Read De Bibel JHF Josua 24 Bible Online

Josua 24 - De Bibel JHF bible

Josua 24

¹Un Josua vesaumeld aule Stam Israels no Sichem, un hee roopt de Eltestasch von Israel un siene Heipta un siene Rechta un siene Väastona; un see stalden sikj ver Gott.

²Un Josua räd toom gaunzen Volkj: Soo sajcht de Har, de Gott Israels: June Vodasch wonden ver oole Tieden aun jane Sied vom Stroom, Tara, däm Voda von Abraham un däm Nahor sien Voda, un see deenden aundre Jetta.

³Un ekj naum Abraham, junem Voda, von jane Sied vom Stroom un leet am derch daut gaunze Launt Kanaan gonen, un ekj vemieed sienen Somen un jeef am Isaak.

⁴Un däm Isaak jeef ekj Jakob un Esau; un däm Esau jeef ekj daut Boajlaunt Seir, daut to besetten; un Jakob un siene Säns jinjen rauf no Ägipten.

⁵Un ekj schekjt Moses un Aaron un schluach Ägipten, soo aus ekj en siene Medd jedonen ha; un nodäm fieed ekj junt rut.

⁶Un ekj fieed june Vodasch ut Ägipten wajch, un jie kaumen aun daut Mäa; un de Ägipta juagen june Vodasch met Woages un met Pieed bat aun däm Schelpmäa no.

⁷Doa schrieejen see to däm Harn, un hee sad Diestanis tweschen junt un de Ägipta un fieed daut Mäa äwa an un bedakjt an; un june Uagen ha jeseenen, waut ekj aune Ägipta jedonen ha. Un jie wonden eene lange Tiet enne Wieste.

⁸Un ekj brocht junt en daut Launt de Amorita, dee aun jane Sied vom Jordan wonen, un dee streeden jäajen junt; un ekj jeef an en june Haunt, un jie naumen äa Launt en, un ekj vetiljd an ver junt.

⁹Doa stunt Balak opp, de Sän Zippor, de Kjennich von Moab, un street jäajen Israel; un hee schekjt han un leet Bieleam, däm Sän Beor, roopen, om junt too vefluchen.

¹⁰Oba ekj wull nich opp Bieleam hieren, un hee säajend junt välmea; un ekj rad junt ut siene Haunt.

¹¹Un jie jinjen äwa däm Jordan un kaumen no Jericho; un de Birja von Jericho un de Amorita un de Perisita un de Kanaanita un de Hetita un de Girgasita un de Hewita un de Jebusita streeden jäajen junt, un ekj jeef an en june Haunt.

¹²Un ekj schekjt de Hornisse ver junt häa, un dee vejuagen an ver junt, de beid Kjennichs de Amorita; nich met dienem Schwieet un nich met dienem Boagen.

¹³Un ekj ha junt een Launt jejäft, om daut du die nich bemieecht hast, un Städa, dee jie nich jebut ha, un jie wonen doa; von Wienboaj un Eeljbeem, dee jie nich jeplaunt ha, ät jie.

¹⁴Un nu fercht däm Harn un deent am opprechtich; un doot de Jetta wajch, dee june Vodasch aun jane Sied vom Stroom un en Ägipten jedeent ha, un deent däm Harn.

¹⁵Un wan daut en june Uagen Iebel es, däm Harn to deenen, soo erwält junt vondoag, wäm jie deenen wellen, aus de Jetta, dee june Vodasch jedeent ha, dee aun jane Sied vom Stroom wonen, ooda de Jetta de Amorita, en dee äa Launt jie wonen. Oba ekj un mien Hus, wie wellen däm Harn deenen!

¹⁶Un daut Volkj auntwuad un säd: Daut es wiet von ons, däm Harn too veloten, om aundre Jetta to deenen!

¹⁷Dan de Har, ons Gott, es daut, dee ons un onse Vodasch ut däm Ägiptenlaunt, ut däm Hus de Kjnajchtschoft, noppjefieet haft, un dee dise groote Tieekjen ver onse Uagen jedonen un ons bewoat haft, opp däm gaunzen Wajch, opp däm wie jegonen, un unja aul de Velkja, derch dee äare Medd wie jegonen sent.

¹⁸Un de Har haft aule Velkja un de Amorita, de Laundesbewona, ver ons vejoacht. Uk wie wellen däm Harn deenen, dan hee es ons Gott!

¹⁹Un Josua räd toom Volkj: Jie kjennen däm Harn nich deenen; dan hee es een heilja Gott, hee es een iewaja Gott; hee woat june Äwaträdunk un june Sinden nich vezeien.

²⁰Wan jie däm Harn veloten un framde Jetta deenen, soo woat hee sikj aufdreien un junt Iebel doonen un junt venichten, nodäm hee junt Goodet jedonen haft.

²¹Un daut Volkj räd too Josua: Ne, sonda däm Harn well wie deenen!

²²Doa säd Josua toom Volkj: Jie sent Zeijen jäajen junt, daut jie selfst junt däm Harn erwält ha, om am to deenen. Un see säden: Wie sent Zeijen!

²³Soo doot nu de framde Jetta wajch, dee en june Medd sent, un neijt jun Hoat nodäm Harn, däm Gott Israels.

²⁴Un daut Volkj säd to Josua: däm Harn, onsem Gott, well wie deenen un opp siene Stemm hieren!

²⁵Un Josua muak aun janem Dach eenen Bunt met däm Volkj un läd am Sazungen un Rajcht väa en Sichem.

²⁶Un Josua schreew dise Wieed en daut Jesazbuak Gottes; un hee neem eenen groote Steen un recht däm doa opp unja de Terebinten, dee bie däm Heilichtum Gottes steit.

²⁷Un Josua räd toom gaunzen Volkj: Kjikj, dis Steen saul Zeij jäajen ons sennen; dan hee haft aule Wieed Gottes jehieet, dee hee met ons jerät haft; un hee saul Zeij jäajen junt sennen, doamet jie junem Gott nich velieejen.

²⁸Un Josua leet daut Volkj gonen, eenem jiedren en sien Oawdeel.

²⁹Un daut passieed no dise Dinj, doa storf Josua, de Sän Nuns, de Kjnajcht Gottes, 110 Joa oolt;

³⁰un maun begrow am enne Jäajent en sienem Oawdeel en Timnat-Serach oppe Boaj Efraim, nuadlich vom Boaj Gaasch.

³¹Un Israel deend däm Harn aule Doag, soo lang Josua läwd un aule Doag de Eltestasch, dee äare Doag no Josua velenjaden, un dee daut gaunze Woakj Gottes kjanen, daut hee fa Israel jedonen haud.

³²Un Josef siene Knoakes, dee de Kjinja Israel ut Ägipten noppjebrocht hauden, begrowen see en Sichem opp däm Stekj Stap, daut Jakob vonne Säns Hemor, däm Voda von Sichem, jekoft haud fa 100 Kesita; un dee wort de Kjinja Josef toom Oawdeel.

³³Un Eleasar, Aaron sien Sän, storf; un see begrowden am oppem Aunboaj von sienem Sän Pinehas, dee am jejäft wort oppe Boaj Efraim.