Read De Bibel JHF 2. Korinta 3 Bible Online

2. Korinta 3 - De Bibel JHF bible

2. Korinta 3

¹Fang wie wada aun, ons selfst to lowen (huachhoolen)? Ooda bruck wie veleicht, aus atelje, Lowbreew aun junt ooda von junt?

²Jie sent ons Breef, nenn jeschräwen en onse Hoaten, jekjant un jeläst von aule Menschen;

³dee jie openboa jeworden, daut jie een Breef Christi sent, jeschräwen derch ons em Deenst, nich met Tint jeschräwen, sonda met däm Jeist vom läwendjen Gott, nich opp steenane Toflen, sonda opp fleeschne Toflen em Hoat.

⁴Oba soon Vetruen ha wie derch Christus to Gott;

⁵nich daut wie von ons ut selfst dichtich sent, waut to denkjen, aus ut ons selfst, sonda onse Ducht es von Gott,

⁶dee ons fäich jemoakt haft to (aus) Deena em nieen Bunt, nich no de Buakstowen, sonda nom Jeist. Dan de Buakstow moakt Doot, oba de Jeist moakt läwendich.

⁷(Wan oba de Deenst dee toom Doot fieet, met Buakstowen en (opp) Steena jehakt, en Harlichkjeit passieed, soo daut de Säns Israel daut Aunjesecht von Moses nich aunkjikjen kunnen {2Mo.34,29-35} wäajen de Harlichkjeit (Glauns) aun (opp) sien Aunjesecht, dee vejenkjlich wia,

⁸woo woat nich välmea de Deenst em Jeist en Harlichkjeit sennen?

⁹Dan wan de Deenst de Veuadeelunk (Vedaumnis) Harlichkjeit es, soo es välmea de Deenst de Jerajchtichkjeit noch väl jrata aun Harlichkjeit.

¹⁰Dan uk daut Veharlichte es en disem Faul nich veharlicht, wäajen de äwaaul groote Harlichkjeit.

¹¹Dan wan daut Vejenkjliche en Harlichkjeit wia (strold), woo välmea woat daut Bliewende en Harlichkjeit bestonen!

¹²Aulsoo ha wie soone Hopninj, soo bruck wie groote frieen Moot,

¹³un doonen nich aus Moses, dee eene Dakj opp sien Aunjesecht läd, doamet de Säns Israel nich seenen sullen opp daut Enj daut Vegonende (wajch jedonen sull).

¹⁴Oba äare Jedanken sent vehoat (vestokt) worden, dan bot toom (den) vondoagschen Dach blift biem läsen daut oole Bunt (Tastament) dee selje Dakj nich opjedakjt, wiels dee blooss en Christus wajch jenomen woat.

¹⁵Oba bot vondoag, soo foaken Moses väajeläst woat, licht eene Dakj opp äar Hoat.

¹⁶Oba sooboolt dee (Israel) sikj nom Harn omdreien (bekjieren) woat, woat de Dakj wajchjenomen).

¹⁷Oba de Har es de Jeist; wua oba de Jeist vom Harn es, doa es Frieheit.

¹⁸Oba wie aula, met opjedakjtet Aunjesecht de Harlichkjeit vom Harn seenen, [aus en eenen Spieejel kjikjen (seenent),] en daut selje Bilt vewaundelt woaren, von Harlichkjeit to Harlichkjeit, aus vom Harn, däm Jeist.