Read De Bibel JHF 2. Korinta 10 Bible Online

2. Korinta 10 - De Bibel JHF bible

2. Korinta 10

¹Oba ekj selfst, Paulus, ermon junt derch de Saunftmoot un Jedult Christi, dee ekj mank (bie) junt zwoa deemootich sie, oba brow wan ekj nich bie junt sie.

²Oba ekj bedd, daut ekj bie junt nich dreist sennen mott, em Vetruen, met dee ekj em Senn ha, jäajen jewesse Lied brow to sennen, dee von ons denkjen, aus waundlen wie nom Fleesch.

³Dan wan wie em Fleesch waundlen, soo kjamf wie nich nom Fleesch;

⁴Dan de Jewäaren en onsem Kaumf sent nich fleeschlich, sonda majchtich fa (en) Gott toom dolbräakjen von vesechade Städen; soo moak wie tonicht de Jedankenhiesa,

⁵un jiedre Hecht, daut sikj jäajen de Erkjantnis Gottes opphäft, un jiedren Jedanken jefangen nämen unja (en) däm Jehuarsom von Christus,

⁶un reed stonen, aulem Ojjehuarsom to strofen, wan jun Jehuarsom erfelt sennen woat.

⁷Kjikj jie opp daut, waut vere Uagen es? Wan wäa sikj selfst tootrut, daut hee Christus aunjehieet, soo denkj hee dit wada mol bie sikj selfst, daut, soo aus hee Christus siena es, soo uk wie.

⁸Dan wan uk ekj mie een bät mea äwa onse Vollmacht riemen wull, dee [ons] de Har toom Oppbuen un nich toom Vedoawen jejäft haft, soo woa ekj nich to Schaund woaren,

⁹om dautet nich schient, aus wull ekj junt derch de Breew enjsten.

¹⁰Dan de Breew, sajcht maun (hee, eena), sent jewichtich (strenj, schwoa) un voll Krauft, oba de Jäajenwuat em Lief (Kjarpa) schwak, un de Räd es mangelhauft (nuscht wieet).

¹¹Deejanja bedenkj dit, daut, woo wie em Wuat derch Breew nich doabie sent, soo uk biem doabie sennen enne Dot sennen woaren.

¹²Dan wie woagen nich, ons selfst met jewesse mank dän jlikjtostalen ooda to vejlikjen, dee sikj selfst fa goot talen; oba dee, endäm see sikj aun sikj selfst mäten un sikj met sikj selfst vejlikjen, sent nich vestendich.

¹³Oba wie wellen ons nich äwa aule Moten riemen, sonda nom Mot vom Motstock, dän Gott ons aus Mot toojedeelt haft, uk bat no junt to jelangen.

¹⁴Dan wie selfst strakjen ons nich to wiet ut, aus jelangen wie nich bat no junt, (dan wie sent uk bat junt jekomen met de frooe Bootschoft von Christus),

¹⁵endäm wie ons nich em äwa aule Moten riemen met framde Mieej (Oabeit), oba Hopninj ha, wan jun Gloowen [en junt] waust, unja junt jrata to woaren no onsem Wirkjen, nom hechsten Mot (Iea),

¹⁶om de frooe Bootschoft wieda äwa junt ligjende Lenda (Jäajenden) to vekjindjen, un nich met framde Oabeit, waut aul reed wia, ons to riemen.

¹⁷«Oba wäa sikj riemt, riem sikj en däm Harn». {Jes.9,24}

¹⁸Dan nich dee sikj selfst fa goot talt, dee es daut wieet, sonda dee, däm de Har gootheet.