Read De Bibel JHF 2. Korinta 4 Bible Online

2. Korinta 4 - De Bibel JHF bible

2. Korinta 4

¹Doawäajen, doa wie disen Deenst ha, wiels wie met Erboarmen beschenkjt worden sent, woa wie nich mootloos;

²sonda wie ha de veborjne (stelljehoolne) Dinj de Schaund aufjesajcht, endäm wie nich en Hinjalest waundlen, un daut Wuat Gottes nich vefaulschen, sonda derch de Openboarunk de Woarheit ons jiedret (aula) Jewessen de Menschen ver Gott gootheeten.

³Oba wan junt onse frooe Bootschoft vedakjt es, soo es daut dän vedakjt, dee veloaren gonen,

⁴bie (en) dän de Gott dise Welt de Jedanken, de Onjleewende, veblent haft, doamet an nich utstrolt de Lichtglauns vonne frooe Bootschoft von de Harlichkjeit Christi, dee daut Bilt Gottes es.

⁵Dan wie vekjindjen nich ons selfst, sonda Jesus Christus aus Har, oba ons selfst aus june Deena om Jesus haulwen (wellen).

⁶Dan Gott, dee doa säd; ute Diestanis saul Licht dachen, dee es daut, dee en onse Hoaten jedacht haft toom Lichtglauns de Erkjantnis de Harlichkjeit Gottes em Aunjesecht Jesus Christus.

⁷Oba wie ha disen Schauz en ieedne Jefässa, doamet de butajeweenelje Krauft Gottes es un nich von (ut) ons.

⁸En aulem bedrenjt, oba worden nich enne Enj jedräwen; seenen kjeenen Utwajch, oba nich onen Utwajch;

⁹woaren vefolcht, oba nich veloten; hanjeschmäten, oba nich venicht (kjeemen nich om);

¹⁰aulentiet daut Stoawen Jesus aum Lief romdroagen, doamet uk daut Läwen Jesus aun onsem Lief openboa woat.

¹¹Dan wie, dee wie läwen, woaren emma däm Doot äwajäft om Jesus haulwen, doamet uk daut Läwen Jesus aun ons stoaflichet Fleesch openboa woat.

¹²Doahäa es de Doot en ons wirkjsom, oba daut Läwen en junt.

¹³Oba doa wie däm seljen Jeist von däm Gloowen ha, soo aus et jeschräwen steit: «Ekj ha jejleeft, doawäajen ha ekj jerät», {Ps.116,10} soo jleew uk wie, doawäajen räd wie uk,

¹⁴endäm wie weeten, daut dee, dee däm Harn Jesus oppjewakjt haft, uk ons met Jesus oppwakjen woat un met junt doastalen (hanstalen) woat;

¹⁵dan aules passieet junt haulwen, doamet de Jnod, mea aus groot jeworden es derch dee väle Jleewende, dän Dank sea groot moaken to Iea Gottes.

¹⁶Doawäajen woa wie nich mootloos; sonda wan uk onsa natieedlicha (butaschta) Mensch venicht woat, soo woat doch de ennalicha Mensch Dach fa Dach niejemoakt.

¹⁷Dan daut jäajenwuatje Leichte (jäajenwuatjet leichtet Lieden) ons Bedrenkjnis bewirkjt fa ons äwa aule Moten een eewjet Äwamot (Jewicht) von Harlichkjeit, ,

¹⁸wan wie nich aunkjikjen, waut maun sitt, sonda daut, waut maun nich sitt; dan waut to seenen es, es fa eene Tietlank, oba daut nich to seenen es, es eewich.