Read De Bibel JHF Galata 5 Bible Online

Galata 5 - De Bibel JHF bible

Galata 5

¹Fa de Frieheit haft Christus ons frie jemoakt; aulsoo stot un lot junt nich wada met (unja) däm Joch de Kjnajchtschoft belaustjen (opplajen).

²Kjikjt, ekj, Paulus, saj junt, daut, wan jie junt beschnieden loten, Christus junt nuscht nutzen woat.

³Oba ekj bezeij wada jiedrem Mensch, dee sikj beschnieden lat, daut hee schuldich es, daut gaunze Jesaz to erfellen.

⁴Jie sent loosjebungen (jetrant) von Christus, dee jie derch daut Jesaz wellen jerajchtfoadicht woaren; jie sent ut de Jnod jefollen.

⁵Oba wie luaren derch dän Jeist ut Gloowen de Hopninj opp (de) Jerajchtichkjeit.

⁶Dan en Christus Jesus jelt nich Beschniedinj noch Onbeschnäden, sonda Gloowen, dee derch de Leew wirkjsom woat.

⁷Jie randen goot; wäa haft junt jehindat (oppjehoolen), de Woarheit nich to jehorchen?

⁸Daut Äwaräden doatoo kjemt nich von däm, dee junt beroopen haft.

⁹Een bät (weinich) Suadieech derchsuat dän gaunzen Dieech.

¹⁰Ekj ha Vetruen to (opp) junt em Harn, daut jie nich aundasch denkjen woaren; oba dee junt vewert, woat daut Uadeel droagen motten, wäa uk emma hee es.

¹¹Oba ekj, Breeda, wan ekj noch de Beschniedunk vekjindj, wuarom woa ekj dan noch vefoljd? Doamet es daut Oajanis vom Kjriez tonuscht jemoakt.

¹²Ekj mucht, daut uk dee sikj utschnieden (beschnieden) loten, dee junt opphetzen (oppsternotsch moaken).

¹³Oba jie sent to Frieheit beroopen worden, Breeda; moakt blooss nich de Frieheit to Jeläajenheit fa daut Fleesch, sonda derch de Leew deent eenaunda.

¹⁴Dan daut gaunze Jesaz es en een Wuat erfelt, en daut: «Du saust dien Näakjsten leewen aus die selfst». {3Mo.19,18}

¹⁵Oba wan jie junt unjarenaunda bieten un oppfräten, dan paust opp, daut jie nich vonenaunda oppjefräten woaren.

¹⁶Oba ekj saj: Waundelt em Jeist, un jie woaren de Fleescheslost nich utfellen (vollbrinjen).

¹⁷Dan daut Fleesch sträft jäajen däm Jeist, oba de Jeist jäajen daut Fleesch; dise ligjen (sent) metenaunda em Striet, soo daut jie nich daut waut jie wellen doonen kjennen.

¹⁸Oba wan jie vom Jeist jeleit woaren, soo sent jie nich unja daut Jesaz.

¹⁹Oba openboa sent de Woakjen vom Fleesch, dee doa sent: Huararie, Orreinheit, een onbandjet Läwen,

²⁰Jetzendeenst, Zaubarie, Fientschoft, Striet, Aufgonst, Wutt, Zenkjisch, Spoolinjen, Oneenichkjeit,

²¹Aufgonst, Drinkja, Frätasch, un soowaut mea, von dän ekj junt em verut saj, soo aus ekj uk verhäa jesajcht ha, daut dee soowaut doonen, daut Rikj Gottes nich oawen woaren.

²²Oba de Frucht vom Jeist es Leew, Freid, Fräd, Jedult, Frintlichkjeit, Gootsdoonen, Tru sennen,

²³Saunftmoot, Selfstbeharschunk; jäajen soone jeft et kjeen Jesaz.

²⁴Oba dee, dee Christus [Jesus] aunjehieren, ha daut Fleesch jekjriezicht met de Liedenschoften un Bejia (Losten).

²⁵Wan wie derch (ut) däm Jeist läwen, dan lot ons uk derch (ut) däm Jeist waundlen.

²⁶Lot ons nich no iedle Iea trachten, eenaunda rutfodren, eenaunda aufjenstich sennen.