Read De Bibel JHF Galata 1 Bible Online

Galata 1 - De Bibel JHF bible

Galata 1

¹Paulus, Apostel, nich von Menschen, uk nich derch eenen Mensch, sonda derch Jesus Christus un Gott, däm Voda, dee am von de Doodes oppjewakjt haft,

²un aule Breeda, dee bie mie sent, aun de Jemeent von Galatien:

³Jnod junt un Fräd von Gott, däm Voda, un onsem Har Jesus Christus,

⁴dee sikj selfst fa onse Sinden hanjejäft haft, doamet hee ons rut nemt ut dise (de jäajenwuatje) beese Welt, nom Wellen von onsem Gott un Voda,

⁵däm de Iea en Eewichkjeit to Eewichkjeit! Amen.

⁶Ekj wunda mie, daut jie soo schwind von däm, dee junt en (derch) de Jnod Christi beroopen haft, to eene aundre frooe Bootschoft aufdreien,

⁷dee kjeene aundre es; sonda daut sent (jeft) eenje Lied, dee junt vewerren un de frooe Bootschoft von Christus vedreien wellen.

⁸Oba wan uk wie, ooda een Enjel vom Himmel, junt woat aus de frooe Bootschoft vekjindjen, buta däm, waut wie junt vekjindicht ha; dee es veflucht.

⁹Aus wie verhäa jesajcht ha, soo saj ekj uk nu wada: Wan irjent wäa junt de frooe Bootschoft vekjindicht, buta däm, waut jie emfangen ha, dee es veflucht.

¹⁰Sieekj ekj dan nu de Menschen tofrädtostalen, ooda Gott? Ooda sieekj ekj Menschen to jefaulen? Wan ekj noch Menschen jefaulen wudd, soo wia ekj nich Christi Kjnajcht.

¹¹Oba ekj moak junt bekaunt, Breeda, daut de frooe Bootschoft, dee ekj vekjindicht ha, daut dee nich no Menschen Oat es.

¹²Dan ekj ha dee uk nich von eenem Mensch jekjräajen, un ekj wudd nich belieet, sonda derch eene Openboarunk von Jesus Christus.

¹³Jo, dan jie ha von mien Waundel eenst em Judentum jehieet, daut ekj de Jemeent Gottes äwa aule Mot vefoljd, om dee to venichten,

¹⁴un en däm Judentum tooneem äwa väle Miensjlikjen en mienem Jeschlajcht, endäm ekj een groota (em Äwamot) Iewaja fa miene vodaliche Sitten (Äwaleewrungen) wia.

¹⁵Oba aus et Gott, fa goot hild, dee mie vom Muttalief aun utjesondat (uterwält) un derch siene Jnod beroopen haft,

¹⁶sienen Sän en mie to openboaren, doamet ekj am, aus de frooe Bootschoft, mank de Velkja vekjindijd, fuaz, jinkj ekj nich met Fleesch un Bloot to Rot,

¹⁷un jinkj uk nich enopp no Jerusalem no dän, dee ver mie Apostel wieren, sonda ekj jinkj wajch no Arabien un kjeem wada trigj no Damaskus.

¹⁸Donn, no dree Joa, jinkj ekj enopp no Jerusalem, om Kefas (Petrus) kjanen to lieren, un ekj bleef 15 Doag bie am.

¹⁹Oba ekj sach kjeenen aundren vonne (dee) Apostel, buta Jakobus, däm Brooda vom Harn.

²⁰Oba waut ekj junt schriew, kjikj, ver Gott! Ekj lieej nich.

²¹Donn jinkj ekj en de Jäajent von Sierien un Zilizien.

²²Oba ekj wia de Jemeent en Judäa, dee en Christus sent, vom Aunjesecht onbekaunt;

²³oba see hauden blooss jehieet: Dee, dee ons eenst vefoljd, vekjindicht nu aus frooe Bootschoft däm Gloowen, dän hee eenst venielen (venichten) wull.

²⁴Un see veharlichten Gott aun (opp) mie.