Read De Bibel JHF Josua 14 Bible Online

Josua 14 - De Bibel JHF bible

Josua 14

¹Un dit es et, waut de Kjinja Israel aus Oawgoot em Launt Kanaan kjräajen, waut Eleasar, de Priesta, un Josua, de Sän Nuns, un de Heipta, de Stam Vodasch de Kjinja Israel an aus Oawdeel utdeelden,

²derch daut Loss von äarem Oawdeel; soo aus de Har derch Moses befoolen haud betrafs de 9 Stam un daut haulwe Staum.

³Dan daut Oawdeel de twee Stam un däm haulwen Staum haft Moses aun jane Sied vom Jordan jejäft; oba de Leviten haud hee kjeen Oawdeel en äare Medd jejäft.

⁴Dan Josef siene Säns worden 2 Stam, Manasse un Efraim; un maun jeef de Leviten kjeen Deel em Launt, buta Städa toom Wonen un Weidlaunt fa äa Vee un fa äa Hab un Goot.

⁵Soo aus de Har däm Moses befoolen haud, aulsoo deeden de Kjinja Israel, un see deelden daut Launt.

⁶Un de Kjinja Juda jinjen en Gilgal no Josua; un Kaleb, de Sän Jefunnes, de Kenisita, säd to am: Du kjanst daut Wuat, daut de Har too Moses, däm Maun Gottes, mient- un dient- haulwen en Kades-Barnea jesajcht haft.

⁷40 Joa wia ekj oolt, aus Moses, de Kjnajcht Gottes, mie von Kades-Barnea utschekjt, om daut Launt auntoseenen; un ekj brocht am Auntwuat, aus mie daut em Hoaten wia.

⁸Un miene Breeda, dee met mie noppjegonen wieren, muaken daut Hoat vom Volkj vezoagt; oba ekj sie däm Harn, mienem Gott, tru nojefolcht.

⁹Doa schwua Moses aun janem Dach un säd: Wan nich daut Launt, opp däm dien Foot jestäajen es, saul die un diene Säns toom eewjen Oawdeel woaren! Dan du best däm Harn, mienem Gott, tru nojefolcht.

¹⁰Un nu kjikj, de Har haft mie aum Läwen erhoolen, soo aus hee jesajcht haft, dise 45 Joa, von doa de Har dit Wuat too Moses jerät haft, aus Israel enne Wieste omhäa jinkj; un nu kjikj, ekj sie vondoag 85 Joa oolt.

¹¹Ekj sie vondoag noch soo stoakj aus aun janem Dach, doa Moses mie utschekjt; aus miene Krauft donn wia, soo es miene Krauft uk nu toom Kjamfen un om ut- un entogonen.

¹²Un nu jeef mie dise Jäajent, von dee de Har aun janem Dach jerät haft; dan du hast aun janem Dach jehieet, daut de Enakim doa sent un en groote, fauste Städa wonen. Veleicht es de Har met mie, daut ekj an utrott, soo aus de Har jerät haft.

¹³Un Josua säajend am un jeef däm Kaleb, däm Sän Jefunnes, Hebron toom Oawdeel.

¹⁴Doahäa wort Hebron däm Kaleb, däm Sän Jefunnes, däm Kenisita, toom Oawdeel jejäft, bat opp disem Dach, wiels hee däm Harn, däm Gott Israels, tru nojefolcht wia.

¹⁵De Nomen Hebron wia oba ver däm: Staut Kirjat-Arba; hee wia de jratsta Maun unja de Enakim. Un daut Launt haud Ru vom Kjrich.