Read De Bibel JHF 1. Tessalonicha 5 Bible Online

1. Tessalonicha 5 - De Bibel JHF bible

1. Tessalonicha 5

¹Oba waut de Tieden un de Stunden betraft, Breeda, ha jie daut nich needich, daut junt jeschräwen woat.

²Dan jie weeten selfst jeneiw, daut de Dach det Harn soo aus een Deef enne Nacht kjemt.

³Wan see sajen: Fräd un Sechaheit dan kjemt plazlich (onverhofs) Vedoawen äwa an, aus de Jeburtsweeen äwa dee en aundre Omstend; un see woaren nich wajchranen.

⁴Oba jie Breeda, sent nich en Diestanis, daut junt de Dach aus een Deef äwarauschen kaun;

⁵dan jie aula sent Säns vom Licht un Säns vom Dach; wie sent nich vonne Nacht noch vonne Diestanis.

⁶Aulsoo, lot ons nich schlopen aus dee äwaje, sonda lot ons waka un nichta sennen.

⁷Dan dee doa schlopen, schlopen de Nacht, un dee bedrunken sent, sent de Nacht bedrunken.

⁸Oba wie, dee vom Dach sent, lot ons nichta sennen, aunjetrocken met daut Brostschilt vom Gloowen un de Leew un aus Helm (Kjriejesmetz) met de Hopninj de Seelichkjeit (Radunk).

⁹Dan Gott haft ons nich toom Oaja bestemt, sonda de Seelichkjeit (Radunk) to erlangen derch onsen Harn Jesus Christus,

¹⁰dee fa ons jestorwen es, doamet, auf wie woaken ooda schlopen, wie met am toopläwen.

¹¹Doawäajen ermuntat eenaunda un but eena däm aundren opp, aus jie uk doonen.

¹²Oba wie bedden junt, Breeda, aunerkjant dee mank junt oabeiden, un junt väastonen em Harn un junt vemonen (trajchtwiesen),

¹³un an gaunz huach to hoolen, äwa aule Moten en Leew, wäajen äaren Woakj. Hoolt Fräd metenaunda.

¹⁴Oba wie vemonen junt, Breeda: Wiest dee nich ordentliche trajcht, treest dee mootloose (dän Moot fält), nämt junt de Schwake aun, siet jeduldich met aule.

¹⁵Paust opp, daut kjeena Beeset met Beeset irjentwäm vejelt, sonda sträft aulentiet daut Goodet no unjarenaunda un jäajen aula.

¹⁶Freit junt aulentiet;

¹⁷hoolt aun em Jebäd;

¹⁸en aules dankt, dan dit es de Wellen Gottes en Christus Jesus fa junt.

¹⁹Däm Jeist lascht nich ut;

²⁰veacht nich de Profezeiunk;

²¹oba aules prooft, daut Goodet hoolt faust.

²²Von jiedre Oat Beeset hoolt junt wajch.

²³Oba hee, de Frädensgott, heilicht junt vollstendich (derch un derch); un jun gaunza Jeist un Seel un Lief woaren onen Strof bewoat biem Aunkomen (Wadakomen) von onsem Harn Jesus Christus.

²⁴Tru es, dee junt roopt, dee woat daut uk doonen.

²⁵Breeda, bät fa ons.

²⁶Jreest aule Breeda met däm heiljen Kuss.

²⁷Ekj beschwia junt biem Harn, daut de Breef aule [heilje] Breeda väajeläst woat.

²⁸De Jnod von onsem Harn Jesus [Christus] es met junt!