Read De Bibel JHF Josua 3 Bible Online

Josua 3 - De Bibel JHF bible

Josua 3

¹Doa muak Josua sikj tiedich Zemorjes opp, un see jinjen von Sittim wajch un kaumen aun däm Jordan, hee un aule Kjinja Israel un bleewen doa, bat see äwa jegonen wieren.

²Un daut passieed aum Enj von dree Doag, doa jinjen de Väastona medden derch daut Loaga,

³un see befoolen däm Volkj un säden: Sooboolt jie de Bundeslod Gottes, von junem Gott, seenen, un de Priesta, de Leviten, dee ar droagen, dan sell jie von junem Uat gonen un ar hinjaraun gonen.

⁴Doa saul tweschen junt un ar eene Strakj bie 2000 Ellen sennen. Jie sellen ar nich too no komen, om daut jie däm Wajch weeten, opp däm jie gonen sellen; dan jie sent disem Wajch bat nu nich jegonen.

⁵Un Josua räd toom Volkj: Heilicht junt; dan morjen woat de Har en june Medd Wunda doonen.

⁶Un Josua räd to de Priesta un säd: Nämt de Bundeslod un got ver däm Volkj äwa. Un see neemen de Bundeslod un jinjen ver däm Volkj häa.

⁷Un de Har räd too Josua: Aun disem Dach well ekj aunfangen, die enne Uagen von gaunz Israel groot too moaken, doamet see weeten, daut, soo aus ekj met Moses jewast sie, ekj met die sennen woa.

⁸Un du saust de Priesta, dee de Bundeslod droagen, befälen un sajen: Wan jie aum Raunt vom Jordan Wota komen, soo blieft em Jordan stonen.

⁹Un Josua räd to de Kjinja Israel: Komt noda, un hieet de Wieed Gottes, junem Gott!

¹⁰Un Josua säd: Doaraun sell jie weeten, daut de läwendja Gott en june Medd es, un daut hee de Kanaanita un de Hetita un de Hewita un de Perisita un de Girgasita un de Amorita un de Jebusita jewess ver junt vejoagen woat.

¹¹Kjikj, de Bundeslod vom Harn de gaunze Ieed jeit ver junt häa en däm Jordan.

¹²Un nu nämt junt 12 Mana ut de Staum Israels, ut jiedrem Staum eenen.

¹³Un daut woat passieren, wan de Footsol de Priesta, dee de Lod Gottes, däm Harn de gaunze Ieed, droagen, em Wota vom Jordan stieen, soo woaren de Wota vom Jordan, dee von bowen rauf ranen, aufjeschnäden woaren, un see woaren aus een Daum stonen bliewen.

¹⁴Un daut passieed, aus daut Volkj ut siene Zelten rutjinkj, om äwa däm Jordan too gonen, un de Priesta dee Bundeslod ver däm Volkj druagen,

¹⁵un sooboolt dee de Bundeslod druagen, aum Jordan kaumen, un de Feet de Priesta, dee de Lod druagen, em Wota Raunt klunjden, - oba de Jordan es voll, bat äwa sien Eewa, de gaunze Arnttiet, -

¹⁶doa bleewen de rauf ranende Wota stonen; dee stalden sikj aus een Daum opp, sea wiet bowen, bie Adam, de Staut, dee aune Sied von Zaretan licht; un dee nom Mäa enne Läacht, däm Soltmäa, rauf rand wort gaunz aufjeschnäden. Un daut Volkj jinkj derch, jäajenäwa von Jericho.

¹⁷Un de Priesta, dee de Bundeslod Gottes druagen, stunden faust oppem Drieejen enne Medd vom Jordan; un gaunz Israel jinkj oppem Drieejen äwa, bat de gaunze Nazion aula äwa däm Jordan jegonen wieren.