Read De Bibel JHF Josua 11 Bible Online

Josua 11 - De Bibel JHF bible

Josua 11

¹Un daut passieed, aus Jabin, de Kjennich von Hazor, daut hieed, schekjt hee no Jobab, däm Kjennich von Madon, un nom Kjennich von Schimron un nom Kjennich von Akschaf,

²un no de Kjennichs, dee jäajen Nuaden wieren enne Boaj un enne Läacht siedlich von Kinneroth un enne Läacht un enne Aunboaj von Dor jäajen Wasten,

³no de Kanaanita jäajen Oosten un jäajen Wasten, un no de Amorita un no de Hetita un no de Perisita un no de Jebusita enne Boaj, un no de Hewita aum Boajch Hermon em Launt Mizpa.

⁴Un see jinjen ut, see un aul äare Häalogasch met an, een grootet Volkj, aus de Saunt aum Mäa, aun Menj, un sea väl Pieed un Woages.

⁵Un aul dise Kjennichs troffen toop un kaumen un loagaden sikj metenaunda aum Wota Merom, om met Israel too strieden.

⁶Doa säd de Har too Josua: Enjst die nich ver an; dan Morjen om dise Tiet well ekj an aula jeschloagen ver Israel hanjäwen; äare Pieed saust lom lajen un äare Woages met Fia vebrennen.

⁷Un Josua, un aulet Kjrichsvolkj met am, kaum plazlich äwa an, aum Wota Merom, un see äwafollen an.

⁸Un de Har jeef an enne Haunt Israels, un see schluagen an un juagen an bat Sidon no, de groote Staut, un bat Misrefot-Maim un bat enne Läacht von Mizpa, jäajen Oosten; un see schluagen an, bat an kjeen Wajchranenda äwableef.

⁹Un Josua deed an, aus de Har am jesajcht haud: Äare Pieed läd hee lom, un äare Woages vebrend hee met Fia.

¹⁰Un Josua jinkj aun dee selje Tiet trigj un naum Hazor en, un sienen Kjennich schluach hee met daut Schwieet; dan Hazor wia verhäa de Hauptstaut aul dise Kjennichrikjs.

¹¹Un see schluagen aule Seelen, dee doa wonden, met däm schoapen Schwieet, endäm see an vebaunten; nuscht bleef äwa, waut Odem haud, un Hazor vebrend hee met Fia.

¹²Un aule Städa von dise Kjennichs, met äare Kjennichs, naum Josua en un schluach an met däm schoapen Schwieet un vebrend an, soo aus Moses, de Kjnajcht Gottes, befoolen haud.

¹³Blooss aul de Städa, dee opp äare Aunboaj stunden, vebrend Israel nich; utjenomen Hazor auleen, daut vebrend Josua.

¹⁴Un aulen Raup von dise Städa un daut Vee plindaden de Kjinja Israel fa sikj; doch aule Menschen schluagen see met däm schoapen Schwieet, bat see an vetilcht hauden; see leeten nuscht äwa, waut Odem haud.

¹⁵Aus de Har Moses, sienem Kjnajcht, befoolen haud, aulsoo befool Moses Josua, un aulsoo deed Josua; hee leet nuscht fälen von aulem, waut de Har däm Moses befoolen haud.

¹⁶Un Josua naum dit gaunze Launt, de Boaj un däm gaunzen Sieden un daut gaunze Launt Gosen un de Läacht un de Stapen, un de Boaj Israel un siene Läachten,

¹⁷vom kolen Boaj, daut jäajen Seir oppsteit, bat Baal-Gad enne Läacht vom Libanon; unjen aum Boajch Hermon; un aul äare Kjennichs jreep hee un schluach an un brocht an om.

¹⁸Lange Tiet fieed Josua Kjrich met aul dise Kjennichs.

¹⁹Daut wia kjeene Staut, dee sikj de Kjinja Israel en Fräd erjeef, buta de Hewita, dee bie Gibeon wonden, aules naumen see met Kjrich en.

²⁰Dan von däm Harn wia daut, daut see äa Hoat em Kjrich vehoaden jäajen Israel, doamet see vebaunt worden, onen daut an Jnod bewäsen wort, sonda doamet see vetilcht wudden, soo aus de Har däm Moses befoolen haud.

²¹Un Josua kaum aun dee selje Tiet un rott de Enakim ut vonne Boaj, von Hebron, von Debir, von Anab un von däm gaunzen Boaj Juda un von däm gaunzen Boaj Israel; Josua vebaunt an met äare Städa.

²²Daut bleewen kjennen Enakim en däm Launt de Kjinja Israel äwa; blooss en Gasa, en Gat un en Aschdod bleewen see äwa.

²³Un soo naum Josua daut gaunze Launt, no aulem, waut de Har too Moses jerät haud; un Josua jeef daut Israel toom Oawdeel, no äare Aufdeelinj, no äare Stam. Un daut Launt haud Ru vom Kjrich.