Read De Bibel JHF Efeesa 2 Bible Online

Efeesa 2 - De Bibel JHF bible

Efeesa 2

¹Uk junt, dee jie doot wieren en (derch) june Äwaträdungen un Sinden,

²en dee jie eenst waundelden no de Tiet dise Welt, nodäm Harscha de Jewault de Loft, däm Jeist, dee nu wirkjt en de Säns de ojjehuarsom sent;

³unja dän uk wie eenst aula onsem Omgank hauden en onse Fleescheslost, endäm wie dän Wellen vom Fleesch un Jedanken deeden un von Natua Kjinja von Oajanis wieren, aus uk dee äwaje (aundre).

⁴Oba Gott, dee rikj es aun Erboarmen, wäajen siene groote Leew, met dee hee ons jeleeft haft,

⁵aus uk wie en de Äwaträdungen doot wieren, haft ons met Christus läwendich jemoakt, derch (ut) Jnod sent wie jerat -

⁶un haft ons met oppjewakjt un met hanjesat en de himlische Uaten en Christus Jesus,

⁷doamet hee en dee komenden Tieden dän äwatraflich groote Rikjtum siene Jnod derch (en) Goots jäajen ons bewees en Christus Jesus.

⁸Dan derch Jnod sent jie jerat, derch dän Gloowen; un dit nich ut junt, Gottes Gow es daut;

⁹nich ut Woakjen, doamet sikj kjeena riemt (pucht).

¹⁰Dan wie sent sien Schepfungswoakj, erschaufen en Christus Jesus to goode Woakjen, dee Gott em verut reed jemoakt haft, doamet wie en an waundlen.

¹¹Doawäajen denkjt doa aun, daut jie, eenst de Heiden nom Fleesch, dee soojenande Onbeschnädne jenant worden von dee soojenande Beschnädne, dee aum (em) Fleesch met Henj jemoakte Beschniedinj,

¹²daut jie to jane Tiet onen Christus wieren, framd von daut Birjarajcht von Israel, un Framde däm Bunt de Vespräakjunk, hauden kjeene Hopninj, un onen Gott enne Welt.

¹³Oba nu, en Christus Jesus, sent jie, dee jie eenst wiet auf wieren, derch Christus sien Bloot dichtbie jebrocht worden.

¹⁴Dan hee es onsa Fräd, dee de beid to eenem jemoakt haft, un haft de Meddelwaunt (Soreg) vom Tun aufjebroaken,

¹⁵endäm hee en sienem Fleesch de Fientschoft, daut Jesaz de Jebooten en Väaschreften, wajch jedonen haft, om daut hee dee twee, un muak Fräd, en sikj selfst - to eenem nieen Menschen schauft,

¹⁶un veseent dee beid en eenem Lief met Gott derch daut Kjriez, nodäm hee doaderch de Fientschoft doot jemoakt haft.

¹⁷Un hee kjeem to junt un vekjindijd Fräd, dän dee wiet auf wieren, un Fräd dän dee dicht bie wieren.

¹⁸Dan derch am ha wie beid dän Toogank en eenen Jeist toom Voda.

¹⁹Aulsoo, sent jie nu nich mea Framde un onen Birjarajcht, sonda jie sent Metbirja de Heilje, un Husieejne Gottes,

²⁰oppjebut opp de Gruntloag de Apostel un Profeeten, wua (doa) Jesus Christus selfst de Akjsteen es,

²¹en däm de gaunze Bu, wort toopjestalt, waust to eenen heiljen Tempel em Harn,

²²en däm uk jie met nenjebut woaren to eene Wonunk Gottes em Jeist.