Read De Bibel JHF 1. Tessalonicha 3 Bible Online

1. Tessalonicha 3 - De Bibel JHF bible

1. Tessalonicha 3

¹Doawäajen, doa wie daut nich lenja uthoolen kunnen, ha wie daut fa goot jehoolen, auleen en Ateen trigjtobliewen,

²un wie schekjten Timotäus, onsen Brooda un Metoabeida Gottes bie de Vekjindjunk de frooe Bootschoft von Christus, om junt to stoakjen un vemonen (treesten) en jun Gloowen,

³doamet kjeena wankent woat en dise Bedrenkjnisen. (Dan jie selfst weeten, daut wie doatoo enjesat sent;

⁴dan uk aus wie bie junt wieren, säd wie junt verhäa, daut wie woaren bedrenjt woaren, aus et uk passieet es un jie weeten).

⁵Doawäajen uk, daut ekj et nich lenja uthoolen kunn, schekjt ekj, om jun Gloowen to erfoaren, auf nich veleicht de Vesieekja junt vesocht haft un onse Oabeit vejäfs jewast es.

⁶Oba nu, doa Timotäus von junt no ons jekomen es un ons de goode Bootschoft von junen Gloowen un june Leew jebrocht haft, un daut jie ons aulentiet goot en Jedajchnis ha, junt bangen, ons to seenen, aus uk wie junt;

⁷doawäajen Breeda, sent wie en aul onse Noot un Bedrenkjnis äwa junt jetreest worden derch junen Gloowen;

⁸dan (wiels) nu läw wie, wan jie faust stonen em Harn.

⁹Dan waut ver een Dank kje wie Gott fa junt vejelten (brinjen) fa aule Freid, met dee wie ons junt haulwen freien ver onsem Gott;

¹⁰endäm wie Nacht un Dach äwa aule Moten bedden, daut wie jun Aunjesecht seenen un trajchtbrinjen waut en junen Gloowen mangelt.

¹¹Oba hee selfst, onsa Gott un Voda un onsa Har Jesus mucht onsen Wajch no junt enrechten.

¹²Oba junt mucht de Har waussen loten un rikj moaken enne Leew to eenaunda un to aule, (aus uk wie Leew to junt ha),

¹³om june Hoaten to stoakjen, schultloos (onschuldich) en Heilichkjeit ver onsem Gott un Voda, biem Wadakomen von onsem Harn Jesus met aule siene Heilje. [Amen]