Read De Bibel JHF Kolossa 2 Bible Online

Kolossa 2 - De Bibel JHF bible

Kolossa 2

¹Ekj well nämlich, daut jie weeten, waut fa eenen groote Kaumf ekj fa junt ha un dee en Laodizea un aule, dee mien Aunjesecht em Fleesch nich jeseenen ha,

²doamet äare Hoaten jetreest woaren, toopjehoolen (toopjeschloten) en Leew un to aulen Rikjtum de volle Jewesheit von Vestentnis (Ensecht), to Erkjantnis von de Jeheemnisen Gottes, daut es Christus,

³en däm sent aule Schaza de Weisheit un Erkjantnis veborjen.

⁴Dit saj ekj, doamet junt kjeena bedrieecht met de Konst junt to äwaräden (met schmeichelnde Wieed).

⁵Dan wan ekj uk nom Fleesch nu nich bie junt sie, soo sie ekj doch em Jeist bie junt, mie freit daut un see june Ordninj un june Staunthauftichkjeit em Gloowen aun Christus.

⁶Aulsoo, aus jie Christus Jesus, dän Harn, aunjenomen ha, soo waundelt uk en am,

⁷jewartelt un oppjebut en am un faust jeworden em Gloowen, soo aus jie sent jelieet worden, äwaflissich em Dank sajen (dankboa sennen).

⁸Paust opp, daut nich wäa es, dee junt aus Raup wajch fieet derch de weltliche Wissenschoft (Filosofie) un derch ladjet teischen, no Äwaleewrunk von Menschen, no de Dinj de Welt (weltliche Dinj), un nich no Christus.

⁹Dan en am wont de gaunze volle Gottheit kjarpalich (läwendich);

¹⁰un jie sent en am erfelt, dee daut Haupt von jiedre Harschoft un Jewault es;

¹¹en disem sent jie uk beschnäden worden nich met eene von Henj jemoakte Beschniedinj, derch daut auflajen vom fleeschlichen Lief, en de Beschniedinj dee derch Christus es;

¹²met am begroft derch de Doop (Deepen), derch disen sent jie uk met oppjewakjt worden derch dän Gloowen aun de wirkjsome Krauft Gottes, dee am vonne Doodje oppjewakjt haft.

¹³Uk junt, aus jie doot wieren en de Äwaträdungen un Onbeschnäden en junem Fleesch, haft hee junt (ons) met am läwendich jemoakt, endäm hee ons aule Äwaträdungen vejäft haft;

¹⁴un hee haft utjelascht de Schult Hauntschreft (Schultbreef), dee derch de Väaschreften jäajen ons wia, dee haft hee ute Medd wajch jenomen, endäm hee dee aun daut Kjriez noageld;

¹⁵aus hee de Harschoften un de Jewaultje utjetrocken haud, hee stald dee noaktich enne Effentlichkjeit, endäm hee derch daut selje äwa an een Triumf (Siech) hilt.

¹⁶Aulsoo, recht junt kjeena wäajen Moltiet ooda wäajen Drinkjen, ooda wäajen (betrafs) een Fast ooda Nielicht (Niemon) ooda Sabaten,

¹⁷dee een Schauten de tookjinftje Dinj sent, oba de Lief däm Christus.

¹⁸Kjeena saul junt om däm Kaumfpries brinjen, dee sienen ieejnen Wellen deit, en Deemoot un veieet de Enjel, endäm hee en Dinj nenjeit, de hee nich jeseenen haft, gruntloos oppjeblost von sien fleeschlichen Senn,

¹⁹un nich faust helt aum Haupt, von (ut) däm de gaunze Lief, derch de Jelenkja un Sänen unjastett un toopjehoolen woaren, waust en däm waussen Gottes.

²⁰Wan jie met Christus von de Dinj de Welt jestorwen sent, wuarom lot jie junt Väaschreften opplajen, aus läw jie noch en de Welt?

²¹Fot nich aun un schmakj nich un ria nich aun!

²²(Waut aules derch dän Jebruck toom Venichten bestemt es), nodäm Jeboot un Lia de Menschen,

²³(waut es daut, dee zwoa dän Roop (Schien) von Weisheit ha, derch selfst jemoakten Gottesdeenst un en Deemoot, schoonungsloos un hoat jäajen dän (äa) Lief sent, oba nich en irjent eene Iea), toom tofräd stalen von sien Fleesch.