Read De Bibel JHF Kolossa 4 Bible Online

Kolossa 4 - De Bibel JHF bible

Kolossa 4

¹Jie Haren, jäft june Sklowen waut rajcht un opprechtich es (jäft daut waut an traft) es, doa jie weeten, daut uk jie eenen Harn em Himmel ha.

²Aum Jebäd hoolt staunthauft faust, woakt doarenn met Dank sajen,

³un bät tojlikj uk fa ons, daut Gott ons eene Däa fa daut Wuat opmoakt, om daut Jeheemnis von Christus to räden, doawäajen ekj uk jebungen sie,

⁴doamet ekj daut openboa moak, woo ekj räden saul.

⁵Waundelt en Weisheit jäajenäwa dän, dee buten sent, un kjeept de Tiet ut.

⁶Jun Räden saul aulentiet en Leeftol (Jnod), met Solt jewerzt, om to weeten, woo jie eenen jiedren auntwuaden sellen.

⁷Aules, waut mie aunjeit, woat Tiechikus junt bekaunt moaken, dee jeleewda Brooda un trua Deena un Metkjnajcht em Harn,

⁸däm ekj krakjt doawäajen no junt jeschekjt ha, om daut hee june Omstend erfoat un june Hoaten treest,

⁹met Onesimus, däm truen un jeleewden Brooda, dee von junt es; see woaren junt aules vetalen, waut hia väajeit.

¹⁰Aristarchus, lat junt jreessen, mien Metjefangna, un Markus, de Fada von Barnabas, wäajen däm jie Befäl jekjräajen ha, (wan hee no junt kjemt, nämt am opp),

¹¹un Jesus, Justus jenant, dee ut de Beschniedunk sent. Dise auleen sent Metoabeida fa (aum) daut Rikj Gottes, dee mie een Troost jeworden sent.

¹²Epafras lat junt jreessen, dee von junt es, een Kjnajcht Christus Jesus, dee emma fa junt kjamft em Jebäd, doamet jie vollkomen un gaunz äwazeicht en aulem Wellen Gottes stonen.

¹³Soo bezeij ekj am, daut hee väl Mieej haft om (fa) junt un dee en Laodizea un dee en Hierapolis.

¹⁴Lukas lat junt jreessen, dee jeleewda Dokta, un Demas.

¹⁵Jreest de Breeda en Laodizea, un Niemfa un de Jemeent, dee en äa Hus es.

¹⁶Un wan de Breef bie junt jeläst es, soo moakt, daut dee uk enne Jemeent de Laodizea jeläst woat, un daut uk jie dän ut Laodizea läsen;

¹⁷un sajcht to Archippus: Kjikj, opp dän Deenst, dän du em Harn äwanomen (emfangen) hast, daut du däm erfelst.

¹⁸De Gruss met miene, Paulus, Haunt. Denkjt aun miene Faslen. De Jnod es met junt!