Read De Bibel JHF Josua 17 Bible Online

Josua 17 - De Bibel JHF bible

Josua 17

¹Un daut Loss foll fa däm Staum Manasse, dan hee wia Josef sien Ieeschtjebuarna — fa Makir, Manasse sien Ieeschtjebuarna, däm Voda Gilead; doa hee een Kjrichsmaun wia, soo wudd am Gilead un Baschan toom Deel.

²Un daut wort fa Manasse siene äwaje Säns, no äare Jeschlajchta; fa de Säns Abieser un fa de Säns Heleks un fa de Säns Asriel un fa de Säns Sichem un fa de Säns Hefer un fa de Säns Schemida; daut wieren Manasse siene Kjinja, von Josef sienem Sän, de Menliche, no äare Jeschlajchta.

³Un Zelofchad, Hefer sien Sän, von Gilead sienem Sän, vom Sän Makir, däm Sän von Manasse, haud kjeene Säns, sonda blooss Dajchta; un daut sent de Nomes von siene Dajchta: Machla un Noa, Chogla, Milka un Tirza.

⁴Un see kjeemen no Eleasar, däm Priesta, un no Josua, däm Sän Nuns, un ver de Ferschten, un säden: De Har haft Moses befoolen, ons een Oawdeel unja onse Breeda to jäwen. Un hee jeef an, nom Befäl Gottes, een Oawdeel unja äarem Voda siene Breeda.

⁵Un soo follen däm Manasse 10 Deel too, butrem Launt Gilead un Baschan, daut aun jane Sied vom Jordan licht;

⁶dan Manasse siene Dajchta kjräajen een Oawdeel unja siene Säns. Oba daut Launt Gilead wort de äwaje Säns von Manasse toojedeelt.

⁷Un Manasse siene Jrens wia von Aser no Mikmetat, daut ver Sichem licht; un de Jrens jinkj rajchsch no de Bewona von En-Tappuach han.

⁸Däm Manasse jehieet daut Launt Tappuach; oba Tappuach, aune Jrens Manasse, jehieet de Kjinja Efraim.

⁹Un de Jrens jinkj rauf nom Bach Kana, siedlich vom Stroom. Dise Städa jehieeden Efraim enne medd de Städa Manasse. Un Manasse siene Jäajent wia nuadlich vom Stroom, un sien Utgank wia nom Mäa han.

¹⁰Daut nom Sieden han jehieet Efraim, un jäajen Nuaden däm Manasse; un daut Mäa wia siene Jrens. Un jäajen Nuaden staden see aun Aser, un jäajen Oosten aun Isachar.

¹¹Un Manasse kjrieech en Isachar un en Aser: Bat-Schean un siene Darpa, un Jibleam un siene Darpa, un de Bewona von Dor un siene Darpa, un de Bewona von En-Dor un siene Darpa, un de Bewona von Taanak un siene Darpa, un de Bewona von Megiddo un siene Darpa, de dree Aunboaj.

¹²Oba de Kjinja Manasse kunnen dise Städa nich nämen, un de Kanaanita wullen en disem Launt bliewen.

¹³Un daut passieed, aus de Kjinja Israel stoakj worden, doa muaken see de Kanaanita too Deenstoabeida; oba see juagen dee nich rut.

¹⁴Un de Kjinja Josef räden too Josua un säden: Wuarom hast du mie blooss een Loss un een Deel aus Oawdeel jejäft, doa ekj doch een grootet Volkj sie, soo aus de Har mie bat nu jesäajent haft?

¹⁵Un Josua säd to an: Wan du een grootet Volkj best, soo go nopp en däm Woolt un hak die doa Plauz ut en däm Launt de Perisita un de Refaim, wan die de Boaj Efraim too enj sent.

¹⁶Un de Kjinja Josef säden: De Boaj rieekjen fa ons nich ut, un bie aule Kanaanita, dee enne Läacht wonen, sent iesane Woages; bie dän, dee en Bat-Schean un siene Darpa, un bie dän, dee enne Läacht Jesreel wonen.

¹⁷Doa räd Josua toom Hus Josef, too Efraim un to Manasse, un säd: Du best een grootet Volkj un hast eene groote Krauft; nich een Loss saust du haben,

¹⁸sonda de Boaj sellen die toom Deel woaren. Doa daut een Woolt es, soo hak am ut, un dee sellen die bat aum Enj jehieren; dan du woascht de Kanaanita rutjoagen, wan see uk iesane Woages ha un wan see uk stoakj sent.