Read De Bibel JHF Josua 4 Bible Online

Josua 4 - De Bibel JHF bible

Josua 4

¹Un daut passieed, aus de gaunze Nazion äwa däm Jordan jegonen wia, doa räd de Har too Josua un säd:

²Nämt junt ut däm Volkj 12 Mana, ut jiedrem Staum eenen,

³un Befäl an un sajcht: Häft junt von hia, ut de Medd vom Jordan, von de Städ, woa de Feet de Priesta jestonen ha, 12 Steena; un brinjt dee met junt hia äwa un lajcht dee han en däm Nachtloaga, woa jie dise Nacht äwanachten woaren.

⁴Un Josua roopt de 12 Mana, dee hee ut de Kjinja Israel bestalt haud, ut jiedrem Staum eenen Maun.

⁵Un Josua räd to an: Got äwa, ver de Lod Gottes, junem Gott, enne Medd vom Jordan, un häft junt een jiedra eenen Steen opp siene Schulla, no de Zol de Stam de Kjinja Israel,

⁶doamet dit een Tieekjen unja junt es. Wan june Kjinja nohäa froagen un sajen: Waut bedieden junt dise Steena?

⁷Soo sell jie to an sajen: Daut et Wota vom Jordan ver de Bundeslod Gottes aufjeschnäden wort; aus see derch däm Jordan jinjen, worden de Wota vom Jordan aufjeschnäden. Un dise Steena sellen fa de Kjinja Israel toom eewjen Jedajchnis sennen.

⁸Un de Kjinja Israel deeden aulsoo, aus Josua befoolen haud, un hoowen 12 Steena ut de Medd vom Jordan opp, soo aus de Har too Josua jesajcht haud, no de Zol de Stam de Kjinja Israel; un see brochten dee met sikj en daut Nachtloaga un läden dee doa selfst han.

⁹Un 12 Steena recht Josua enne Medd vom Jordan opp, aun dee Städ, woa de Feet de Priesta jestonen hauden, dee de Bundeslod druagen; un dee sent doa bat opp disem Dach.

¹⁰Un de Priesta, dee de Lod druagen, bleewen enne Medd vom Jordan stonen, bat aules jedonen wia, waut de Har däm Josua befoolen haud, toom Volkj to räden, no aulem, waut Moses däm Josua befoolen haud. Un daut Volkj spood sikj un jinkj äwa.

¹¹Un daut passieed, aus daut gaunze Volkj met aulem äwa jegonen wia, doa jinkj de Lod Gottes un de Priesta ver däm Volkj äwa.

¹²Un de Kjinja Ruben un de Kjinja Gad un de haulwa Staum Manasse jinjen bewaufnet ver de Kjinja Israel häa, aus Moses to an jerät haud.

¹³Bie 40 000 toom Häa Bewaufnete jinjen ver däm Harn häa - toom Kaumf enne Läacht von Jericho.

¹⁴Aun däm Dach muak de Har däm Josua enne Uagen vom gaunzen Israel groot; un see enjsten sikj fa am, aus see sikj fa Moses jeenjst hauden, aule Doag en sienem Läwen.

¹⁵Un de Har räd too Josua un säd:

¹⁶Befäl de Priesta, dee de Zeichnislod droagen, daut see ut däm Jordan noppgonen.

¹⁷Un Josua befool de Priesta un säd: Got ut däm Jordan nopp!

¹⁸Un daut passieed, aus de Priesta, dee de Bundeslod Gottes druagen, ute Medd vom Jordan noppkjeemen, aus de Footsole de Priesta oppem Drieejen stieejen, doa kaum daut Wota vom Jordan aun äarem Uat trigj, un daut rand aus verhäa äwa aul siene Eewa.

¹⁹Un daut Volkj jinkj ut däm Jordan nopp aum 10-den em ieeschten Moonat; un see loagaden sikj en Gilgal aun de Oost Jrens von Jericho.

²⁰Un jane 12 Steena, dee see ut däm Jordan jenomen hauden, recht Josua en Gilgal opp.

²¹Un hee räd to de Kjinja Israel un säd: Wan june Kjinja enne Tookunft äare Vodasch froagen un sajen: Waut bedieden dise Steena?

²²Soo sell jie daut june Kjinja toweeten loten un sajen: Opp drieejem Boddem es Israel derch disem Jordan jegonen.

²³Dan de Har, jun Gott, haft daut Wota vom Jordan ver junt utdräjen loten, bat jie äwajegonen wieren, soo aus de Har, jun Gott, met däm Schelpmäa deed, daut hee ver ons utdräjd, bat wie äwajegonen wieren:

²⁴Doamet aule Velkja de Ieed de Haunt Gottes erkjanen, daut see stoakj es; doamet jie junt ver däm Gott, junem Gott, aule Doag enjsten.