huararie, sonda fa däm Harn, un de Har fa dän Lief.

¹⁴Oba Gott haft soo aus däm Harn oppjewakjt, aus hee uk ons oppwakjen woat derch siene Krauft.

¹⁵Weet jie nich, daut june Liew Jläda Christi sent? Saul ekj dan de Jläda Christi nämen un to Jläda eene Hua moaken? Daut mucht nich passieren!

¹⁶Ooda weet jie nich, daut, wäa de Hua aunhenjt, een Lief met ar es? «Dan daut woaren», sajcht hee, «dee twee een (to eenen) Fleesch sennen». {1Mos.2,24}

¹⁷Oba wäa däm Harn aunhenjt, es een Jeist met am.

¹⁸Rant vonne Huararie! Jiedre Sind, dee een Mensch deit, es buta däm Lief; oba wäa Huararie drift, sindicht jäajen sienen ieejnen Lief.

¹⁹Ooda weet jie nich, daut jun Lief de Tempel vom Heiljen Jeist es, dee en junt wont, dän jie von Gott ha, un daut jie nich june selfst sent?

²⁰Dan jie sent fa eenen Pries jekoft worden; aulsoo veharlicht Gott en (met) junem Lief.