Read De Bibel JHF Galata 2 Bible Online

Galata 2 - De Bibel JHF bible

Galata 2

¹Doaropp, no 14 Joa, jinkj ekj wada enopp no Jerusalem met Barnabas un neem uk Titus met.

²Oba ekj jinkj enopp derch eene Openboarunk un läd an de frooe Bootschoft väa, dee ekj mank de Velkja vekjindijd, oba besonda dän Aunjeseenen, auf ekj nich vejäfs ran ooda jerant wia;

³(oba nich eenmol Titus, dee bie mie wia, dee een Griech wia, wort nich jedwungen, sikj beschnieden to loten);

⁴oba wäajen dee nenjeschlikjte faulsche Breeda, dee heemlich nenn jekomen wieren, om onse Frieheit uttofinjen, dee wie en Christus Jesus ha, doamet see ons vesklowen (en Kjnajchtschoft brinjen) kunnen;

⁵dän wie uk nich fa eene Stund derch Unjaordninj nojejäft ha, doamet de Woarheit, de frooe Bootschoft, bie junt blift.

⁶Oba von dän, dee Aunjeseenen schienen, wautemma see uk wieren, daut moakt kjeen Unjascheet fa mie, Gott sitt (nämt) kjeene Menschen Persoon aun, - dan mie ha de Aunjeseenen nuscht doatoo oppjelajcht;

⁷oba em Jäajendeel, aus see jeseenen hauden, daut mie de frooe Bootschoft aun de Onbeschnädne (Heiden) aunvetrut es (wia), soo aus Petrus aun de Beschniedinj (Juden);

⁸(dan dee, dee en Petrus, fa daut Apostelaumt de Beschniedinj jewirkjt haft, haft sikj uk mie fa de Heiden wirkjsom bewäsen),

⁹un aus see de Jnod erkjant hauden, dee mie jejäft es, jeewen Jakobus un Kefas (Petrus) un Johanes, dee aus Stendasch (Eltestasch, Väaschte) aunjeseenen worden, mie un Barnabas de Rajchte (Haunt) de Jemeenschoft, doamet wie mank de Heiden, oba see mank de Beschniedinj jinjen;

¹⁰blooss daut wie de Oame jedenkjen sullen, däm ekj mie uk flietich bewäsen ha, aulsoo to doonen.

¹¹Oba aus Kefas (Petrus) no Antiochia jekomen wia, wadastunt ekj am em Aunjesecht, wiels hee aunjekloacht (jerecht) wia.

¹²Dan ver däm, eenje von Jakobus jekomen wieren, haud hee met de Heiden (Heidenchristen) toop jejäten; oba aus see jekomen wieren, trock hee sikj trigj un sondad sikj auf, wiels hee sikj fa dee ute Beschniedinj enjst.

¹³Un met am heichelden uk de äwaje Juden, soo daut uk Barnabas derch äa Heichlen sikj metrieten leet.

¹⁴Oba aus ekj sach, daut see nich rajcht no de Woarheit, von de frooe Bootschoft, waundlen, säd ekj to Kefas (Petrus) ver aulem: Wan du, dee du een Jud best, heidnisch un nich judisch läfst, woo bedwinjst du de Heiden judisch to läwen?

¹⁵Wie sent von Natua Juden un nich Sinda ut de Heiden,

¹⁶oba wisten, daut de Mensch nich ut Jesazeswoakjen jerajcht jesproaken woat, sonda blooss derch dän Gloowen aun Jesus Christus, uk wie ha aun Jesus Christus jejleeft, om daut wie ut Gloowen aun Christus jerajchtfoadicht worden, un nich ut Jesazeswoakjen, wiels ut Jesazeswoakjen kjeen Fleesch jerajchtfoadicht woaren woat.

¹⁷Oba wan wie, endäm wie en Christus sieekjen jerajchtfoadicht to woaren, uk selfst aus Sinda sent jefungen worden, es dan Christus een Deena de Sind? Daut mucht nich passieren!

¹⁸Dan wan ekj daut, waut ekj doljeräten ha, wada oppbu, soo stal ekj mie selfst aus Äwaträda han.

¹⁹Dan ekj sie derch daut Jesaz fa daut Jesaz jestorwen, doamet ekj fa Gott läw; ekj sie met Christus jekjriezicht worden,

²⁰ekj läw, oba nich mea ekj (oba nich mea läw ekj), oba Christus läft en mie; oba waut ekj nu em Fleesch läw, läw ekj derch (em) Gloowen, derch däm, aun däm Sän Gottes, dee mie jeleeft un sikj selfst fa mie hanjejäft haft.

²¹Ekj moak de Jnod Gottes nich onjeltich; dan wan Jerajchtichkjeit derch daut Jesaz kjemt, dan es Christus emsonst jestorwen.