Read De Bibel JHF Galata 3 Bible Online

Galata 3 - De Bibel JHF bible

Galata 3

¹Oo onvestendje Galata, wäa haft junt bezeibat, dän Jesus Christus, aus [mank junt] jekjriezicht, ver june Uagen jemolt wort?

²Blooss dit well ekj von junt erfoaren: Ha jie dän Jeist ut Jesazeswoakjen jekjräajen, ooda ut de Bootschoft vom Gloowen?

³Se jie soo onvestendich? Em Jeist ha jie aunjefongen, well jie nu em Fleesch toenj brinjen (vollbrinjen)?

⁴Ha jie soo väl (grootet) vejäfs jeläden (erfoaren)? Wan aundasch daut uk vejäfs es?

⁵Dee junt nu dän Jeist jeft (hanrieekjt) un Wundawoakjen mank junt wirkjt, es daut ut Jesazeswoakjen ooda ut de Krauft, utem (derch) Gloowen?

⁶Soo aus Abraham Gott jleewd, un daut wort am aus Jerajchtichkjeit aunjeräakjent. {1Mo.15,6}

⁷Aulsoo erkjant, daut dee ut Gloowen sent (läwen), sent Abraham siene Säns.

⁸Oba de Schreft, haft väajeseenen, daut Gott de Velkja ut Gloowen rajchtfoadjen wudd, vekjindijd däm Abraham de frooe Bootschoft verhäa: «En die woaren aule Velkja jesäajent woaren». {1Mo.12,3}

⁹Doahäa, dee ut Gloowen läwen (sent), woaren jesäajent met däm jleewenden Abraham.

¹⁰Dan aule, dee ut Jesazeswoakjen sent, sent unja däm Fluch; dan daut steit jeschräwen: «Veflucht es jiedra, dee nich blift bie (en) aulem, waut em Buak daut Jesaz jeschräwen es, om daut to doonen». {5Mo.27,26}

¹¹Oba daut derch daut Jesaz kjeena ver Gott jerajcht jesproaken woat, es openboa, dan «dee Jerajchta woat ut Gloowen läwen». {Hab.2,4}

¹²Oba daut Jesaz es nich ut Gloowen, sonda: «Wäa dise Dinj jedonen haft, woat doaderch läwen». {3Mo.18,5}

¹³Christus haft ons loosjekoft von däm Fluch dautet Jesaz brocht, endäm hee een Fluch fa ons jeworden es, dan daut steit jeschräwen: «Veflucht es jiedra, dee aum Holt henjt!» {5Mo.21,23}

¹⁴Doamet de Säajen von Abraham en Christus Jesus no de Velkja kjemt, doamet wie de Vespräakjunk vom Jeist kjrieen derch dän Gloowen.

¹⁵Breeda, ekj räd no Menschenoat; selfst een Menschen Tastament, daut bestädicht es, erkjläat kjeena fa onjeltich ooda deit waut doatoo.

¹⁶Oba däm Abraham wieren (sent) de Vespräakjungen toojesajcht un sienem Somen. Daut heet nich: «Un däm Somen», aus von väle, sonda aus von eenem: «Un dienem Somen», {1Mo.22,18} dee Christus es.

¹⁷Oba dit saj ekj: Een Tastament, jerechtsmässich (bestädicht) von Gott [opp Christus han] jemoakt, moakt daut 430 Joa nohäa jekomne Jesaz nich onjeltich, om de Vespräakjungen opptohäwen.

¹⁸Dan wan daut Oawgoot utem Jesaz es, soo kjemt daut nich mea ute Vespräakjunk; oba Gott haft daut Abraham derch eene Vespräakjunk jeschenkjt.

¹⁹Aulsoo, waut saul daut Jesaz? Wäajen de Äwaträdungen es daut biejedonen worden, (bot de Somen kjeem, däm de Vespräakjunk es jejäft worden), aunjeordnet derch Enjel en de Haunt von eenem Vemedla.

²⁰Oba een Vemedla es nich Vemedla von eenem; oba Gott es eena.

²¹Es dan daut Jesaz jäajen de Vespräakjungen Gottes? Daut mucht nich passieren! Dan wan een Jesaz wia jejäft worden, daut läwendich moaken kunn, dan wia de Jerajchtichkjeit werkjlich ut (derch) daut Jesaz.

²²Oba de Schreft haft aules unja de Sind enjeschloten, doamet de Vespräakjunk ut Gloowen aun Jesus Christus dän jejäft wort, dee doa jleewen.

²³Oba ver däm de Gloowen kjeem, wort wie unja daut Jesaz bewoat, enjeschloten opp däm Gloowen han, dee jeopenboat sull woaren.

²⁴Aulsoo, es daut Jesaz ons Oppaussa jeworden bot to Christus, doamet wie ut Gloowen kunnen jerajcht jesproaken woaren.

²⁵Oba doa de Gloowen jekomen es, sent wie nich mea unja eenem Oppaussa;

²⁶dan jie aula sent Säns Gottes derch dän Gloowen en (aun) Christus Jesus.

²⁷Dan aula, dee jie opp Christus sent jedeept worden, ha Christus aunjetrocken.

²⁸Doa es nich Jud noch Griech, doa es nich Sklow noch Friea, doa es nich Maun ooda Fru; dan jie aula sent eent en Christus Jesus.

²⁹Oba wan jie Christi sent, soo sent jie Abraham sien Somen un no de Vespräakjunk Oawen.