Read De Bibel JHF Josua 20 Bible Online

Josua 20 - De Bibel JHF bible

Josua 20

¹Un de Har räd too Josua un säd:

²Räd to de Kjinja Israel un saj: Bestemmt jie junt de Toofluchtsstäda, von dee ekj derch Moses to junt jerät ha,

³daut een Dootschlona doahan rant, dee eenen ut Veseenen, onweetent, omjebrocht haft; un dee sent junt toom Toofluchtuat ver däm Blootracha.

⁴Un hee saul en eene von dise Städa ranen, un aun däm Engank vom Stautdooa stonen un ver de Uaren de Eltestasch von jane Staut siene Sach väabrinjen; un see sellen am no sikj enne Staut oppnämen un am eenen Uat jäwen, daut hee bie an wont.

⁵Un wan de Blootracha am nojajcht, soo sellen see däm Dootschlona nich en siene Haunt jäwen; dan hee haft sienen Näakjsten onweetent dootjeschloagen, un hee haust am verhäa nich.

⁶Un hee saul en jane Staut wonen, bat hee ver de Jemeent toom Jerecht jestonen haft, bat däm Doot vom Huagapriesta, dee en jane Doag sennen woat; un dan mucht de Dootschlona trigj gonen un en siene Staut un en sien Hus komen, en dee Staut, ut dee hee wajchjerant es.

⁷Un see heilijde Kedes en Galiläa, enne Boaj Naftali, un Sichem enne Boaj Efraim, un Kirjat-Arba, daut es Hebron, enne Boaj Juda.

⁸Un aun jane Sied vom Jordan ver Jericho, jäajen Oosten, bestemden see Bezer enne Wieste, enne Läacht, vom Staum Ruben; un Ramot en Gilead, vom Staum Gad; un Golan en Baschan, vom Staum Manasse.

⁹Daut wieren de bestemden Städa fa de Kjinja Israel un fa däm Framden, dee en äare Medd wonen, om daut doahan een jiedra rant, dee eenem onweetent dootjeschloagen haud, doamet hee nich derch de Haunt vom Blootracha stoaft, bat hee ver de Jemeent jestonen haft.