Read De Bibel JHF Josua 18 Bible Online

Josua 18 - De Bibel JHF bible

Josua 18

¹Un de gaunze Jemeent de Kjinja Israel vesaumeld sikj no Silo, un see schluagen doa daut Zelt de Bejäajnunk opp; un daut Launt wia an unjadon.

²Un daut bleewen unja de Kjinja Israel 7 Stam äwa, dän maun daut Oawdeel noch nich utjedeelt haud.

³Doa säd Josua to de Kjinja Israel: Woo lang woa jie junt noch schloff vehoolen, hantogonen, om daut Launt entonämen, daut de Har, de Gott june Vodasch, junt jejäft haft?

⁴Nämt junt von jiedrem Staum 3 Mana, un ekj well an utschekjen; un dee sellen sikj oppmoaken un daut Launt derchgonen un daut nom Verhältnis von äarem Oawdeel oppschriewen, un dan no mie komen.

⁵Un see sellen daut unja sikj en 7 Deele vedeelen. Juda saul en siene Jäajent em Sieden bliewen, un daut Hus Josef saul en siene Jäajent em Nuaden bliewen.

⁶Oba jie sellen daut Launt en 7 Dell oppschriewen un mie daut hiahäa brinjen; un ekj woa junt daut Loss schmieten, hia ver däm Harn, onsem Gott.

⁷Dan de Leviten ha kjeen Deel en june Medd, dan daut Priestatum es äa Oawdeel. Un Gad un Ruben un de haulwa Staum Manasse ha aun jane Sied vom Jordan, jäajen Oosten, äa Oawdeel jekjräajen, daut Moses, de Kjnajcht Gottes, an jejäft haft.

⁸Un de Mana muaken sikj opp un jinjen han. Un Josua befool an, dee hanjinjen, om daut Launt opptoschriewen, un säd: Got han un got daut Launt derch un schriewt daut opp un komt wada no mie; un hia woa ekj junt daut Loss schmieten ver däm Harn, en Silo.

⁹Un de Mana jinjen han un jinjen daut Launt derch un schreewen daut opp, no de Städa, too 7 Deel opp en een Buak; un see kaumen trigj no Josua, en daut Loaga, no Silo.

¹⁰Doa schmeet an Josua daut Loss en Silo ver däm Harn. Un Josua deelt doa daut Launt de Kjinja Israel ut no äarem Aundeel.

¹¹Un daut Loss foll fa däm Staum de Kjinja Benjamin no äare Jeschlajchta. Un dee Jäajent fa äarem Loss kaum tweschen de Kjinja Juda un de Kjinja Josef.

¹²Un äare Jrensen aune Nuadsied funk aum Jordan aun; un de Jrens jinkj nopp no de Nuadsied von Jericho un jinkj oppe Boaj jäajen Wasten, un äa Utgank wia no de Wieste von Bat-Awen han;

¹³un von doa jinkj de Jrens äwa no Lus, no de siedliche Sied von Lus, daut es Betel; un de Jrens jinkj rauf no Aterot-Addar, bie däm Boajch, dee siedlich unjrem Bat-Horon es. —

¹⁴Un de Jrens jinkj rom un dreid sikj no de Wastsied, siedlich vom Boajch, dee ver Bat-Horon nom Sieden es, un äa Utgank wia no Kirjat-Baal han, daut es Kirjat-Jearim, eene Staut de Kjinja Juda; daut wia de Wastsied.

¹⁵Un de siedliche Sied funk aum Enj von Kirjat-Jearim; un de Jrens jinkj nom Wasten han, un jinkj bat de Wotakjwal Neftoach han;

¹⁶un de Jrens jinkj rauf nom Enj vonne Boaj, dee ver de Läacht vom Sän Hinnom en de Läacht Refaim jäajen Nuaden licht; un jinkj de Läacht Hinnom rauf no de siedliche Sied de Jebusita, un see jinkj rauf no En-Rogel;

¹⁷un trock nuadlich rom un jinkj no En-Semes, un see jinkj no Gelilot han, daut däm Aunboaj Adummim jäajenäwa licht; un see jinkj rauf nom Steen Bohan, vom Sän Ruben,

¹⁸un jinkj äwa no de Sied, dee de Araba nuadlich jäajenäwa licht, un jinkj rauf no de Läacht;

¹⁹un de Jrensen jinjen äwa no de Nuadsied von Bat-Hogla, un de Utgank vonne Jrens wia de nuadliche Tung vom Soltmäa, nom siedlichen Enj vom Jordan han. Daut wia de Siedliche Jrens.

²⁰Un de Jordan bejrenst daut aune Oostsied. Daut wia daut Oawdeel de Kjinja Benjamin, runtom no siene Jrensen, no äare Jeschlajchta.

²¹Un de Städa de Stam de Kjinja Benjamin, no äare Jeschlajchta, wieren: Jericho un Bat-Hogla un Emek-Keziz,

²²un Bat-Araba un Zemaraim un Betel,

²³un Awim un Para un Ofra,

²⁴un Kefar-Ammoni un Ofni un Geba: 12 Städa un äare Darpa;

²⁵Gibeon un Rama un Beerot,

²⁶un Mizpa un Kefira un Moza,

²⁷un Rekem un Jirpeel un Tarala,

²⁸un Zela, Elef, un de Jebusita, daut es Jerusalem, Gibeat, Kirjat: 14 Städa un äare Darpa. Daut wia daut Oawdeel de Kjinja Benjamin no äare Jeschlajchta.