Read De Bibel JHF Josua 1 Bible Online

Josua 1 - De Bibel JHF bible

Josua 1

¹Un daut passieed no Moses sienem Doot, däm Kjnajcht Gottes, doa räd de Har too Josua, däm Sän Nuns; däm Deena Moses, un säd:

²Mien Kjnajcht Moses es jestorwen; un nu, moak die opp, go äwa disem Jordan, du un dit gaunze Volkj, en daut Launt, daut ekj an, de Kjinja Israel, jäw.

³Jiedra Uat, opp dee june Footsol klunjen woat, junt ha ekj daut jejäft, soo aus ekj too Moses jerät ha.

⁴Von dee Wieste un disem Libanon bat nom groote Stroom, däm Stroom Eufrat, daut gaunze Launt de Hetita, un bat nom groote Mäa jäajen Sonnenunjagank, saul june Jrens sennen.

⁵Daut saul kjeena aule Doag en dienem Läwen ver die bestonen; soo aus ekj met Moses jewast sie, woa ekj met die sennen; ekj woa die nich vesiemen un die nich veloten.

⁶Sie stoakj un mootich! Dan du, du saust dit Volkj daut Launt aus Oaw utdeelen, daut ekj äare Vodasch jeschwuaren ha, an to jäwen.

⁷Blooss sie sea stoakj un mootich, daut du doaropp achst, nom gaunzen Jesaz to doonen, daut mien Kjnajcht Moses die befoolen haft. Go nich doavon auf noch no rajchtsch noch no linkjsch, om daut et die emma jelinjt, wuahan du jeist.

⁸Dit Jesazbuak saul nich von dienem Mul aufgonen, un du saust doaräwa Dach un Nacht denkjen, om daut du doaropp acht jefst, no aulem to doonen, waut doabennen jeschräwen es; dan woascht du opp dienem Wajch Jelinjen ha, un dan woascht du weis haundlen.

⁹Ha ekj die nich befoolen: Sie stoakj un mootich? Vefia die nich un enjst die nich! Dan de Har, dien Gott, es emma met die, wuahan du uk jeist.

¹⁰Un Josua befool de Väastona vom Volkj un säd:

¹¹Got medden derch daut Loaga un befält däm Volkj un sajcht: Moakt junt Äten reed; dan en dree Doag woa jie äwa disem Jordan gonen, om hantokomen, daut Launt entonämen, daut de Har, jun Gott, junt jeft, om daut entonämen.

¹²Un to de Rubenita un to de Gadita un toom haulwen Staum Manasse räd Josua un säd:

¹³Denkjt aun daut Wuat, daut Moses, de Kjnajcht Gottes, junt befoolen haft, endäm hee säd: De Har, jun Gott, veschauft junt Ru un jeft junt dit Launt.

¹⁴June Frues, june Kjinja un jun Vee sellen en däm Launt bliewen, daut Moses junt aun dise Sied vom Jordan jejäft haft; oba jie, aule Kjrichsmana, sellen bewaufnet, ver june Breeda äwagonen un an halpen,

¹⁵bat de Har june Breeda Ru schauft aus junt, un uk see daut Launt enjenomen ha, daut de Har, jun Gott, an jeft. Dan sell jie en jun ieejnet Launt trigjkomen un daut nämen, daut Moses, de Kjnajcht Gottes, junt jejäft haft, aun dise Sied vom Jordan, jäajen Sonnenoppgank.

¹⁶Un see auntwuaden Josua un säden: Aules, waut du ons befoolen hast, well wie doonen, un wuahan du ons schekjen woascht, well wie gonen.

¹⁷No aulem aus wie Moses jehorcht ha, aulsoo well wie die jehorchen. Blooss mucht de Har, dien Gott, met die sennen, aus hee met Moses jewast es!

¹⁸Jiedra Maun, dee dienem Befäl wadaspanstich es un nich opp diene Wieed en aulem hieet, waut du ons befälst, dee saul stoawen. Blooss sie stoakj un mootich!