Read De Bibel JHF Filippa 3 Bible Online

Filippa 3 - De Bibel JHF bible

Filippa 3

¹Äwajens, miene Breeda, freit junt em Harn! Junt daut selje to schriewen, es mie nich vedrisslich, fa junt es daut secha.

²Kjikjt de Hunj aun, kjikjt de beese Oabeida aun, kjikjt de Veschniedunk aun.

³Dan wie sent de Beschniedunk, dee em Jeist Gottes Gottesdeenst hoolen un sikj (ons) riemen met Jesus Christus un nich opp daut Fleesch vetruen;

⁴obwool uk ekj opp Fleesch Vetruen ha. Wan irjent een aundra sikj denkjt, opp daut Fleesch to vetruen, ekj noch mea;

⁵ekj sie aum achten Dach beschnäden, ut däm Volkj Israel, vom Staum Benjamin, een Hebräa von Hebräa; nom Jesaz een Farisäa;

⁶nodäm Iewa no een Vefolja de Jemeent, no de Jerajchtichkjeit em Jesaz onen Dodel (fälafrie) jeworden.

⁷Oba waut uk emma mien Jewenst wia, daut ha ekj om Christus haulwen fa Schoden jehoolen;

⁸jo, woarhauft, ekj acht uk aules fa Schoden wäajen de äwatrofne Erkjantnis Christus Jesus, mienem Harn, om dän sient haulwen ekj aules veloaren ha un ekj daut fa Drakj hool, doamet ekj Christus jewenn,

⁹un en am jefungen woa, endäm ekj nich miene ieejne Jerajchtichkjeit ha, dee ut däm Jesaz es, sonda dee derch dän Gloowen aun Christus es, de Jerajchtichkjeit ut Gott derch dän Gloowen;

¹⁰om am to erkjanen un de Krauft von sien Oppstonen un de Jemeenschoft von sien Lieden, endäm ekj sienen Doot jlikj jestalt woa,

¹¹auf ekj veleicht bat daut Oppstonen von de Doodje jelangen woa (mucht).

¹²Nich daut ekj daut aul bejräpen ha ooda aul vollkomen sie; oba ekj joag (sträw) däm no, auf ekj daut uk jejräpen kjrie, endäm ekj uk von Christus [Jesus] jejräpen (jepakt) sie.

¹³Breeda, ekj hool mie selfst nich doafäa, daut jepakt to ha; oba eent doo ekj: ekj vejät daut hinja mie ligjende, un strakj mie no daut ut, waut ver mie es,

¹⁴un ekj joag nodäm Ziel, han nom Kaumfpries de Belooninj Gottes no bowen en Christus Jesus.

¹⁵Wie aula, dee vollkomen sent, well wie soo jesonnen sennen (denkjen); un wan jie en irjent waut aundasch denkjen, woat Gott junt dit uk openboaren.

¹⁶Doch towaut wie jelangt (jekomen) sent, en däm seljen lot ons waundlen.

¹⁷Siet aula toop miene Nofolja, Breeda, un kjikjt opp dee, dee soo waundlen, aus jie ons aus Väabilt ha.

¹⁸Dan väle waundlen, von dee ekj foaken to junt jerät ha, oba nu uk met Hielen saj, daut see Fiend von Christus sien Kjriez sent;

¹⁹dän äa Enj Vedoawnis (Vedaumnis) es, äa Gott de Buck es, un äare Iea en äare Schaund besteit, dee daut Irdische denkjen (em Senn ha).

²⁰Oba onse Heimat (Birjarajcht) es em Himmel, von wuahäa wie uk opp dän Rada (Heilant) dän Harn Jesus Christus luaren,

²¹dee onsen oamseeljen Lief omendren woat, äwareenformich met sienen Lief de Harlichkjeit, no de wirkjsome Krauft, met dee hee kaun, uk aule Dinja sikj to unjaordnen.