Read De Bibel JHF Filippa 2 Bible Online

Filippa 2 - De Bibel JHF bible

Filippa 2

¹Aulsoo, wan daut irjent eene Ermonunk en Christus jeft, wan irjent een Troost de Leew, wan irjent eene Jemeenschoft em Jeist, wan irjent een Jaumahoat un Erboarmen,

²soo moakt miene Freid vollkomen, doamet jie daut selje denkjen, dee selje Leew ha, eendrajchtich, en eenen Senn (eenich),

³doot nuscht en Striedsucht un nich en iedle Riemsucht, sonda en de Deemoot eena däm aundren hecha achten aus sikj selfst;

⁴een jiedra nich opp daut Sienje (Ieejne) kjikjt, sonda een jiedra uk opp daut de aundre.

⁵Dan dise Jesennunk saul en (mank) junt sennen, dee uk en Christus Jesus wia,

⁶dee, doa hee enne Jestault Gottes wia, daut nich fa eenen Raup jehoolen haft, Gott jlikj to sennen,

⁷sonda sikj selfst tonuscht muak un Kjnajchts Jestault aunneem, endäm hee en Jlikjheit de Menschen jeworden es,

⁸un en siene Jestault aus een Mensch jefungen, sikj selfst läach hilt, endäm hee jehuarsom wia bat toom Doot, un zwoa toom Doot aum Kjriez.

⁹Doawäajen haft Gott am uk äwa aule Mot erhowen un am dän Nomen jeschenkjt, dee äwa jiedren Nomen es,

¹⁰doamet en däm Nomen Jesus jiedret Kjnee sikj bieejen saul, de Himlische un de Irdische un de Unjairdische,

¹¹un jiedre Tung bekjanen saul, daut Jesus Christus Har es, to Iea Gottes, un däm Voda.

¹²Doahäa, miene Leefste, soo aus jie aulentiet jehuarsom jewast sent, nich blooss aus en miene Jäajenwuat, sonda nu välmea wua ekj von junt wajch sie, bewirkjt june ieejne Seelichkjeit met Forcht un Zetren;

¹³dan Gott es daut, dee en junt wirkjt soo aus daut Wellen aus uk daut Wirkjsom sennen, no sienem Wooljefaulen.

¹⁴Doot aules onen Jemurr (brumsch sennen) un onen Bedenkjen (twiewlen),

¹⁵doamet jie onen Dodel un rein (eefach) sent, makelloose Kjinja Gottes, medden mank een vekjieedet un vedreidet Jeschlajcht, mank dän jie schienen aus Stierns (Lichta) enne Welt,

¹⁶daut Läwens Wuat fausthoolen, toom Riem fa mie opp Christus sien Dach, daut ekj nich emsonst jerant sie, un mie nich emsonst aufjemieecht ha.

¹⁷Oba wan ekj uk, aus Drinkjopfa äwa daut Opfa (Schlachtopfa) un däm Gloowensdeenst jeopfat woa, soo frei ekj mie un frei mie met junt aula.

¹⁸Oba krakjt soo freit uk jie junt un freit junt met mie.

¹⁹Oba ekj hop em Harn Jesus, Timotäus boolt no junt to schekjen, doamet uk ekj jetreest (gootsmoots) sie, wan ekj waut äwa junt erfoaren ha.

²⁰Dan ekj ha sest kjeenem dee soo enjestalt es, dee von Hoaten (opprechtich) fa (äwa) daut junje beorruicht sennen woat;

²¹dan see aula sieekjen daut Äaje, nich daut, waut Jesus Christus es.

²²Oba jie kjanen siene Hangow, daut hee, aus een Kjint däm Voda, met mie jedeent haft fa de frooe Bootschoft.

²³Aulsoo disem hop ekj fuaz to schekjen, wan ekj woa jeseenen ha, woo daut om mie steit.

²⁴Oba ekj vetru em Harn, daut uk ekj selfst boolt komen woa.

²⁵Oba ekj ha daut fa needich jehoolen, Epafroditus, mienem Brooda un Metoabeida un Metkjamfa, no junt trigj to schekjen, een Deena von junt jeschekjt toom mie halpen en mien Nootlieden [toom mie unjastetten en mien Mangel] ;

²⁶doa hee sikj no junt aula bangd, un en Orru wia, doawäajen, wiels jie jehieet hauden, daut hee krank wia.

²⁷Dan hee wia uk krank, aum Doot dicht bie, oba Gott erboarmd sikj äwa am, oba nich blooss äwa am, sonda uk äwa mie, doamet ekj nich Truarichkjeit opp Truarichkjeit haud.

²⁸Aulsoo, om soo schwinda ha ekj am jeschekjt, doamet jie, wan jie am seenen, wada froo woaren, un ekj weinja betriept sie.

²⁹Aulsoo, nämt am met aula Freid em Harn opp un hoolt soone en Iea;

³⁰dan wäajen Christus sien Woakj es hee däm Doot dicht bie jekomen, endäm hee sien Läwen woagd, (oppet Spell sad), doamet hee däm Mangel en junem Deenst fa mie utfeld.