Read De Bibel JHF Filippa 1 Bible Online

Filippa 1 - De Bibel JHF bible

Filippa 1

¹Paulus un Timotäus, Kjnajchts Jesus Christus, aun aule Heilje en Christus Jesus, dee en Filippi sent, met de Oppsechta (Leida, Eltestasch) un Deena (Diakonen);

²Jnod met junt un Fräd von Gott, onsem Voda, un däm Harn Jesus Christus!

³Ekj dank mienem Gott bie jiedrem erwänen aun junt,

⁴aulentiet en jiedrem miena Jebäda, endäm ekj fa junt aula daut Jebäd met Freid doo,

⁵wäajen junem Deelnämen aune frooe Bootschoft vom ieeschten Dach bot nu,

⁶endäm ekj krakjt en disem goodet toovetruen ha, daut dee, dee een goodet Woakj en junt aunjefongen haft, daut toenj brinjen woat bot aun däm Dach von Jesu Christus;

⁷dan daut es fa mie rajcht, dit von junt aula to denkjen, doawäajen, wiels ekj junt em Hoat ha, soo aus en miene Faslen aus uk bie de Veteidjunk un Bestädjunk de frooe Bootschoft, dee jie aula aun miene Jnod deelnämen.

⁸Dan Gott es mien Zeij, woo ekj mie no junt aula bang met däm Hoat (von Hoaten enne Leew) von Christus Jesus.

⁹Un doarom bäd ekj, daut june Leew noch mea un mea toonemt aun Erkjantnis un aule Ensecht,

¹⁰doamet jie daut proowen muchten, waut daut Baste es, doamet jie woarhauft un onen Aunstoos sent aun Christus sien Dach,

¹¹jefelt met dee Frucht de Jerajchtichkjeit, dee derch Jesus Christus es, to Harlichkjeit un toom Loff Gottes.

¹²Oba ekj well, daut jie weeten, Breeda, daut miene Omstend mea jedeent ha de frooe Bootschoft veraun to driewen,

¹³soo daut miene Faslen en Christus openboa jeworden sent en de gaunze Jäajent un bie aule aundre,

¹⁴un daut dee mieeschte de Breeda em Harn, mea Vetruen jewonnen ha, derch miene Faslen, om soo mea woagen, angstloos daut Wuat to räden.

¹⁵Eenje zwoa vekjindjen Christus uk ut Aufgonst un Striedsucht, oba eenje uk ut gooden Wellen.

¹⁶De eenen ut Leew, endäm see weeten, daut ekj to Veteidjunk de frooe Bootschoft enjesat sie;

¹⁷de aundre ut Striedsucht vekjindjen Christus nich woarhauft, endäm see miene Faslen Bedrenkjnis (Triebsaul) to erwakjen jedenkjen.

¹⁸Waut dan? Woat doch opp aula Oat, es daut toom Schien ooda en Woarheit, Christus vekjindicht, un doaräwa frei ekj mie, jo, ekj woa mie uk freien;

¹⁹dan ekj weet, daut dit mie to Radinj utschlonen woat derch jun Jebäd un derch Unjastettunk en Jesu Christus sien Jeist,

²⁰no mienem fausten (bestendjen) Luaren un Hopninj, daut ekj en nuscht woa beschämt woaren, sonda gaunz Openboa, aus emma, soo uk nu woat Christus groot jemoakt aun mienem Lief, es daut derch Läwen ooda derch Doot.

²¹Dan fa mie es daut Läwen Christus, un daut Stoawen Jewenst.

²²Oba wan daut Läwen em Fleesch, wan dit fa mie Frucht de Oabeit es; dan weet ekj nich, waut ekj wälen saul.

²³Oba ekj woa von beid bedrenjt, endäm ekj Lost ha, wajchtogonen (stoawen) un bie Christus to sennen, [dan] daut es wiet bäta;

²⁴oba daut Vebliewen em Fleesch es junt haulwen needja.

²⁵Un en dit Vetruen weet ekj, daut ekj met un bie junt aula bliewen woa to june Fodrunk un Freid em Gloowen,

²⁶doamet jun Riemen groot woat (es) en Christus Jesus derch mie, derch mien Wadakomen no junt.

²⁷Fieet jun Läwen blooss soo aus daut de frooe Bootschoft von Christus wirdich es, doamet, es et, daut ekj kom un junt see, ooda wajch bliew, ekj von junt hia, daut jie fauststonen en eenen Jeist, endäm jie met eene Seel (äwareen) metkjamfen fa däm Gloowen aun de frooe Bootschoft,

²⁸un junt met nuscht enenjsten loten von de Jäajna; waut fa an een Bewies vom Vedoawnis es, oba june Radinj (Seelichkjeit), un daut von Gott.

²⁹Dan junt es daut jeschenkjt worden fa Christus, nich blooss aun am to jleewen, sonda uk fa am to lieden,

³⁰doa jie dän selwjen Kaumf ha, dän jie aun mie jeseenen un nu von mie hieren.