Read De Bibel JHF Josua 10 Bible Online

Josua 10 - De Bibel JHF bible

Josua 10

¹Un daut passieed, aus Adoni-Zedek, de Kjennich von Jerusalem, hieed, daut Josua Ai enjenomen un venicht haft, daut hee Ai un sienem Kjennich krakjt soo jedonen, aus hee Jericho un sienem Kjennich jedonen haud, un daut de Bewona von Gibeon Fräd met Israel jemoakt hauden un en äare Medd wieren;

²doa enjsten see sikj sea; dan Gibeon wia eene groote Staut, aus eene de Kjennichsstäda, un wia jrata aus Ai, un aul siene Mana wieren Helden.

³Un Adoni-Zedek, de Kjennich von Jerusalem, schekjt no Hoham, däm Kjennich von Hebron, un no Piream, däm Kjennich von Jarmut, un no Jafija, däm Kjennich von Lachisch, un no Debir, däm Kjennich von Eglon, un leet an sajen:

⁴Komt no mie nopp un halpt mie, daut wie Gibeon schlonen; dan dee ha met Josua un met de Kjinja Israel Fräd jemoakt!

⁵Doa vesaumelden sikj un jinjen rauf dee 5 Kjennichs de Amorita, de Kjennich von Jerusalem, de Kjennich von Hebron, de Kjennich von Jarmut, de Kjennich von Lachisch, de Kjennich von Eglon, see un aul äa Häaloaga; un see loagaden sikj jäajen Gibeon un kjamften jäajen an.

⁶Un de Mana von Gibeon schekjten no Josua en daut Loaga no Gilgal un leeten am sajen: Trakj diene Henj nich trigj von diene Kjnajchts; komm schwind no ons nopp un rad ons un halp ons; dan aule Kjennichs de Amorita, dee de Boaj bewonen, ha sikj jäajen ons vesaumelt.

⁷Un Josua jinkj von Gilgal nopp, hee un aulet Kjrichsvolkj met am un aule kjraftje (stoakje) Mana.

⁸Un de Har räd too Josua: Ha nich Angst fa an, dan ekj ha an en diene Haunt jejäft; kjeen Maun von an woat ver die bestonen kjennen.

⁹Un Josua kaum plazlich äwa an; de gaunze Nacht jinkj hee von Gilgal nopp.

¹⁰Un de Har vewerd an ver Israel; un schluach an en eene groote Schlacht bie Gibeon un juach an no oppem Wajch de Aunboaj von Bat-Horon un schluach an bat Aseka un bat Makkeda.

¹¹Un daut passieed, aus see ver Israel randen, - see wieren aum raufgonen von Bat-Horon - doa schmeet de Har groote Steena vom Himmel opp an rauf, bat Aseka, daut see storwen. Daut wieren dee, derch Hoagelsteena storwen, mea aus dee, dee de Kjinja Israel met daut Schwieet ombrochten.

¹²Doa räd Josua to däm Harn, aun däm Dach, doa de Har de Amorita ver de Kjinja Israel han gauf, un räd ver de Uagen Israel: Sonn, sto stell bie Gibeon; un du, Mon, enne Läacht Ajjalon!

¹³Un de Sonn stunt stell, un de Mon bleef stonen, bat daut Volkj aun äare Fiend Rach jeeeft haud. Es daut nich em Buak de Fromme jeschräwen? Un de Sonn bleef medden aum Himmel stonen un spood sikj nich unjatogonen, onjefäa eenen gaunzen Dach.

¹⁴Un daut wia kjeen Dach aus disa, ver am un no am, daut de Har opp ne Stemm von eenem Mensch jehieet haud; dan de Har kjamft fa Israel.

¹⁵Un Josua, un gaunz Israel met am, jinjen en daut Loaga no Gilgal trigj.

¹⁶Oba jane 5 Kjennichs randen un vestuaken sikj enne Heel von Makkeda.

¹⁷Un daut wort Josua berecht un jesajcht: De 5 Kjennichs sent jefungen worden, vestoaken enne Heelen von Makkeda.

¹⁸Un Josua säd: Doot groote Steena aum Engank de Heel, un stalt Mana doaväa, om an too bewoaken.

¹⁹Oba jie, stot nich stell, joagt june Fiend no un schlot de Hinjabläwne; lot an nich en äare Städa komen, dan de Har, jun Gott, haft an en june Haunt jejäft!

²⁰Un daut passieed, aus Josua un de Kjinja Israel toenj wieren met dise - sea groote Schlacht, bat see oppjeräwen wieren, (un daut, waut von an äwa bleef, enne fauste Städa jerant wia),

²¹doa kaum daut gaunze Volkj en Fräd no Josua trigj, en daut Loaga no Makkeda; kjeena spetzt siene Tung jäajen de Kjinja Israel.

²²Un Josua säd: Moakt däm Engank vonne Heel op un brinjt de fief Kjennichs ut de Heel rut, no mie!

²³Un see deeden aulsoo un brochten dise 5 Kjennichs ut de Heel no am rut: Däm Kjennich von Jerusalem, däm Kjennich von Hebron, däm Kjennich von Jarmut, däm Kjennich von Lachisch un däm Kjennich von Eglon.

²⁴Un daut passieed, aus see dise Kjennichs no Josua rut jebrocht hauden, doa roopt Josua aule Mana von Israel un säd to de Bowaschte vom Kjrichsvolkj, dee met am jegonen wieren: Komt noda, sat june Feet oppe Halsa dise Kjennichs! Un see kaumen noda un saden äare Feet opp äare Halsa.

²⁵Un Josua säd to an: Habt nich Angst un enjst junt nich, siet stoakj un mootich! Dan soo woat de Har aul june Fiend doonen jäajen dee jie strieden.

²⁶Un nodäm schluach Josua an un leet an ombrinjen un hong an aun 5 Beem; un see hongen aune Beem bat Oppenowent.

²⁷Un daut passieed too Tiet aus de Sonn unja jinkj, doa befool Josua, un maun naum an von de Beem rauf un schmeet an enne Heel, woa see sikj vestoaken hauden; un maun läd groote Steena aun däm Engank de Heel, dee bat opp disem Dach doa sent.

²⁸Un Josua naum aun janem Dach Makkeda en hee schluach daut met däm schoapen Schwieet; un sienen Kjennich, de Staut un aule Seelen, dee doa wieren, vebaunt hee; hee leet kjeenem Wajchjeranden äwa; un hee deed däm Kjennich von Makkeda, soo aus hee däm Kjennich von Jericho jedonen haud.

²⁹Un Josua, un gaunz Israel met am, jinjen von Makkeda no Libna un streed jäajen Libna.

³⁰Un de Har jeef uk daut enne Haunt Israels, met sienem Kjennich; un hee schluach daut met däm schoapen Schwieet un aule Seelen, dee doa wieren; hee leet kjeenem Wajchjeranden von doa äwa; un hee deed sienem Kjennich, soo aus hee däm Kjennich von Jericho jedonen haud.

³¹Un Josua, un gaunz Israel met am, jinkj von Libna no Lachisch; un hee beloagad daut un street jäajen an.

³²Un de Har jeef Lachisch enne Haunt Israels; un hee neem daut aum tweeden Dach en un schluach daut met dän schoapen Schwieet un aule Seelen, dee doa wieren, no aulem, waut hee Libna jedonen haud.

³³Donn jinkj Horam, de Kjennich von Geser, nopp, om Lachisch too halpen; oba Josua schluach am un sien Volkj, bat am kjeena äwableef.

³⁴Un Josua, un gaunz Israel met am, jinkj von Lachisch no Eglon; un see beloagaden daut un streeden jäajen an.

³⁵Un see neemen daut aun däm seljen Dach en un schluagen daut met däm schoapen Schwieet; un aule Seelen, dee doa wieren, vebaunt hee aun däm seljen Dach, no aulem, waut hee Lachisch jedonen haud.

³⁶Un Josua, un gaunz Israel met am, jinkj von Eglon no Hebron nopp, un see streeden jäajen an.

³⁷Un see neemen daut en un schluagen daut met däm schoapen Schwieet, met sienem Kjennich un aul siene Städa un aule Seelen, dee doa wieren; hee leet kjeene Wajchranende äwa, no aulem, waut hee Eglon jedonen haud; un hee vebaunt daut un aule Seelen, dee doa wieren.

³⁸Un Josua, un gaunz Israel met am, jinjen no Debir un streeden jäajen an.

³⁹Un hee neem daut met sienem Kjennich en un aule Städa, un see schluagen an met däm schoapen Schwieet un vebaunten aule Seelen, dee doa wieren; hee leet kjeene Wajchranende äwa; aus hee Hebron jedonen haud, un aus hee Libna un sienem Kjennich jedonen haud, aulsoo deed hee Debir un sienem Kjennich.

⁴⁰Un Josua schluach daut gaunze Launt, oppe Boaj un däm Sieden un de Läacht un de Aunboaj un aul äare Kjennichs; hee leet kjeene Wajchranende äwa; un aules, waut Odem haud, vebaunt hee, soo aus de Har, de Gott Israels, befoolen haud.

⁴¹Un Josua schluach an von Kades-Barnea bat Gasa, un daut gaunze Launt Gosen bat Gibeon.

⁴²Un aul dise Kjennichs un äa Launt naum Josua opp eenmol; dan de Har, de Gott Israels, street fa Israel.

⁴³Un Josua, un gaunz Israel met am, jinjen en daut Loaga no Gilgal trigj.