Read De Bibel JHF Efeesa 3 Bible Online

Efeesa 3 - De Bibel JHF bible

Efeesa 3

¹Doawäajen sie ekj, Paulus, de Jefangna Christus Jesus fa junt Heiden -

²wan jie aundasch jehieet ha von de Vewaultunk de Jnod Gottes, dee mie fa junt jejäft es,

³daut mie derch eene Openboarunk daut Jeheemnis es bekaunt jemoakt worden, aus ekj verhäa em korten jeschräwen ha,

⁴aun däm jie biem läsen erkjanen miene Ensecht en Christus sien Jeheemnis,

⁵daut en aundre Jeschlajchta de Säns de Menschen nich bekaunt jemoakt wort, aus et nu jeopenboat worden es siene heilje Apostel un Profeeten derch däm Jeist;

⁶daut de Heiden Metoawen sent un Metjlieda un Metdeel ha aun de Vespräakjunk en Christus Jesus derch de frooe Bootschoft,

⁷dän äa Deena ekj jeworden sie no de Gow de Jnod Gottes, dee mie jejäft es nom Wirkjen von siene Krauft.

⁸Mie, däm aula jerinjsten von aule Heilje, es dise Jnod jejäft worden, [mank] de Heiden dän ondenkjboaren Rikjtum von Christus to vekjindjen,

⁹un aulem kloa to moaken, waut de Vewaultunk von daut Jeheemnis es, daut vonne Eewichkjeit häa vestoaken wia en Gott, dee aules [aule Dinj] jeschaufen haft [derch Jesus Christus];

¹⁰doamet nu de Machthabende un de Jewaulten en de himlische Uaten (Himmelswelten) derch de Jemeent metjedeelt woat dee välsiedje Weisheit Gottes,

¹¹nom eewjen Väanämen, däm hee utjefieet haft en Jesus Christus, onsem Harn;

¹²en däm wie daut frooe Toovetruen ha un däm Toogank em Vetruen derch dän Gloowen aun am.

¹³Doawäajen bedd ekj, nich to vezoagen bie miene Bedrenkjnisen fa junt, dee june Iea es (sent).

¹⁴Doawäajen bieej ekj miene Kjnee ver däm Voda [onsem Harn Jesus Christus],

¹⁵nodäm jiedre Vodaschoft enne Himmels un oppe Ieed jenant (jeneemt) woat,

¹⁶daut hee junt jeft, nom Rikjtum siena Harlichkjeit met Krauft jestoakjt to woaren derch sienem Jeist aum ennalichen Mensch;

¹⁷daut Christus derch dän Gloowen en june Hoaten wont, endäm jie enne Leew jewartelt un jejrind sent,

¹⁸doamet jie emstaunt sent, to bejriepen met aule Heilje, waut de Breed un Lenj un Huach un Deep es,

¹⁹un to erkjanen dee de Erkjantnis äwatrofne Leew Christi, doamet jie erfelt woaren - han to de gaunze Vollheit Gottes.

²⁰Oba däm, dee äwa aules doonen kaun, äwa aule Mot mea, aus wie bedden ooda vestonen, no de Krauft, dee en ons wirkjt,

²¹am es de Iea en de Jemeent un en Christus Jesus, opp aule Jeschlajchta de Eewichkjeit to Eewichkjeit! Amen.