Read De Bibel JHF Josua 5 Bible Online

Josua 5 - De Bibel JHF bible

Josua 5

¹Un daut passieed, aus aule Kjennichs de Amorita, dee aun dise Sied vom Jordan, jäajen Wasten, wonden, un aule Kjennichs de Kanaanita, dee aum Mäa wieren, hieeden, daut de Har daut Wota vom Jordan ver de Kjinja Israel utjedrieecht haud, bat wie äwa jegonen wieren, doa vezogd äa Hoat, un daut wia kjeen Moot mea en an ver de Kjinja Israel.

²En dee selje Tiet säd de Har too Josua: Moak die schoape Massa un beschnied wada de Kjinja Israel toom tweeden Mol.

³Un Josua muak sikj steenane Massa un beschneet de Kjinja Israel aum Boajch Aralot.

⁴Un dit es de Sach, wuarom Josua an beschneet: Daut gaunze Volkj, daut ut Ägipten jegonen wia, de Menliche, aule Kjrichsmana, wieren enne Wieste jestorwen, oppem Wajch, aus see ut Ägipten jinjen.

⁵Dan daut Volkj, daut utjinkj, wia beschnäden; oba daut gaunze Volkj, daut enne Wieste jebuaren wia, oppem Wajch, aus see ut Ägipten jinjen, haud maun nich beschnäden.

⁶Dan de Kjinja Israel waundaden 40 Joa enne Wieste, bat de gaunze Kjrichsmana, dee ut Ägipten jegonen, omjekomen wieren, dee oppe Stemm Gottes nich jehieet hauden, dän de Har jeschwuaren haud, an daut Launt nich seenen to loten, daut de Har äare Vodasch jeschwuaren haud, ons to jäwen, een Launt, daut von Malkj un Honnich rand.

⁷Un äare Säns, dee hee aun äare Städ oppkomen leet, dise beschneet Josua; dan see hauden de Väahut, wiels maun an oppem Wajch nich beschnäden haud.

⁸Un daut passieed, aus de gaunze Nazion beschnäden wia, doa bleewen see aun äarem Uat em Loaga, bat see jesunt wieren.

⁹Un de Har räd too Josua: Vondoag ha ekj de ägiptische Schaund von junt raufjenomen. Un maun jeef däm Uat däm Nomen Gilgal bat opp disem Dach.

¹⁰Un de Kjinja Israel loagaden en Gilgal; un see fiade daut Passa aum 14-den Dach em Moonat, Oppenowent, enne Läacht von Jericho.

¹¹Un see auten aum aundren Dach nom Passa vom Laundesjeträajd, onjesuadet Broot un jereeschte Kjieena, aun disem seljen Dach.

¹²Un de Maunajrett hieed aum aundren Dach opp, aus see von däm Jeträajd auten, un daut jeef fa de Kjinja Israel kjeene Maunajrett mea; un see auten en janem Joa von Kanaans Laundesarnte.

¹³Un daut passieed, aus Josua bie Jericho wia, doa hoof hee siene Uagen opp un sach; un kjikj, een Maun stunt ver am, un sien Schwieet wia utjetrocken en siene Haunt. Un Josua jinkj opp am to un säd to am: Best du fa ons ooda fa onse Fiend?

¹⁴Un hee säd: Ne, sonda de Bowaschta vom Häa Gottes - ekj sie nu jekomen. Doa foll Josua opp sien Aunjesecht, oppe Ieed, un bäd am aun un säd to am: Waut räd (sajcht) mien Har too sienem Kjnajcht?

¹⁵Un de Bowaschta vom Häa Gottes säd to Josua: Trakj diene Schoo von diene Feet ut; dan de Uat, opp däm du steist, es heilich! Un Josua deed aulsoo.