Read De Bibel JHF Galata 6 Bible Online

Galata 6 - De Bibel JHF bible

Galata 6

¹Breeda! Wan uk een Mensch von (en) eene Äwaträdunk äwafollen woat, soo brinjt jie, de Jeistliche, soonem eenen wada trajcht em Jeist de Saunftmoot, endäm du acht jeefst (opppaust) opp die selfst, daut nich uk du vesocht woascht.

²Droacht eena däm aundren siene Laust, un soo woa jie daut Jesaz Christi erfellen.

³Dan wan wäa meent, waut to sennen, doa hee doch nuscht es, soo bedrieecht hee sikj selfst.

⁴Oba een jiedra unjasieekj sien ieejnet Woakj, un dan woat hee aun sikj auleen un nich aun aundre Riem (Iea) ha;

⁵dan een jiedra woat siene ieejne Laust droagen.

⁶Oba wäa em Wuat unjarecht woat, deel von aulet Goodet (Hab un Goot) däm met, dee am unjarechten deit.

⁷Ert junt nich, Gott lat sikj nich spotten! Dan waut de (een) Mensch seit, daut woat hee uk arnten.

⁸Dan wäa fa (opp) sien ieejnet Fleesch seit, woat vom Fleesch Vedoawnis arnten; oba wäa fa däm Jeist seit, woat von däm Jeist eewjet Läwen arnten.

⁹Oba lot ons em Gootsdoonen nich meed woaren, dan to siena Tiet woa wie arnten, wan wie nich oppjeleest (meed, oppjäwen) woaren.

¹⁰Aulsoo nu, soo aus wie Jeläajenheit ha, lot ons daut Goode wirkjen jäajen aule, oba daut mieeschte aun de ieejne (Jeschwista) em Gloowen.

¹¹Kjikjt, waut fa eenen langen Breef (met groote Buakstowen) ekj junt jeschräwen ha, met miene ieejne Haunt.

¹²Aule, dee em Fleesch een goodet Aunseenen haben wellen, dee bemotten junt, beschnieden to loten, blooss doamet see om daut Kjriez Christi wellen nich vefolcht woaren.

¹³Dan nich eenmol see, dee beschnäden sent, hoolen selfst daut Jesaz nich, sonda see wellen, daut jie junt beschnieden loten, doamet see sikj wäajen (äwa) jun Fleesch riemen kjennen.

¹⁴Oba mucht mie daut nich passieren, mie to puchen, aus blooss met daut Kjriez von onsem Harn Jesus Christus, derch daut mie de Welt jekjriezicht es un ekj fa de Welt.

¹⁵Dan noch Beschniedunk noch Onbeschnäden es waut, sonda eene niee Erschaufunk (Kjreatua).

¹⁶Un aule, dee no disem Motstock (Räajel) waundlen woaren, - Fräd äwa an un Erboarmen, un äwa daut Israel Gottes!

¹⁷Äwajens moakt mie kjeena Mieej (Trubbel), dan ekj droag de Moltieekjen [vom Harn] Jesus aun mienem Lief.

¹⁸De Jnod von onsem Harn Jesus Christus es met junem Jeist, Breeda! Amen.