Read De Bibel JHF Josua 6 Bible Online

Josua 6 - De Bibel JHF bible

Josua 6

¹Un Jericho haud siene Dooasch jeschloten un wia ver de Kjinja Israel veräajelt; kjeena jinkj ut, un kjeena jinkj nenn.

²Un de Har säd to Josua: Kjikj, ekj ha Jericho un sienen Kjeennich un de Kjrichsmana en diene Haunt jejäft.

³Un jie sellen om de Staut gonen, aule Kjrichsmana, eenmol runtom de Staut häa; aulsoo saust du sas Doag doonen.

⁴Un 7 Priesta sellen 7 Jubel Posaun ver de Lod häadroagen. Un aum säwenden Dach sell jie säwen Mol om de Staut gonen, un de Priesta sellen en de Posaun blosen.

⁵Un daut saul passieren, wan maun daut Loarm Huarn aunhoolend blost, wan jie de Posaunenschaul hieren, soo saul daut gaunze Volkj een grootet Jeschrecht moaken, un de Stautmia woat omfaulen, un daut Volkj saul noppgonen, een jiedra ver sikj häa.

⁶Un Josua, de Sän Nuns, roopt de Priesta un säd to an: Nämt de Bundeslod, un 7 Priesta sellen 7 Jubel Posaun ver de Lod Gottes droagen.

⁷Un hee säd toom Volkj: Got han un got om de Staut; un dee Bewaufneten sellen ver de Lod Gottes häa gonen.

⁸Un daut passieed, aus Josua toom Volkj jerät haud, doa jinjen de 7 Priesta han, dee de 7 Jubel Posaun ver däm Harn häa druagen, un blosde enne Posaun; un de Bundeslod Gottes jinkj hinja an.

⁹Un dee bewaufnete jinjen ver de Priesta häa, dee enne Posaun blosde, un de Äwaje jinjen hinjre Lod häa, endäm see emma wada en de Posaun blosde.

¹⁰Un Josua haud däm Volkj befoolen un jesajcht: Jie sellen kjeen Jeschrecht opphäwen un june Stemm nich hieren loten, un kjeen Wuat saul ut junem Mul gonen; bat däm Dach, doa ekj to junt sajen woa: Erhäwt een Jeschrecht! Dan sell jie een Jeschrecht moaken.

¹¹Un de Lod Gottes jinkj om de Staut, eenmol runtom ar häa; un see kaumen en daut Loaga un äwanachten em Loaga.

¹²Un Josua muak sikj tiedich Zemorjes opp, un de Priesta druagen de Lod Gottes.

¹³Un de 7 Priesta, dee de 7 Jubel Posaun ver de Lod Gottes druagen, jinjen un blosde emma wada en de Posaun; un dee bewaufnete jinjen ver an häa, un de Äwaje jinjen hinjre Lod Gottes häa, endäm see emma wada en de Posaun blosde.

¹⁴Un see jinjen aum tweeden Dach eenmol om de Staut un kaumen en daut Loaga trigj. Aulsoo deeden see sas Doag.

¹⁵Un daut passieed aum säwenden Dach, doa muaken see sikj tiedich opp, biem Oppgank de Morjenroot, un jinjen om de Staut no dee selje Wies säwen Mol; blooss aun disem Dach jinjen see säwen Mol om de Staut.

¹⁶Un daut passieed biem säwenden Mol, aus de Priesta enne Posaun blosde, doa säd Josua toom Volkj: Erhäwt een Jeschrecht! Dan de Har haft junt de Staut jejäft.

¹⁷Un de Staut, ar un aules, waut doabennen es, saul däm Harn een Baun sennen; blooss Rahab, de Hua, saul aum Läwen bliewen, see un aule, dee bie ar em Hus sent, wiels see de Booten vestoaken haft, dee wie utjeschekjt hauden.

¹⁸Oba jie, heet junt fa däm Vebaunten, doamet jie nich vebaunen un doch von däm Vebaunten nämen un daut Loaga Israels toom Baun moaken un daut em Onjlekj brinjen.

¹⁹Un aulet Selwa un Golt, met däm koppanen un iesanen Jereetschoft, saul däm Harn heilich sennen; en däm Schauz Gottes saul daut komen.

²⁰Un daut Volkj muak een Jeschrecht, un see blosde enne Posaun. Un daut passieed, aus daut Volkj däm Posaunenschaul hieed, un aus daut Volkj een grootet Jeschrecht opphoof, doa foll de Mia en sikj toop, un daut Volkj jinkj enne Staut nenn, een jiedra ver sikj han, un see naumen de Staut en.

²¹Un see vebaunten aules, waut enne Staut wia, vom Maun bat to Fru, vom Jung bat toom Jreis, un bat de Rinda un de Schop un Äsel, met däm schoapen Schwieet.

²²Un Josua säd to de beid Mana, dee daut Launt aunjeseenen hauden: Got en daut Hus de Hua, un brinjt de Fru un aul äare Aunjeheaje von doa rut, aus jie daut ar jeschwuaren ha.

²³Doa jinjen de Kundschofta, nenn un fieeden Rahab un äarem Voda un äare Mutta un äare Breeda un aul äare Aunjeheaje rut; äa gaunzet Jeschlajcht fieeden see rut; un see leeten an butrem Loaga Israels.

²⁴Un de Staut un aules, waut doabennen wia, vebrenden see met Fia; blooss daut Selwa un daut Golt un daut koppane un iesane Jereetschoft läden see en däm Schauzhus Gottes.

²⁵Soo leet Josua Rahab, de Hua, un daut Vodahus un aul äare Aunjeheaje aum Läwen; un see haft en Israels Medd jewont bat opp disem Dach, wiels see de Booten vestuak, dee Josua utjeschekjt haud, om Jericho auntoseenen.

²⁶Un Josua schwua to de Tiet un säd: Veflucht es ver däm Harn dee Maun, dee sikj oppmoakt un dise Staut Jericho oppbuen woat! Met sienem Ieeschtjebuarnen woat hee äarem Grunt lajen un met sienem Jinjsten äare Dooasch oppstalen.

²⁷Un de Har wia met Josua, un sien Roop vebreed sikj derch daut gaunze Launt.