Read De Bibel JHF Josua 23 Bible Online

Josua 23 - De Bibel JHF bible

Josua 23

¹Un daut passieed no väl Doag, nodäm de Har Israel runtom von aul siene Fiend Ru jeschaufen haud, aus Josua oolt jeworden wia, huach aun Doag,

²doa roopt Josua gaunz Israel; siene Eltestasch un siene Heipta un siene Rechta un siene Väastona, un säd to an: Ekj sie oolt jeworden, huach aun Doag;

³un jie, jie ha aules jeseenen, waut de Har, jun Gott, aul dise Nazionen junthaulwen jedonen haft. Dan de Har, jun Gott, hee es et, dee fa junt jesträden haft.

⁴Kjikjt, ekj ha junt dise äwaje Nazionen derch Loss aus Oawdeel toojedeelt, no june Stam, vom Jordan aun, (soo aus aule Nazionen, dee ekj utjerot ha), bat aun daut groote Mäa jäajen Sonnenunjagank.

⁵Un de Har, jun Gott, hee selfst woat an ver junt rutsteeten un an ver junt rutjoagen; un jie woaren äa Launt nämen, soo aus de Har, jun Gott, to junt jerät haft.

⁶Soo hoolt nu sea faust doaraun, aules too hoolen un to doonen, waut em Jesazbuak Moses jeschräwen es, daut jie doavon nich aufgonen noch no rajchtsch noch no linkjsch,

⁷daut jie nich unja dise Nazionen komen, dise, dee bie junt äwa jebläwen sent, un aum Nomen äare Jetta nich denkjen un nich bie an schwieren, un an nich deenen un junt uk nich ver an hanschmieten!

⁸Sonda däm Harn, junem Gott, sell jie aunhenjen, soo aus jie bat opp disem Dach jedonen ha.

⁹Un de Har haft stoakje un groote Nazionen ver junt rutjejoacht; un jie — kjeena haft ver junt staunt jehoolen bat opp disem Dach:

¹⁰Een Maun von junt jajcht 1 000; dan de Har, jun Gott, hee es et, dee fa junt kjamft, soo aus hee to junt jerät haft.

¹¹Soo habt acht opp june Seelen, daut jie däm Harn, junem Gott, leewen!

¹²Dan wan jie junt aufdreien un junt aune Äwaje von dise Nazionen henjen, dise, dee bie junt äwa jebläwen sent, un jie gonen met an een Frintschoftsbunt en un komen unja an, un see unja junt:

¹³Soo weet, jewess, daut de Har, jun Gott, wiedahan nich woat, dise Nazionen ver junt rutjoagen; un see woaren junt to eene Schlenj woaren un to een Faul, un to eene Jeissel aun june Sied un to eene Hachel en june Uagen, bat jie omkomen — ut disem gooden Launt, daut de Har, jun Gott, junt jejäft haft.

¹⁴Un Kjikj, ekj go vondoag däm Wajch de gaunze Ieed; un jie weeten met junem gaunzem Hoaten un met june gaunze Seel, daut nich een Wuat doahan jefollen es von aul de goode Wieed, dee de Har, jun Gott, äwa junt jerät haft; un dee sent junt aula passieed, nich een Wuat doavon es doahan jefollen.

¹⁵Oba daut woat passieren, soo aus jiedret goode Wuat äwa junt jekomen es, daut de Har, jun Gott, to junt jerät haft, aulsoo woat de Har jiedret beese Wuat äwa junt komen loten, bat hee junt ut disem gooden Launt vetilcht haft, daut de Har, jun Gott, junt jejäft haft.

¹⁶Wan jie däm Bunt Gottes, junem Gott, däm hee junt befoolen haft, äwaträden, un hangonen un aundre Jetta deenen un junt ver an hanschmieten, soo woat de Oaja Gottes jäajen junt oppflaumen, un jie woaren schwind omkomen — ut däm gooden Launt, daut hee junt jejäft haft.